१ राजा 12 - नेवाः बाइबलउत्तरया कुलतय्गु विद्रोह २ इति १०:१-१९ 1 रहबाम शकेमय् वन, छाय्धाःसा इस्राएलयापिं सकलें मनूत वयात जुजु दय्केत अन वंगु खः। 2 थ्व खँ न्यनाः नबातया काय् यारोबाम मिश्र देशं लिहां वल। उबलय् तक व मिश्र देशय् च्वनाच्वंगु खः, अन व सोलोमन जुजु खनाः ग्यानाः बिस्युं वंगु खः। 3 अथे जुयाः इस्राएलया नायःतय्सं यारोबामयात सःतके छ्वत। अले यारोबाम व इस्राएलया फुक्क खलः वयाः रहबामयात थथे धाल, 4 “छिकपिनि बौनं जिमित झ्यातुगु कु क्वबिकाः जिमिगु जीवनयात थाकुका ब्यूगु खः। उगु झ्यातुगु कुयात याउँका बियादीसा जिमिसं छिगु सेवा याये।” 5 रहबामं इमित धाल, “थ्व खँय् बिचाः यायेत जितः स्वन्हुया ई ब्यू, छिपिं स्वन्हु लिपा वा।” उकिं मनूत अनं वन। 6 रहबाम जुजुं थः बौ सोलोमनयात व म्वाना च्वंतले सल्लाहबीपिं थकालितलिसें खँ ल्हात। वं इमित न्यन, “थुपिं मनूतय्त जिं छु लिसः बीगु, छिकपिनिगु छु सल्लाह दु?” 7 बुरापिन्सं रहबामयात धाल, “छिं थुपिं थकालितय्त बांलाःगु व्यवहार यानाः थुमित यःगु सल्लाह बियादिल धाःसा अले थुपिंलिसें बांलाक खँ ल्हानादीसा थुमिसं न्ह्याबलें छिगु सेवा याइ।” 8 तर वं उपिं थकालिपिनिगु सल्लाह मन्यंसे थःनापं ब्वलंपिं अले थःगु सेवा याइपिं ल्याय्म्हतय्के सल्लाह काल। 9 वं इमित न्यन, “‘छिकपिनि बौनं जिमिके तयादीगु कु याउँकाबियादिसँ’ धकाः जितः बिन्ति याःवःपिं मनूतय्त जिं छु लिसः बीगु? जिं छु यायेगु, छिमिगु छु सल्लाह दु?” 10 इमिसं लिसः बिल, “‘छिकपिनि बौनं जिमित झ्यातुगु कु क्वबिकादीगु दु, उकियात याउँकाबियादिसँ’ धकाः छितः धाः वःपिं मनूतय्त छिं थथे धयादिसँ ‘जिमि बौया जँ स्वयाः जिगु कान्छी पतिं हे तःत्याः! 11 जिमि बौनं छिमित झ्यातुगु कु क्वबिकल, जिं छिमित थ्व स्वयाः झन झ्यातुगु कु क्वबिकाबी। वय्कलं छिमित कोर्रां दाय्कादीगु खः तर जिं छिमित झन कं दुगु कोर्रां दाय्काबी।’” 12 अथे जुयाः जुजुं धाःथें यारोबाम व सकलें मनूत स्वन्हु लिपा वयाथाय् लिहां वल, अले धाल, स्वन्हु लिपा हाकनं जिथाय् वा। 13 जुजुं थकालितय्गु सल्लाह मन्यंसे ल्याय्म्हतय्गु सल्लाहकथं कडा जुयाः मनूतय्त खँ ल्हात 14 वं धाल, “जिमि बौनं छिमित झ्यातुगु कु क्वबिकादिल, जिं झन झ्यातुगु कु क्वबिकाबी। वय्कलं छिमित कोर्रां दाय्कादीगु खः, तर जिं छिमित कं दुगु कोर्रां दाय्काबी।” 15 थुकथं जुजु रहबामं उपिं मनूतय्गु खँ न्यं हे मन्यं छाय्धाःसा शीलोयाम्ह अगमवक्ता अहियाहपाखें नबातया काय् यारोबामयात परमप्रभुं धयादीगु वचन पूवनेत वय्कलं थज्याःगु अवस्था हयादीगु खः। 16 जुजुं थःगु खँ मन्यंगु खनाः फुक्क इस्राएल चिल्लाय् दनाः हाल, “छु झीपिं दाऊदया परिवारया ब्वः खः ला? यिशैया काय्याके झीगु छुं अधिकारया भाग मदु। हे इस्राएल, थथःगु पालय् हुँ! हे दाऊद, छं थःगु हे छेँ स्व!” अनंलि इस्राएलयापिं मनूत थथःगु छेँय् वन। 