Zakaria 8 - ŊMALƐ KRƆŊKRƆŊ LƐ

¹ Yehowa kɛɛ, ebaatswa Yerusalɛm ekoŋŋ. Yehowa, Taiatsɛ lɛ, kɛ mi, Zakaria, wie akɛ,

² “Bɔ ni mi, Yehowa, Taiatsɛ lɛ, mikɛɛ nɛ, miiye awuŋã ni naa wa naakpa yɛ Zion he; mikɛ hiɛdɔɔ ni naa wa miiye ehe awuŋã nɛɛ.

³ Bɔ ni Yehowa kɛɛ ekoŋŋ nɛ, mibaku misɛɛ kɛba Zion, ni mibahi Yerusalɛm maŋ lɛ mli, ni abaatsɛ Yerusalɛm akɛ anɔkwale maŋ, kɛ Yehowa Taiatsɛ lɛ gɔŋ lɛ hu akɛ, ‘Krɔŋkrɔŋ.’

⁴ Yehowa Taiatsɛ lɛ tee nɔ ekɛɛ akɛ, hiimeji kɛ yeimeji ni amɛteŋ mɔ fɛɛ mɔ hiɛ dɛhiɛmɔtso yɛ egbɔlɛ hewɔ baatara Yerusalɛm blohuiaŋ ekoŋŋ;

⁵ Ni maŋ lɛ mli blohuiaŋ aaayimɔ tɔ kɛ gbekɛbii hii kɛ gbekɛbii yei ni miishwɛ.

⁶ Kɛji gbalɛ nɛɛ yɛ naakpɛɛ yɛ mɛi ni eshwɛ bei nɛɛ amli yɛ maŋ nɛɛ mli lɛ ahiɛ lɛ, ani mi hu eeefee naakpɛɛ yɛ mihiɛ lo? Yehowa Taiatsɛ lɛ kɛɛ.

⁷ Bɔ ni Yehowa, Taiatsɛ lɛ, kɛɛ nɛ, naa, mibahere mimaŋbii lɛ ayiwala kɛaajɛ bokã kɛ anai shikpɔji lɛ fɛɛ anɔ;

⁸ ni mikɛ amɛ aaaba koni amɛbahi Yerusalɛm maŋ lɛ mli, ni amɛaatsɔ̃ mimaŋ, ni matsɔ amɛNyɔŋmɔ yɛ anɔkwale kɛ jalɛ mli.” Bɔ ni Yehowa, Taiatsɛ lɛ, kɛɛ nɛ,

⁹ “Nyɛ mɛi ni nyɛnuɔ gbalɛ wiemɔi nɛɛ yɛ nɛkɛ bei nɛɛ amli yɛ gbalɔi lɛ anaa kɛjɛ be ni ato Yehowa, Taiatsɛ lɛ, Sɔlemɔ we lɛ maa shishi nɛɛ lɛ, nyɛnijiaŋ akajea wui bɔ ni afee ni anyɛ Sɔlemɔtsu lɛ ama.

¹⁰ Ejaakɛ be ni nakai be lɛ shɛko lɛ gbɔmɔ nitsumɔ feɔ yaka, ni kooloo nitsumɔ hu feɔ yaka, ni mɔ ni jeɔ kpo loo ebaa mli lɛ naaa hejɔlɛ yɛ haolɔ lɛ hewɔ, ejaakɛ mihã mɔ fɛɛ mɔ ete shi ewo enaanyo.

¹¹ Shi agbɛnɛ mikɛ mɛi ni eshwɛ nɛɛ yeŋ kɛ joomɔ tamɔ mifee tsutsu bii lɛ.” Yehowa, Taiatsɛ lɛ, kɛɛ.

¹² “Ejaakɛ aaadu nii yɛ toiŋjɔlɛ mli, waintsei lɛ aaawo yibii, ni shikpɔŋ lɛ aaaba nii, bɔ aaajɛ ŋwɛi anyɔ ashwie nɔ, ni mibahã enɛɛmɛi fɛɛ atsɔ̃ maŋ lɛ mli mɛi ni eshwɛ lɛ anɔ.

