Zakaria 6 - ŊMALƐ KRƆŊKRƆŊ LƐ

Tayaa shwiilii ejwɛ lɛ ahe ninaa

¹ Misaa miwo mihiɛ nɔ ni mina tayaa shwiilii ejwɛ komɛi fã kpo kɛjɛ akɔɔble gɔji enyɔ komɛi ateŋ kɛba.

² Klɛŋklɛŋ tayaa shwiili lɛ okpɔŋɔi tsuji ni gbalaa; ni shwiili ni ji enyɔ lɛ okpɔŋɔi diji ni gbalaa;

³ shwiili ni ji etɛ̃ lɛ okpɔŋɔi yɛji ni gbalaa; ni nɔ ni ji ejwɛ lɛ okpɔŋɔi truntrãi ni he wa gbalaa.

⁴ Kɛkɛ ni mibi bɔfo lɛ ni kɛ mi wieɔ lɛ akɛ, “MiNuŋtsɔ, mɛni ji enɛɛmɛi nɛɛ?”

⁵ Bɔfo lɛ hã mi hetoo ekɛɛ akɛ, “Enɛɛmɛi damɔ shi hã ŋwɛi kɔɔyɔi ejwɛ lɛ. Amɛmiiya amɛkɛ amɛhe ayatsɔ̃ɔ jeŋ fɛɛ Nuŋtsɔ lɛ, koni no sɛɛ lɛ amɛya ŋwɛi kɔɔyɔi ejwɛ lɛ aŋɔɔ.”

⁶ Tayaa shwiili lɛ ni okpɔŋɔi diji lɛ gbalaa lɛ miiya kooyigbɛ shikpɔŋ lɛ nɔ; nɔ ni okpɔŋɔi yɛji lɛ gbalaa lɛ miiya anaigbɛ shikpɔŋ lɛ nɔ; ni nɔ ni okpɔŋɔi truntrãi lɛ gbalaa lɛ miiya wuoyigbɛ shikpɔŋ lɛ nɔ.

⁷ Shi be ni okpɔŋɔi tsuji ni he wa lɛ fã kpo lɛ, amɛhe tswa shi koni amɛyakpa shikpɔŋ lɛ nɔ. Kɛkɛ ni bɔfo lɛ fã amɛ ekɛɛ akɛ, “Nyɛyakpaa shi yɛ shikpɔŋ lɛ nɔ.” No hewɔ lɛ, amɛtee amɛyakpa shikpɔŋ lɛ nɔ fɛɛ.

⁸ Agbɛnɛ bɔfo lɛ kɛɛ mi akɛ, “Naa, okpɔŋɔi ni yaa kooyigbɛ shikpɔŋ lɛ nɔ lɛ ejɔɔ mi, Yehowa, mitsui he yɛ nakai kooyigbɛ shikpɔŋ lɛ gbɛfaŋ.”

Afã akɛ abu Yoshua akekre

⁹ Yehowa kɛ mi wie ni ekɛɛ mi akɛ,

¹⁰ “Ŋɔɔ jwiɛtɛi nibii kɛ shika nibii hu ni nomii lɛ ni ji Heldai kɛ Tobia kɛ Yedaia kɛjɛ Babilon kɛbake lɛ, ni okɛya Zefania bi Yosia we lɛ gbi lɛ nɔŋŋ.

¹¹ Okɛ jwiɛtɛi kɛ shika ni oŋɔ yɛ amɛdɛŋ lɛ afee maŋtsɛ fai ni okɛbu Yehozadak bi Yoshua, ni ji osɔfonukpa lɛ.

¹² No sɛɛ lɛ, okɛɛ lɛ akɛ bɔ ni Yehowa, Taiatsɛ lɛ kɛɛ nɛ, ‘Naa, nuu lɛ ni egbɛi ji Tsonine lɛ, ebaada yɛ enajiaŋ, ni lɛ ebaama Yehowa Sɔlemɔ we lɛ.

¹³ Lɛ ji mɔ ni ebaama Yehowa Sɔlemɔ we lɛ, ni abaawo ehiɛ nyam akɛ lumɔ, ni ebaata emaŋtsɛ sɛi lɛ nɔ kɛye elumɔ lɛ. Osɔfo ko hu baahi emaŋtsɛ sɛi lɛ he, ni shishinumɔ kɛ toiŋjɔlɛ baahi amɛyi enyɔ lɛ fɛɛ amɛteŋ.’

¹⁴ Ato nɛkɛ maŋtsɛ fai nɛɛ yɛ Yehowa Sɔlemɔ we lɛ mli, koni akɛkai Heldai kɛ Tobia kɛ Yedaia kɛ Yosia ni ji Zefania bi lɛ.”

¹⁵ Mɛi baajɛ maji asɛɛ shɔŋŋ abaye abua kɛma Yehowa Sɔlemɔ we lɛ. No nyɛkɛaale akɛ Yehowa, Taiatsɛ lɛ, ni tsu mi nyɛŋɔɔ nɛɛ. Kɛji nyɛaabo Yehowa, nyɛNyɔŋmɔ lɛ, toi lɛɛlɛŋ lɛ, enɛ aaaba mli ahã nyɛ.