Zakaria 3 - ŊMALƐ KRƆŊKRƆŊ LƐ

Gbalɔ lɛ ninaa yɛ osɔfonukpa lɛ he

¹ Agbɛnɛ ehã mina Yoshua ni ji osɔfonukpa lɛ ni edamɔ Yehowa bɔfo lɛ hiɛ, ni satan hu damɔ Yoshua ninejurɔ ni ebaafolɔ enaa.

² Ni Yehowa bɔfo lɛ kɛɛ Satan akɛ, “Satan, Yehowa akã ohiɛ. Yehowa mɔ ni eŋɔ Yerusalɛm akɛ enɔ lɛ aaakã ohiɛ. Ani oleee akɛ latso ni afã yɛ la naa ji mɔ nɛ?”

³ No mli lɛ Yoshua wo atadei mujimuji kɛdamɔ bɔfo lɛ hiɛ.

⁴ Kɛkɛ ni bɔfo lɛ fã mɛi ni damɔ ehiɛ lɛ ekɛɛ, “Nyɛjiea atadei mujimuji lɛ yɛ ehe.” Kɛkɛ ni ekɛɛ Yoshua hu akɛ, “Bɔ ni ajie ohe atadei nɛɛ lɛ, nakai ajie ohe eshai lɛ ashwie, ni mawula bo kɛ atadei ni jara wa.”

⁵ Ni mikɛɛ akɛ, “Akɛ fai ni he tse abu lɛ.” No hewɔ lɛ, amɛkɛ fai ni he tse bu lɛ, ni amɛwula lɛ kɛ atadei. Ni Yehowa bɔfo lɛ damɔ shi yɛ jɛi.

⁶ Agbɛnɛ Yehowa bɔfo lɛ kɛɛ Yoshua akɛ,

⁷ “Bɔ ni Yehowa Taiatsɛ lɛ kɛɛ nɛ, ‘Kɛji oooba ojeŋ bɔ ni mitaoɔ, ni oooye mimlai ni miwo lɛ anɔ lɛ, no lɛ bo obaakwɛ misɔlemɔ we lɛ kɛ ehe kpoi lɛ anɔ. Asaŋ mahã bo hegbɛ ni ofata mimɛi ni damɔɔ biɛ lɛ ahe.

⁸ Agbɛnɛ, bo osɔfonukpa Yoshua, bo toi, bo kɛ onanemɛi osɔfoi krokomɛi ni yɔɔ oshishi lɛ fɛɛ. Mɛi nɛɛ ji shade ni baaba lɛ he okadi lɛ. Naa, mibawo mitsulɔ, ni atsɛɔ lɛ Tsonine, gbɛ kɛba.

⁹ Asaŋ mikɛ tɛ koome ni yɛ hiɛi kpawo ema Yoshua hiɛ, ni makpɛ niŋmaa yɛ nakai tɛ lɛ nɔ, Yehowa Taiatsɛ lɛ kɛɛ. Ni mikɛ gbi kome baagbe shikpɔŋ lɛ tɔ̃mɔ fɛɛ.

¹⁰ Nakai gbi lɛ nɔ lɛ nyɛteŋ mɔ fɛɛ mɔ aaakpee enaanyo kɛaaba ewaintso kɛ agbãmitso shishi, Yehowa kɛɛ.’ ”