¹³ Naa, Yuda we kɛ Israel we, bɔ ni atsɔ̃ɔ nyɛ gbɛ akɛ majimaji, ni amɛkɛ nyɛgbɛi lomɔ lɛ, nakai nɔŋŋ mahere nyɛyiwala, ni nyɛaatsɔ̃ jɔɔmɔ ni akɛ nyɛgbɛi baajɔɔ. Nyɛkashea gbeyei, shi moŋ nyɛwajea nyɛhe ni nyɛfea ekãa kɛkɛ.”

¹⁴ Ejaakɛ bɔ ni Yehowa Taiatsɛ lɛ, kɛɛ nɛ, “Bɔ ni mito miyiŋ ni mafee nyɛ efɔŋ ni mishwaŋ mihe be ni nyɛtsɛmɛi lɛ wo mi mlifu lɛ,

¹⁵ nakai mito miyiŋ bei nɛɛ amli akɛ mibafee Yerusalɛm kɛ Yuda we ejurɔ. Hewɔ lɛ nyɛkashea gbeyei.

¹⁶ Nyɛfea nibii nɛɛ: nyɛteŋ mɔ fɛɛ mɔ kɛ enaanyo awiea anɔkwale; asaŋ nyɛyea jalɛ sane yɛ nyɛkoii ashi bɔ ni baahã toiŋjɔlɛ aba.

¹⁷ Nyɛteŋ mɔ ko mɔ ko akabɛ enaanyo ewo emli. Nyɛkasumɔa amale kitãkãmɔ; ejaakɛ enɛɛmɛi ji nibii ni minyɛɔ. Mi, Yehowa mikɛɛ.”

¹⁸ Ni Yehowa, Taiatsɛ lɛ, kɛ mi wie ekoŋŋ ekɛɛ akɛ, Bɔ ni, Yehowa, Taiatsɛ lɛ, mikɛɔ nɛ,

¹⁹ “Ŋmãa ni nyɛhiɔ yɛ nyɔŋ ni ji ejwɛ lɛ nɔ, kɛ nyɔŋ ni ji enumɔ lɛ nɔ, kɛ nyɔŋ ni ji kpawo lɛ nɔ, kɛ nyɔŋ ni ji nyɔŋma lɛ nɔ lɛ baatsɔ̃ nyamɔ kɛ miishɛɛ kɛ mliflimɔ gbii juji ahã Yudabii. No hewɔ lɛ, nyɛsumɔa anɔkwale kɛ toiŋjɔlɛ.”

²⁰ Bɔ ni Yehowa, Taiatsɛ lɛ, kɛɛ ekoŋŋ nɛ, “Mɛi aaakã he ajɛ majimaji babaoo anɔ aba.

²¹ Ni maŋ kome mli bii aaaya maŋ kroko mli ayakɛɛ akɛ, ‘Nyɛhãa wɔyaa wɔyakpaa Yehowa fai, ni asaŋ wɔyatao esɛɛ gbɛ hu. Mi hu maya.’

²² Mɛi babaoo kɛ majimaji ni ahe wa tete aaba Yerusalɛm abatao Yehowa Taiatsɛ lɛ, sɛɛgbɛ ni amɛaakpa lɛ fai.”

²³ Bɔ ni Yehowa, Taiatsɛ lɛ kɛɛ ekoŋŋ nɛ, “Nakai be lɛ mli lɛ mɛi nyɔŋma ni jɛ majimaji ni wieɔ wiemɔi srɔtoi anɔ baamɔ Yudanyo kome atade mli, ni amɛaakɛɛ lɛ akɛ, ‘Ha wɔkɛ bo aya, ejaakɛ wɔnu akɛ Nyɔŋmɔ kɛ nyɛ yɛ.’ ”