Zakaria 11 - ŊMALƐ KRƆŊKRƆŊ LƐ

Yiwalɔi lɛ ashigbeemɔ

¹ “Ao, Lebanon, gbelemɔ oshinai lɛ, koni la ashã otsenedrui lɛ.

² Ao, sɛsɛo, wo yara ni ofo, ejaakɛ tsenedru lɛ eku egbee shi; ejaakɛ tsei ni yɔɔ nyam lɛ ahiɛ ekpãtã. Bashan odum, wo yara nyɛfoa, ejaakɛ agba koo haii lɛ tete.

³ Bo toi, tookwɛlɔi lɛ ewo yara. Bo toi, jatai miihuu, Naa, Yordan he koo lɛ hiɛ ekpãtã. ejaakɛ amɛnunyam sɛɛ efo.

Tookwɛlɔi enyɔ lɛ

⁴ Bɔ ni Yehowa, miNyɔŋmɔ lɛ kɛɛ nɛ, “Feemɔ ohe tamɔ tookwɛlɔ ni kwɛɔ tooku ni ayaagbe amɛ.

⁵ Mɛni hewɔ tookwɛlɔi lɛ gbeɔ toi nɛɛ ni agbalaaa amɛ toi. Mɛi ni hɔ̃ɔ toi nɛɛ hu kɛɔ akɛ, ‘Ajie Yehowa yi ejaakɛ wɔtsɔmɔ niiatsɛmɛi.’ Ni amɛkwɛlɔi lɛ tete po enaaa kooloi lɛ amɔbɔ.”

⁶ “No hewɔ lɛ, minaŋ mɔ ko mɔ ko mɔbɔ dɔŋŋ yɛ shikpɔŋ nɛɛ nɔ; naa, maŋmɛɛ mɔ fɛɛ mɔ he mawo enɔkwɛlɔ kɛ emaŋtsɛ hu dɛŋ. Ni nɔkwɛlɔi nɛɛ baakpãtã shikpɔŋ lɛ hiɛ ni mihereŋ mɔ ko mɔ ko yiwala.

⁷ “Hewɔ lɛ mitsɔ̃ toi ni abaagbe ahã tookwɛlɔi nɛɛ akwɛlɔ. Mikɔlɔ kplamɔtsei enyɔ. Miwo ekome gbɛi akɛ, ‘Dromɔ’ kɛ ekome hu akɛ, ‘Ekomefeemɔ!’ Nomɛi mikɛkpalaa tooku lɛ.

⁸ Mikpãtã tookwɛlɔi etɛ̃ ahiɛ yɛ nyɔŋ kome mli, ejaakɛ minaaa amɛhe tsui, ni amɛ hu amɛnyaŋe mi.

⁹ No hewɔ ni mikɛɛ akɛ mifeŋ nyɛkwɛlɔ dɔŋŋ lɛ. Too ni baagbo lɛ, egbo, nɔ ni hiɛ baakpãtã hu, ehiɛ akpãtã; ni nɔ ni aaashwɛ lɛ, amɛyeyee amɛ diɛŋtsɛ amɛnyɛmimɛi aloo.”

¹⁰ Kɛkɛ ni mikɔ mikplamɔtso ni gbɛi ji ‘Dromɔ’ lɛ, ni miku mli, ni mikɛku kpãŋmɔ ni mikɛ miwebii lɛ ekpãŋ lɛ mli.

¹¹ Hewɔ lɛ aku kpãŋmɔ lɛ mli nakai gbi lɛ nɔŋŋ. Ni too jarayelɔi lɛ ni kwɛɔ mi lɛ nu shishi akɛ Yehowa wiemɔ naanii ni.

¹² Agbɛnɛ mikɛɛ jarayelɔi lɛ akɛ, “Kɛji esa nyɛhiɛ lɛ no lɛ nyɛwoa mi nyɔmɔ; shi kɛji esaaa nyɛhiɛ lɛ, no lɛ nyɔmɔwoo lɛ ahi shi.” Kɛkɛ ni amɛŋmɛ jwiɛtɛi talentai nyɔŋmai etɛ̃ amɛkɛwo mi nyɔmɔ.

¹³ Kɛkɛ ni Yehowa kɛɛ mi akɛ, “Okɛyawo Sɔlemɔ we lɛ fotro lɛ mli.” No hewɔ lɛ, mikɛ jwiɛtɛi talentai nyɔŋmai etɛ̃ ni amɛkɛwo mi nyɔmɔ lɛ yawo Yehowa Sɔlemɔ we lɛ fotro lɛ mli.

¹⁴ Agbɛnɛ miku kplamɔtso ni ji enyɔ lɛ ni gbɛi ji ‘Ekomefeemɔ’ lɛ mli, ni mikɛfo nyɛmimɛi anaanyobɔɔ ni kã Yuda kɛ Israel teŋ lɛ mli.

¹⁵ Agbɛnɛ Yehowa kɛɛ mi akɛ, “kɔlɔmɔ tookwɛlɔ yakagbɔmɔ nitsumɔ nibii ohiɛ,

¹⁶ Shi naa, miitee tookwɛlɔ ko shi yɛ shikpɔŋ lɛ nɔ; lɛ lɛ, jeee ehe sane ko ji too ni miigbo lɛ. Toi ni egbɛ eshwã lɛ ebuaŋ amɛnaa. Nɔ ni epila lɛ, etsaŋ lɛ; ni toi ni yɔɔ hewalɛ lɛ lɛ ehaŋ amɛ niyenii amɛyeŋ; shi moŋ gbe eeegbe toi ni ewowoi fɔ lɛ eye, belɛ eekpɔlɔ amɛnaji ahe koklotoi lɛ eeshwie.

¹⁷ Kpoo hã mitookwɛlɔ yakagbɔmɔ lɛ, mɔ ni shiɔ etooku lɛ; lɛ lɛ, aaafo eninejurɔ yɛ ta mli, ni aaajwa eninejurɔ hiŋmɛi hu yɛ ta mli. Enine agbo kwraa yɛ ehe, ni eninejurɔ hiŋmɛi lɛ hu ashwila kwrakwra.”