Zefania 1 - ŊMALƐ KRƆŊKRƆŊ LƐ

¹ Wiemɔ ni Yehowa kɛ Zefania wie be mli ni Amon bi Yosia yeɔ Yuda maŋtsɛ lɛ nɛ. Zefania Kush bi lɛ, enii ji Gedalia, Maŋtsɛ Hezekia bi Amaria bi lɛ.

Yehowa Kojomɔ gbi lɛ

² Yehowa kɛɛ akɛ, Mibakpãtã nibii fɛɛ ahiɛ yɛ shikpɔŋ lɛ nɔ.

³ “Mibakpãtã gbɔmɔ kɛ kooloo hiɛ; mibakpãtã loofɔji kɛ ŋshɔŋ loi fɛɛ ahiɛ, mibakpãtã yiwalɔi ahiɛ; mibaplene gbɔmɛi yɛ shikpɔŋ lɛ nɔ, Mi, Yehowa, mikɛɛ.

⁴ “Mibagbala gbɔmɛi ni yɔɔ Yerusalɛm kɛ Yuda shikpɔŋ lɛ nɔ lɛ fɛɛ atoi. Mibafã Baal jamɔ shishi fɛɛ yɛ shikpɔŋ nɛɛ nɔ, ni akaiŋ wulɔmɛi ni sɔ̃mɔɔ jemawɔji lɛ dɔŋŋ.

⁵ Mibakpãtã mɛi fɛɛ ni kwɔɔ kɛyaa tsui ayiteiaŋ amɛyajaa hulu kɛ nyɔɔŋtsere kɛ ŋulamii yɛ jɛi lɛ ahiɛ. Mibakpãtã mɛi hu ni kotoɔ Yehowa lɛ, ni amɛkãa lɛ kitã akɛ amɛbaaye lɛ anɔkwa, shi amɛkɛ jemawɔŋ Molek gbɛi lɛ kãa kitã ahiɛ.

⁶ Mibakpãtã mɛi fɛɛ ni ekpale, ni amɛjaaa Yehowa lɛ dɔŋŋ lɛ ahiɛ, ni ji mɛi ni taooo mi, Yehowa lɛ, misɛɛgbɛ aloo amɛbiii mi nii dɔŋŋ lɛ.”

⁷ Naa, Yehowa gbi lɛ eshɛ etã, no hewɔ lɛ, nyɛfea diŋŋ yɛ ehiɛ. Yehowa esaa afɔle lɛ eto, ni etsuu emɛi ni ekpee lɛ ahe.

⁸ Yehowa kɛɛ akɛ, “Gbi ni mibaplene mɛi lɛ, mibagbala maŋ lumɛi lɛ kɛ maŋtsɛ bihii lɛ kɛ mɛi fɛɛ ni feɔ maŋsɛɛbii akusum lɛ atoi.

⁹ Nakai gbi lɛ nɔ lɛ, mibagbala mɛi fɛɛ ni jaa tamɔ wɔŋjalɔi jaa lɛ, kɛ mɛi hu ni tsɔ̃ɔ yiwalɛ kɛ shishiumɔ nɔ amɛkɛnaa nii amɛwoɔ amɛnuŋtsɔmɛi awei amli obɔ̃bɔ̃ lɛ atoi.”

¹⁰ Yehowa kɛɛ akɛ, “Nakai gbi lɛ nɔ lɛ, abaanu yaafo he kɛbaajɛ Loo Agbo lɛ naa yɛ Yerusalɛm, ni abaawo lele yɛ maŋ lɛ akutso hee lɛ mli, ni gɔ̃ŋkpɔi lɛ ayiteiaŋ baashimɔ.

¹¹ Nyɛ, maŋ lɛ Jɔɔnaabii, nyɛwoa yara nyɛfoa kɛji nyɛnu gbɛɛmɔi nɛɛ; ejaakɛ akpãtã jarayelɔi lɛ fɛɛ ahiɛ, ni aplene mɛi ni yeɔ jwiɛtɛi jara lɛ.

¹² “Nakai be lɛ mikɛ kane baakpa Yerusalɛm maŋ lɛ mli, ni mibagbala emli mɛi ni amɛtsui enyɔ amɛmli, ni amɛheɔ amɛhe amɛyeɔ lɛ atoi. No ji mɛi ni kɛɔ amɛhe akɛ, ‘Yehowa efeŋ ekpakpa, ni esaa efeŋ efɔŋ hu lɛ’.

¹³ Abaaha amɛjarayeli nibii, ni amɛshĩai hu baatsɔ̃mɔ amaŋfɔ̃. Amɛaamamɔ tsui nɛ, shi amɛwɔŋ mli, ni amɛaafee waintromi, shi amɛnuŋ amɛmli wain lɛ eko.”

¹⁴ Yehowa gbi wulu lɛ ebɛŋkɛ etã, eeba nɔŋŋ. Gbi lɛ baajoo naakpa, ejaakɛ nakai gbi lɛ, kãkãlɔi tete baafo waa.

¹⁵ Nakai gbi lɛ, mlifu kɛ amanehulu gbi ni, nifitemɔ kɛ nihiɛkpãtãmɔ gbi ni; duŋ baawo, ni jeŋ baafee kpii; atatu kɛ oblɔtu kabitii hu gbi ni.

¹⁶ Gbi lɛ tɛtɛrɛmantɛrɛ baagbɛɛ, ni abaabɔ oshe kɛtua maji ni atswatswaa gbogboi awo amɛhe lɛ kɛ mɔji ni kwɔlɔ lɛ hu.

¹⁷ Yehowa kɛɛ akɛ, “Mibahao gbɔmɛi, ni amɛbaanyiɛ tamɔ shwilafoi. Akɛni amɛgbo Yehowa nɔ toi lɛ, aaashwie amɛlá shi tamɔ nu, ni amɛgbohii lɛ aaatsɔ̃ tamɔ wamɔ.”

¹⁸ Nakai Yehowa mlifu gbi lɛ nɔ lɛ, gbɔmɛi ajwiɛtɛi kɛ shika fɛɛ nyɛŋ amɛyiwala ahere. Emlifu ni jɛ awuŋayeli mli lɛ naa la lɛ naawalɛ baakpãtã je lɛ fɛɛ hiɛ; ejaakɛ trukaa ni eeeplene shikpɔŋ lɛ nɔ gbɔmɛi fɛɛ.