Zakaria 4 - ŊMALƐ KRƆŊKRƆŊ LƐ

Kanetso lɛ he Ninaa

¹ Bɔfo ni kɛ mi wieɔ lɛ batsiɛ mi ekoŋŋ tamɔ atsiɛɔ mɔ yɛ ewɔ mli.

² Ni ebi mi akɛ, “Mɛni onaa nɛɛ?” Mihã hetoo akɛ, “Miina kanetso ni akɛ shika sɔŋŋ fee; ni emutɔ ko ma eyiteŋ. Kanetso nɛɛ yɛ kanei kpawo mamɔ eyiteŋ; ni kanei nɛɛ, eko fɛɛ eko hu yɛ odontii kpawo ni asuɔ.

³ Asaŋ mutsei enyɔ mamɔ kanetso lɛ masɛi; ekome yɛ mutɔ lɛ ninejurɔ nɔ, ni ekome hu yɛ ebɛku nɔ.”

⁴ Agbɛnɛ mibi bɔfo ni kɛ mi wieɔ lɛ akɛ, “Minuŋtsɔ, mɛni ji enɛɛmɛi nɛɛ?”

⁵ Bɔfo lɛ bi mi akɛ, “Ani oleee nɔ ni nibii nɛɛ ji?” Ni mikɛɛ, “MiNuŋtsɔ, dabida.”

Shi ni Nyɔŋmɔ wo Zerubabel

⁶ Bɔfo lɛ kɛɛ mi akɛ, “Shɛɛ ni Yehowa kɛhãa Zerubabel nɛ, ‘Jeee onyɛmɔ baahã oye kunim, loo ohewalɛ kɛkɛ, shi moŋ mimumɔ lɛ ni baahã oye kunim,’ Mi Yehowa, mikɛɛ.”

⁷ Shi bo gɔŋ kpeteŋkple, mɛni mli oyɔɔ? Obaatsɔ ŋa kplanaa yɛ Zerubabel hiɛ. Ebaakɔ oyiteŋ tɛ lɛ diɛŋtsɛ kɛba, ni aaabɔ oshe kɛaaba akɛ, “Dromɔ, dromɔ naa sɔŋŋ kɛkɛ.”

⁸ Yehowa saa ekɛ mi wie ekoŋŋ ni ekɛɛ mi akɛ,

⁹ “Zerubabel eto shĩa nɛɛ shishi, ni ebaatswa egbe naa hu. No nyɛkɛaale akɛ Yehowa, Taiatsɛ lɛ, ni tsu mi nyɛŋɔɔ lɛ.

¹⁰ Mɔ fɛɛ mɔ ni gbe nitsumɔ lɛ ni eyaaa nɔ lɛ he guɔ lɛ baana Zerubabel ni ehiɛ tsumalɔi akulomulo lɛ yɛ edɛŋ ekɛ miitswa Sɔlemɔ we lɛ, ni amɛbaanya. Kanetsei kpawo nɛɛ ji Yehowa hiŋmɛii ni ekɛkwɛɔ jeŋ muu lɛ fɛɛ lɛ.”

¹¹ Agbɛnɛ mibi bɔfo lɛ akɛ, “Mɛni ji mutsei enyɔ lɛ ni yɔɔ kanetso lɛ ninejurɔ kɛ abɛku lɛ?

¹² Misaa mibi lɛ nɔ ni ji shii enyɔ nɔ akɛ, te mutsei enyɔ ni yɔɔ shika bɛji enyɔ lɛ ni mu hoɔ yɛ mli lɛ ashishi hu?”

¹³ Bɔfo lɛ bi mi akɛ, “Ani oleee enɛɛmɛi ashishi?” Mihã hetoo akɛ, “MiNuŋtsɔ Dabida.”

¹⁴ Kɛkɛ ni ekɛɛ mi akɛ, “Nibii nɛɛ damɔ shi hã mɛi enyɔ ni ahala amɛ, ni afɔ amɛ mu koni amɛsɔmɔ Yehowa mɔ ni ji jeŋ fɛɛ Nuŋtsɔ lɛ.”