Zakaria 7 - ŊMALƐ KRƆŊKRƆŊ LƐ

¹ Maŋtsɛ Dario yinɔ afi ni ji ejwɛ lɛ nɔ nyɔŋ ni ji nɛɛhu, ni ji Kislev nyɔŋ, lɛ nɔ gbi ni ji ejwɛ lɛ nɔ lɛ, Yehowa kɛ Zakaria wie.

² No mli lɛ Betelbii lɛ etsu Sharezer kɛ Regem-Melek kɛ amɛmɛi kɛba Yehowa Sɔlemɔ we lɛ koni amɛbasɔle amɛkpa fai.

³ Asaŋ koni amɛbi osɔfoi lɛ kɛ gbalɔi lɛ akɛ, “Ani wɔfo ni wɔhi ŋmãa yɛ nyɔŋ ni ji enumɔ lɛ hu nɔ tamɔ wɔfeɔ yɛ afii babaoo ni eho lɛ amli lɛ lo?”

⁴ Kɛkɛ ni Yehowa Taiatsɛ lɛ, kɛɛ mi akɛ,

⁵ “Bi shikpɔŋ muu lɛ nɔ bii lɛ kɛ osɔfoi lɛ akɛ, be ni nyɛhi ŋmãa ni nyɛye ŋkɔmɔ yɛ nyɔŋ ni ji enumɔ lɛ nɔ kɛ nyɔŋ ni ji kpawo lɛ hu nɔ, yɛ afi nyɔŋmai kpawo nɛɛ mli lɛ, ani mi, Yehowa nyɛhi ŋmãa lɛ nyɛhã lo?

⁶ Be ni nyɛye nii ni nyɛnu nii lɛ, ani jeee nyɛ diɛŋtsɛ nyɛhe nyɛye nii ni nyɛnu nii nyɛhã lɛ?”

⁷ Be ni mɛi yɔɔ Yerusalɛm ni ekɛ emaji kɛ eshikpɔji ni bɔle ehe lɛ shwereɔ lɛ, be mli ni mɛi yɔɔ wuoyigbɛ kɛ ŋa nɔ gbɛ shikpɔji lɛ anɔ lɛ, ani jeee nɛkɛ wiemɔi nɔŋŋ Yehowa hã ashiɛ kɛtsɔ̃ eklɛŋklɛŋ gbalɔi lɛ anɔ ahã amɛ lo?

⁸ Kɛkɛ ni Yehowa kɛ Zakaria wie ni ekɛɛ akɛ,

⁹ “Bɔ ni Yehowa, Taiatsɛ, lɛ kɛɛ nɛ, ‘Nyɛkojoa yɛ jalɛ naa, ni nyɛkɛ musuŋtsɔlɛ kɛ mɔbɔnalɛ ahia shi akɛ nyɛmimɛi.

¹⁰ Nyɛkawaa okulafo loo awusa loo gbɔ loo ohiafo yi. Ni nyɛteŋ mɔ ko mɔ ko akasusu enyɛmi he efɔŋ ko yɛ emli.’

¹¹ “Shi moŋ mimaŋ lɛ waje amɛtsui ni amɛkɛ kuɛŋtilɛ booo toi; amɛtsimɔ amɛtoii koni amɛkanu wiemɔ lɛ.

¹² Amɛkpliŋ amɛtsui koni amɛkabo mla lɛ kɛ wiemɔ ni Yehowa, Taiatsɛ lɛ, kɛtsɔ̃ emumɔ lɛ nɔ ekɛtsu eklɛŋklɛŋ gbalɔi lɛ ni eŋɔ hã lɛ toi. No hewɔ ni Yehowa, Taiatsɛ lɛ mlifu amɛ naakpa lɛ.

¹³ Akɛni mitsɛ amɛ shi amɛfooo mli lɛ, no hewɔ ni amɛbolɔ amɛtsɛ mi ni mi hu mibooo amɛ toi lɛ. Bɔ ni Yehowa Taiatsɛ, lɛ kɛɛ nɛ.

¹⁴ Ni no hã mi kɛ lasuogbele gbɛ amɛshwã kɛtee majiasɛɛ hei ni amɛleee lɛ, ni shikpɔŋ ni amɛshi nɔ lɛ tsɔ̃ amaŋfɔ̃ yɛ amɛsɛɛ bɔ ni mɔ ko eyaaa mli, ni mɔ ko ejeee mli hu lɛ. Amɛshikpɔŋ fɛɛfɛo lɛ tsɔ̃ amaŋfɔ̃.”