Yuda 1 - ŊMALƐ KRƆŊKRƆŊ LƐ

¹ Yuda, ni ji Yesu Kristo tsulɔ kɛ Yakobo nyɛmi lɛ; ŋma yahã mɛi ni atsɛ amɛ ni afee amɛ krɔŋkrɔŋ yɛ Tsɛ Nyɔŋmɔ lɛ mli ni akɛ amɛ eto ahã Yesu Kristo lɛ.

² Mɔbɔnalɛ kɛ hejɔlɛ kɛ suɔmɔ afa kɛya nɔ ahã nyɛ!

Amaletsɔ̃ɔlɔi

³ Suɔmɔmɛi, be ni misaa mihe kɛ mɔdɛŋbɔɔ diɛŋtsɛ akɛ maŋma nyɛ yɛ wɔ fɛɛ wɔyiwalaheremɔ lɛ he sane he lɛ, mina akɛ ehe ehia akɛ maŋma ni mikɛwo nyɛ ekãa, koni nyɛpele hemɔkɛyeli ni atu awo krɔŋkrɔŋbii lɛ adɛŋ shi kome lɛ he.

⁴ Ejaakɛ gbɔmɛi komɛi eju shi ebabote wɔteŋ, mɛi ni blema beebe ajɛ aŋma amɛhe sane afɔ̃ shi ahã nɛkɛ kojomɔ nɛɛ, mɛi ni sheee Nyɔŋmɔ gbeyei ni ŋɔɔ wɔNyɔŋmɔ dromɔ lɛ amɛbɔɔ nyɛnyɛŋtswi, ni amɛkwaa Nyɔŋmɔ ni ji nɔyelɔ koome lɛ kɛ wɔNuŋtsɔ Yesu Kristo lɛ.

⁵ Shi miitao akɛ makai nyɛ, nyɛ ni nyɛle enɛ fɛɛ momo lɛ, akɛ Nuŋtsɔ lɛ here maŋ lɛ kɛjɛ Ijipt, shi no sɛɛ lɛ ekpãtã mɛi ni heee yeee lɛ ahiɛ.

⁶ Ni ŋwɛi bɔfoi hu ni ehiɛɛɛ amɛnukpayeli lɛ mli, shi moŋ amɛshi amɛ diɛŋtsɛ amɛshihilɛhe lