१ यूहन्ना 5 - नेवाः बाइबलसंसारयात गथे यानाः त्याकेगु? 1 येशूयात मुक्ति बीम्ह ख्रीष्ट खः धकाः विश्वास याना जूपिं मनूत परमेश्वरया सन्तान खः। परमेश्वर बाःयात माया याइम्हय्सिनं वय्कःया काय्यात नं माया याइ। 2 वय्कःयात माया याना च्वंसा व वय्कःयागु आज्ञा मानय् याना च्वंसा झीसं धात्थें वय्कःया मस्तय्त माया यानाच्वनागु दु धकाः सी दइ। 3 परमेश्वरयागु आज्ञा मानय् यायेगु हे वय्कःयात माया यायेगु खः। वय्कःयागु आज्ञा मानय् यायेत थाकु मजू। 4 वय्कःया सन्तानतय्सं थ्व संसारयात बुकी। वय्कःयात विश्वास यानागुलिं झीसं संसारयात त्याके फइ। 5 सुनां संसारयात त्याके फइ? येशूयात परमेश्वरया काय् खः धकाः विश्वास यानाजुइपिन्सं जक थ्व संसारयात त्याके फइ, मेपिन्सं त्याके फइ मखु। 6 येशू ख्रीष्ट थ्व संसारय् झायादीगु निता दसि दु – लः व हि। मनू थें जुयाः बप्तिस्मा कयादीगु दसि खः – लः, अले हानं मनूतय्गु पाप क्षमा यायेत येशूं सिनाः थःगु हि हाय्कादीगु दसि खः – हि। सत्यम्ह पवित्र आत्मां नं थ्व हे खँ साक्षी बियादिल। 7-8 येशू परमेश्वरया काय् खः धकाः थ्व स्वतां बांलाक क्यं – पवित्र आत्मा, लः व हि। 9 झीसं मनुखं हे ब्यूगु साक्षीयात पत्याः याना। परमेश्वरं ब्यूगु साक्षी झन पत्याः यायेबहः जू। वय्कलं थः हे काय्यागु साक्षी बियादिल। 10 अय्जूगुलिं वय्कःया काय्यात विश्वास यानाच्वंपिं मनूतय्सं थ्व खँ सत्य खः धकाः स्यू। परमेश्वरयात विश्वास याइ मखुपिन्सं वय्कःयात फताहा ताय्की, छाय्धाःसा परमेश्वरं थः काय्यागु बारे बियादीगु साक्षीयात इमिसं विश्वास याइ मखु। 11 थ्व खँयागु दसि थ्व हे खः – परमेश्वरं झीत अनन्त जीवन बियादीगु दु। थ्व अनन्त जीवन वय्कःया काय्याके दु। 12 सुयाके काय् दु वयाके थ्व अनन्त जीवन दइ, सुयाके परमेश्वरया काय् मदु वयाके थ्व अनन्त जीवन दइ मखु। अनन्त जीवन 13 परमेश्वरया काय् येशूयात विश्वास याःगुलिं छिमिके अनन्त जीवन दु धयागु खँ थुइमा धकाः थ्व खँ छिमित च्वयाच्वनागु खः। 14 वय्कःया इच्छा कथं झीसं न्ह्यागु फ्वंसां वय्कलं बियादी धकाः झीसं स्यू। उकिं झीपिं वय्कःया न्ह्यःने वनेत ग्याये माःगु मदु। 15 झीसं प्रार्थनाय् न्ह्यागु फ्वंसां वय्कलं झीगु खँ न्यनादी धकाः स्यूगुलिं वय्कःयाके फ्वनागु वय्कलं बियादी धुंकल धकाः नं स्यू। 16 सुनानं थः किजायात सीम्वाःलिगु पाप यानाच्वंगु खंसा वं थः किजायालागिं प्रार्थना यायेमाः। परमेश्वरं वयात जीवन बियादी। तर थ्व धाःसा सीम्वाःलिगु पाप याःपिनिगु निंतिं जक खः। सी मालिगु पाप नं दु। तर जिं छिमित थुकिया लागि प्रार्थना या धकाः धाये मखु। 17 मभिगुं बांमलाःगु ज्याखँ फुक्कं पाप हे खः। अय्नं सीम्वाःलिगु पाप नं दु। 18 परमेश्वरया सन्तानतय्सं पाप यानां तुं च्वनी मखु। वय्कःया काय्नं अज्याःम्ह मनूयात शैतानं थी मफय्क बचय् यानातयादी। 19 झीपिं परमेश्वरया सन्तान खः, अले थ्व संसारय् च्वंपिं मेपिं फुक्क मनूत शैतानया मनूत खः धकाः नं झीसं स्यू। 20 परमेश्वरया काय् झायाः झीत धात्थेंयाम्ह परमेश्वर म्हसीकादिल। थ्व खँ झीसं स्यू। धात्थेंयाम्ह परमेश्वरया काय् येशू ख्रीष्टनाप झीगु जीवन नं प्यपुनाच्वंगु दु। थ्व हे सत्य परमेश्वर खः, अले हानं थ्व हे परमेश्वर अनन्त जीवन नं खः। 21 उकिं अय् जि यःपिं मस्त, मूर्ति पुजापाखें तापाक च्वँ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.