Zakaria 13 - ŊMALƐ KRƆŊKRƆŊ LƐ

¹ “Nakai gbi lɛ nɔ lɛ abaagbele nu hiŋmɛi naa ahã David we lɛ kɛ mɛi ni yɔɔ Yerusalɛm lɛ, koni akɛfɔ amɛhe eshai kɛ amɛhe muji ashwie.”

² Yehowa, Taiatsɛ lɛ tee nɔ ekɛɛ akɛ, “Nakai gbi lɛ nɔ lɛ mibagbe wɔji lɛ agbɛii kwraa yɛ shikpɔŋ lɛ nɔ, bɔ ni afee ni akakai amɛ dɔŋŋ; nakai nɔŋŋ majie gbalɔi lɛ kɛ mumɔi ni ahe tseee lɛ hu kɛje shikpɔŋ lɛ nɔ.

³ Ni kɛji mɔ ko aaaba ekoŋŋ akɛ gbalɔ ji lɛ lɛ, etsɛ kɛ enyɛ ni fɔ lɛ tete aaakɛɛ lɛ akɛ, ‘Gbalɔ amalelɔ ji bo, ni osa gbele, ejaakɛ oomale yɛ Yehowa gbɛi mli.’ Ni kɛji ekã he eegba lolo lɛ etsɛ kɛ enyɛ ni fɔ lɛ lɛ baatsu lɛ nɔ̃, koni amɛgbe lɛ.

⁴ Nakai be lɛ mli lɛ gbalɔ fɛɛ gbalɔ hiɛ baagbo yɛ eninaa ni egba lɛ hewɔ, ni ewoŋ gbalɔi atade kɛ ehiɛ fɛŋfɛŋ ni amɛwoɔ kɛshishiuɔ mɛi lɛ dɔŋŋ.

⁵ Shi moŋ nɔ ni ebaakɛɛ ji akɛ, ‘Jeee gbalɔ ji mi, okwaafonyo ji mi, mibɔ̃i humɔ kɛjɛ miblahiaŋ tɔ̃ɔ.’

⁶ Ni kɛji mɔ ko bi lɛ akɛ, ‘Mɛni faji anaa yɔɔ osɛɛ nɛɛ lɛ?’ Eeehã hetoo akɛ, ‘Minanemɛi ni pila mi nɛɛ.’ ”

⁷ Yehowa Taiatsɛ lɛ kɛɛ ekoŋŋ akɛ, “Bo klante, wo ohe nɔ owo mitookwɛlɔ lɛ, mɔ ni ji misɛɛ mɔ lɛ, koni toi lɛ agbɛ ashwã. Mawo minine nɔ yɛ too bibiibii tete anɔ ni maplenee amɛ.

⁸ Aaakpãtã mɛi ni yɔɔ shikpɔŋ lɛ nɔ lɛ amlijaa etɛ̃ mli enyɔ hiɛ, ni amɛaagboi; ni mlijaa etɛ̃ mli ekome ni aaashwɛ lɛ yi aaana wala.

⁹ Nɛkɛ mlijaa etɛ̃ mli ekome ni aaashwɛ nɛɛ lɛ, mikɛ amɛ baawo la mli ni matsuu amɛhe, tamɔ akɛ la tsuɔ jwiɛtɛi he; makpa amɛ shi makwɛ tamɔ akpaa shika shi akwɛɔ lɛ. Amɛaasɔle kɛtsɛ mi, ni mahere amɛ nɔ. Makɛɛ akɛ, ‘Mimɛi ji amɛ,’ ni amɛ hu amɛaakɛɛ akɛ, ‘Yehowa ji wɔNyɔŋmɔ.’ Mi Yehowa, Taiatsɛ, mikɛɛ.”