Zakaria 10 - ŊMALƐ KRƆŊKRƆŊ LƐ

Yehowa wo kpɔ̃mɔ he shi

¹ Nyɛbia Yehowa koni ehã Agbiɛnaa nu anɛ nyɛ. Nyɛbia Yehowa mɔ ni hãa ahum fãa ni ehãa nu nɛɔ gbɔmɛi kɛ ŋa nɔ tsei fɛɛ anɔ lɛ.

² Nɔ ni amãgãi lɛ kɛɔ lɛ jwɛŋmɔ bɛ mli, ni klamɔfoi lɛ aninaa lɛ apasa sɔŋŋ ni. Mɛi ni tsɔ̃ɔ lamɔi ashishi lɛ maleɔ, ni amɛshɛjeɔ mɔ mii yakatswaa; no hewɔ lɛ, maŋbii lɛ kpaa shi tamɔ toi, amɛnaa nɔ, ejaakɛ amɛbɛ kwɛlɔ.

³ Yehowa kɛɛ akɛ, “Mimli efu tookwɛlɔi ni ji maŋsɛɛ nɔyelɔi lɛ, ni magbala amɛhiɛnyiɛlɔi lɛ atoi; ejaakɛ Yehowa, Taiatsɛ lɛ, jwɛŋɔ etooku ni ji Yudabii lɛ ahe; ni eeehã amɛaatsɔ̃ tamɔ etayaa okpɔŋɔ ni eshwãa efɔ̃ɔ enɔ lɛ.

⁴ Koŋtɛ lɛ aaajɛ Yuda mli, emli nɔŋŋ buu lɛ shiŋmlitso lɛ hu aaajɛ, kɛ tawuu gãitso lɛ kɛ lumɛi srɔtoi fɛɛ hu.

⁵ Yudabii lɛ aaatsɔmɔ kãkãlɔi yɛ ta mli, ni amɛaanaanaa amɛhenyɛlɔi anɔ yɛ blohuiaŋ tamɔ anaa ŋmiamɔ. Amɛbaawu tai ni amɛaahã amɛhenyɛlɔi tabilɔi okpɔŋɔianɔtralɔi ahiɛ ashwie shi, ejaakɛ Yehowa kɛ amɛ yɛ.

⁶ “Mibahã Yuda he awa, ni mahere Israel yiwala. Mikɛ amɛ aaaku sɛɛ kɛba ejaakɛ mimusuŋ etsɔ̃ mi yɛ amɛhe. Amɛaatsɔ̃ tamɔ mɛi ni mikwako amɛ dã, ejaakɛ mi ji Yehowa, amɛNyɔŋmɔ lɛ, ni mabo amɛfaikpamɔ toi.

⁷ Nakai be lɛ Efraim aaatsɔ̃ tamɔ tatsɛ kpaanaa, ni emlibii amli aaafli amɛ tamɔ mɛi ni enu wain. Amɛshwiei aaana nɔ ni Yehowa etsu lɛ; ni amɛmii aaashɛ amɛhe; ni amɛmli aaafli amɛ.

⁸ “Mikɛ okadi aaatsɛ amɛ, ni mabua amɛnaa ejaakɛ mi mikpɔ̃ amɛ, ni amɛyi aaafa ekoŋŋ tamɔ sa.

⁹ Migbɛ amɛ mishwã maŋsɛɛ maji anɔ moŋ; shi kɛ̃lɛ, amɛaakai mi, yɛ hei ni amɛyɔɔ yɛ shɔŋŋ lɛ. Amɛ kɛ amɛbii fɛɛ yi aaana wala, ni amɛaaku amɛsɛɛ amɛaaba ekoŋŋ.

¹⁰ Makpala amɛ kɛjɛ Ijipt kɛba. Mabua amɛnaa kɛjɛ Asiria hu. Mikɛ amɛ aaaba Gilead shikpɔŋ lɛ nɔ, kɛ Lebanon shikpɔŋ lɛ hu nɔ kɛyaashi anaŋ gbɛ yɛ shikpɔji lɛ anɔ ahã amɛ.

¹¹ Amɛbaafo amanehulu ŋshɔ lɛ, mahã ŋshɔkei lɛ aŋmɛ dɛŋŋ. Nilo Faa lɛ fɛɛ kwa baagbi. Abaaba Asiria hetsɛmɔ lɛ shi, ni Ijipt hewalɛ lɛ sɛɛ baafo.

¹² Mawo amɛ hewalɛ lɛ yɛ Yehowa mli, ni amɛbaanya yɛ egbɛi mli. Mi, Yehowa, mi mikɛɛ.”