Zakaria 12 - ŊMALƐ KRƆŊKRƆŊ LƐ

Yerusalɛm kpɔ̃mɔ̃ ni baaba lɛ

¹ Wiemɔ ni Yehowa wie yɛ Israel he lɛ nɛ. Bɔ ni Yehowa mɔ ni bɔ ŋwɛi ni ha shi nɛɛ, ni bɔ shikpɔŋ lɛ, ni ebɔ mumɔ ni yɔɔ gbɔmɔ mli lɛ kɛɛ nɛ,

² “Naa, mahã Yerusalɛm atsɔ̃ tamɔ dãa yɛ kpulu mli mahã maji ni bɔle lɛ lɛ. Mɔ fɛɛ mɔ ni aaabasa enaa ekwɛ lɛ aaadidãa tamɔ dãatɔlɔ. Kɛji maŋ ko fã ta basa Yerusalɛm yi lɛ, belɛ ekɛ ta lɛ etua Yuda shikpɔŋ lɛ fɛɛ hu.

³ Nakai be lɛ mli lɛ mahã Yerusalɛm atsɔ̃ tɛ ni tsii mahã maji ni bɔle lɛ lɛ. Maŋ fɛɛ maŋ ni aaaka tɛ nɛɛ nɔ womɔ lɛ aaapila. Ni shikpɔŋ lɛ nɔ majimaji krokomɛi fɛɛ aaafee ekome amɛte shi amɛwo Yerusalɛm.

⁴ Nakai be lɛ mli lɛ mahã henyɛlɔi lɛ akpoŋɔi fɛɛ ajijaa, ni okpɔŋɔnɔtalɔi lɛ hu aye sɛkɛ. Shi be ni mashwila henyɛlɔi lɛ okpɔŋɔi lɛ ahiŋmɛii lɛ mahã mihiŋmɛii akã Yudabii lɛ ahe. Mi Yehowa, mi, mikɛɛ.

⁵ Kɛkɛ lɛ Yuda akutsei lɛ baakɛɛkɛɛ amɛhe akɛ, ‘Yerusalɛmbii lɛ ahewalɛ lɛ Yehowa, Taiatsɛ, ni ji amɛNyɔŋmɔ lɛ dɛŋ ejɛ.’

⁶ “Nakai be lɛ mli lɛ, mahã Yuda akutsei lɛ atsɔ̃ tamɔ la kɛ ŋɛsu yɛ laii ateŋ; amɛaatamɔ jatɛŋ ni tsoɔ ni shãa abelebaa gbiŋ; ni amɛaakpãtã maji krokomɛi ni yɔɔ amɛninejurɔ kɛ amɛbɛku gbɛ lɛ fɛɛ ahiɛ. Yerusalɛmbii aaafee shweshweeshwe yɛ Yerusalɛm.

⁷ “Yehowa baahã Yuda akutso lɛ mli tabilɔi tsutsu aye amɛhenyɛlɔi lɛ anɔ kunim, bɔ ni afee ni hiɛ akasɔ David shwiei lɛ, kɛ Yerusalɛmbii lɛ hu akunim ni amɛye lɛ fe kunim ni Yudabii baaye lɛ.

⁸ Nakai gbi lɛ nɔ lɛ Yehowa kɛ tsɛŋ ko aaabu Yerusalɛmbii lɛ ahe, ni mɔ ni he waaa kwraa yɛ amɛteŋ he aaawa tamɔ David; ni David shwiei lɛ aaatsɔ̃ tamɔ Nyɔŋmɔ; amɛaatamɔ Yehowa bɔfo ni nyiɛ amɛhiɛ lɛ.

⁹ Nakai gbi lɛ nɔ lɛ maji fɛɛ ni aaate shi awo Yerusalɛm lɛ makpãtã amɛhiɛ.

¹⁰ “Mafɔse mimɔbɔnalɛ kɛ sɔlemɔ mumɔ mashwie David shwiei lɛ kɛ Yerusalɛm maŋbii lɛ anɔ bɔ ni kɛ amɛna mɔ ko ni amɛye lɛ awui ko lɛ, amɛaaye mɔ lɛ ŋkɔmɔ tamɔ ayeɔ bi koome ni egbo he ŋkɔmɔ; ni amɛaafo lɛ kɛ mlishãlɛ tamɔ afoɔ kromɔbi ni egbo.

¹¹ Nakai gbi lɛ nɔ lɛ yara ni abaawo yɛ Yerusalɛm lɛ baatamɔ yara ni awo kɛfo Hadad-Rimmon yɛ Megido ŋa lɛ nɔ lɛ.

¹² Ni shikpɔŋ lɛ nɔ bii lɛ baawo yara wekuiaŋwekuiaŋ. Davidwe lɛ baawo yara lɛ enɔ aŋkro ni amɛŋamɛi lɛ hu bawo yara amɛnɔ aŋkro; Nakai nɔŋŋ Natanwe lɛ baawo yara amɛnɔ aŋkro ni amɛŋamɛi lɛ hu baawo yara amɛnɔ aŋkro.

¹³ Leviwe lɛ baawo yara amɛnɔ aŋkro, ni amɛŋamɛi lɛ hu baawo yara amɛnɔ aŋkro. Shimeiwe lɛ baawo yara amɛnɔ aŋkro, ni amɛŋamɛi lɛ hu baawo yara amɛnɔ aŋkro.

¹⁴ Ni wekui krokomɛi fɛɛ ni eshwɛ lɛ baawo amɛyara aŋkroaŋkro, ni amɛŋamɛi lɛ hu baawo amɛnɔ aŋkroaŋkro.”