Zefania 2 - ŊMALƐ KRƆŊKRƆŊ LƐ

Hesɛɛjee he ehia

¹ Ao, maŋ ni hiɛgbele tɔ ejwa, nyɛbuaa nyɛhe naa, ni nyɛsusua nyɛhe,

² dani aba mli akɛ aaakpala nyɛ kɛya tamɔ kɔɔyɔɔ tswaa tutuu, dani Yehowa mlifu ni naa wa lɛ aba nyɛnɔ, dani ashɛ Yehowa mlifu gbi lɛ!

³ Nyɛ shikpɔŋ lɛ nɔ heshibalɔi fɛɛ ni feɔ Yehowa suɔmɔnaa nii, nyɛtaoa Yehowa sɛɛgbɛ; nyɛtaoa jalɛ sɛɛgbɛ; ni nyɛtaoa heshibaa sɛɛgbɛ, ni eko lɛ aaaŋɔ nyɛ atee yɛ Yehowa mlifu gbi lɛ nɔ.

Israel hewɔ maji lɛ ahiɛkpãtãmɔ

⁴ Abaashi Gaza maŋ lɛ afɔ̃ shi, ni Ashkelon baatsɔ̃ amaŋfɔ̃. Abaashwie Ashdod maŋbii lɛ shwane fintiŋŋ, ni abaafã Ekronbii lɛ hu kɛ amɛshishi fɛɛ.

⁵ Kpoo ha nyɛ, nyɛŋshɔnaabii, bo Keretibii amaŋ. Kanaan, Filistibii ashikpɔŋ, Yehowa ebu bo fɔ; ni mibakpãtã ohiɛ, bɔ ni eshwɛŋ omɔ ko mɔ ko dɔŋŋ.

⁶ Ni bo, ŋshɔnaa niiaŋ, obaatsɔ shikpɔŋ kɛ enɔ kooloi alɛɛhei kɛ tookwɛlɔi asesei kɛ toi atsui kɛkɛ.

⁷ Ŋshɔnaa shikpɔŋ lɛ baatsɔ̃ Yudabii ni eshwɛ lɛ anɔ. Jɛi amɛbaalɛ amɛkooloi yɛ, ni Ashkelon maŋ lɛ shĩai lɛ baatsɔ̃mɔ kooloi lɛ awɔɔhei; ejaakɛ Yehowa, amɛNyɔŋmɔ lɛ, musuŋ baatsɔ̃ lɛ yɛ amɛhe, ni ebaahã amɛshwere ekoŋŋ.

⁸ Yehowa kɛɛ akɛ, “Minu jɛmɔi ni Moabbii jɛɔ mimaŋbii lɛ, kɛ ahora ni Amonbii hu bɔɔ miwebii lɛ, kɛ shwãa ni amɛshwãa akɛ amɛbaashɔ̃ mimaŋbii lɛ ashikpɔŋ lɛ yɛ amɛdɛŋ lɛ.

⁹ Beiaŋ ni mi tuuŋtu ji Yehowa, Taiatsɛ, Israel Nyɔŋmɔ hiɛkãalɔ lɛ, miikɛɛ akɛ ja Moab tsɔ̃ tamɔ Sodom, ni Amonbii lɛ hu tsɔ̃ tamɔ Gomora. Amɛshikpɔŋ lɛ baatsɔ̃ ŋoo bui ashikpɔŋ kɛ amaŋfɔ̃ kɛya naanɔ; ni sansrɔ baatsa yɛ enɔ. Mimaŋbii ni aaashwɛ lɛ aaaha Moabbii lɛ kɛ Amonbii lɛ hu anii, ni amɛaaŋɔ amɛshikpɔji lɛ.”

¹⁰ Enɛ akɛaagbala Moabbii lɛ kɛ Amonbii lɛ atoi yɛ amɛhenɔ ni amɛwo lɛ hewɔ; ejaakɛ amɛbɔ Yehowa, Taiatsɛ lɛ, webii lɛ ahora.

¹¹ Amɛbaashe Yehowa gbeyei naakpa. Yehowa baashwie shikpɔŋ lɛ nɔ jemawɔji fɛɛ ahiɛ shi; ni kɛkɛ lɛ maji fɛɛ baaja Yehowa yɛ amɛteŋ mɔ fɛɛ mɔ diɛŋtsɛ shikpɔŋ nɔ.

¹² Ni nyɛ, Etiopiabii, Yehowa baaplene nyɛ hu.

¹³ Yehowa baakpã enine mli kɛshɛ kooyigbɛ kɛkpãtã Asiria hiɛ; ni ebaahã Nineve maŋ lɛ atsɔ̃ amaŋfɔ̃, ni enɔ baagbi wesewese tamɔ shiaŋa nɔ.

¹⁴ Jɛi baatsɔ̃ kooloi kui kɛ kooloi srɔtoi fɛɛ ashibuumɔhe. Akpaŋai kɛ shadeboai kɛ tsui koi lɛ amli baafee amɛshihilɛhei. Patui baabolɔ yɛ samfɛji lɛ anaa, ni kwãakwãalabitei baabolɔ yɛ shinaa kpokui lɛ anaa, ejaakɛ shĩai lɛ fɛɛ ewulewulee ewowoo mli.

¹⁵ Naa, maŋ lɛ ni emli fili lɛ, ni esusu akɛ eyɛ shweshweeshwe, ni no hewɔ lɛ, ekɛɛ ehe akɛ, “Mi ji mi, ni mi misɛɛ lɛ mɔ ko mɔ ko bɛ lɛ, te tɛŋŋ ni etsɔ̃ amaŋfɔ̃ kɛ kooloi kakawuai ashihilɛhe nɛɛ? Mɔ fɛɛ mɔ ni aaatsɔ̃ ehe kɛho lɛ aaahoso eyitso, ni ehe aaajɔ̃ ehe.”