17 तर रहबामं यहूदाया शहर शहरय् च्वनाच्वंपिं इस्राएलीतय्त शासन याना हे च्वन। 18 अले जुजु रहबामं दासयात थें ज्या याकूपिं मनूतय् नायः अदोनीरामयात इमिथाय् छ्वल। तर इस्राएलीतय्सं वयात ल्वहँतं कय्काः स्यात। जुजु रहबाम धाःसा हथाय् पथासं थःगु रथय् च्वनाः यरूशलेमय् बिस्युं वन। 19 अबलय्निसें आः तक नं उत्तरी इस्राएलया मनूत दाऊदया परिवारया विरोधी जूगु दु। 20 यारोबाम लिहां वःगु खँ न्यनाः इस्राएलयापिं मनूतय्सं वयात छगू सभाय् सःतल, अले वयात इस्राएलयाम्ह जुजु ल्यल। यहूदा कुलयापिं मनूत जक दाऊदया परिवारनापं मिलय् जुयाच्वन। शमायाहया अगमवाणी 21 रहबाम यरूशलेमय् थ्यंकः वल। अले वं इस्राएलनापं लडाइँ यानाः थःगु राज्य हाकनं लित कायेत यहूदा व बेन्यामीन कुलयापिं १,८०,००० म्ह सिपाइँत मुंकल। 22 तर परमेश्वरया मनू शमायाहयाथाय् परमप्रभुया थ्व वचन वल, 23 “सोलोमनया काय् यहूदायाम्ह जुजु रहबामयात अले यहूदा व बेन्यामीनय् दुपिं फुक्क इस्राएलीतय्त थथे धा, 24 ‘परमप्रभुं थथे धयादी – छिपिं थः इस्राएली दाजुकिजापिंनापं लडाइँ यायेत थहां वने मते! छिपिं सकलें थथःगु छेँय् लिहां हुँ छाय्धाःसा थ्व ज्या जिं यानागु खः।’” उकिं इमिसं परमप्रभुया खँ न्यन, अले परमप्रभुं उजं बियादीगु थें यारोबामलिसें लडाइँ मयासें छेँय् लिहां वन। बेथेल व दानय् लुँयाम्ह निम्ह द्वहंचा 25 यारोबामं एफ्राइमया पहाडी देशय् च्वंगु शकेम शहरयात पखाः व ध्वाखा दय्काः बल्लाकल, अले व अन हे च्वन। वं अनं वनाः पनीएल शहर नं बल्लाक दय्कल। 26 यारोबामं थथे बिचाः यात, “थ्व राज्य दाऊदया परिवारया ल्हातय् हे लिहांवनी जुइ। 27 थुपिं मनूत यरूशलेमय् परमप्रभुया देगलय् बलि छायेत वन धाःसा इमिगु मन यहूदाया जुजु रहबामपाखे लिहांवनी। अले जितः स्यानाः इपिं रहबामयाथाय् हे लिहांवनी।” 28 अले सल्लाह बीपिनिगु सल्लाह कयाः जुजुं लुँयाम्ह निम्ह द्वहंचा दय्कल। वं मनूतय्त धाल, “छिमित यरूशलेमय् वनेत थाकुइ। हे इस्राएलीत, छिमित मिश्र देशं पित हयादीपिं छिमि द्यःत थुपिं हे खः!” 29 वं छम्ह द्वहंचा बेथेलय् व मेम्ह दानय् थापं यात। 30 थ्व हे खँ इस्राएलय् पाप जुल। मनूत उपिं मध्ये छम्ह द्वहंचायात पुजा यायेत उत्तरय् दान तक नं वनेगु यात। 31 उबलय् तक परमप्रभुयात आराधना यायेत देगः दय्कूगु मदुनि। अथे जुयाः यारोबामं द्यःपुजा यायेगु थाय्त थांत नं दय्कल। अले लेवीया सन्तान मखुपिं मनूतय्त नं पुजाहारी ल्यल। 32 वं च्यागूगु लाया झिंन्यान्हु खुन्हु यहूदाय् हनीगु नखः थें छगू नखः शुरु यात, वेदीइ बलि छाल। बेथेलय् थःम्हं दय्कूपिं द्वहंचातय्त बलि छाल। बेथेलय् थःम्हं दय्कूगु पुजा यायेगु थाय्या निंतिं पुजाहारीतय्त नं ल्यल। 33 अले थःम्हं ल्यःगु च्यागूगु लाया झिंन्यान्हु खुन्हु व बेथेलय् थःम्हं अन दय्कूगु वेदीइ बलि छाःवन, वं इस्राएलीतय्गु निंतिं नखः शुरु यात, अले व वेदीइ बलि बीत वन। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.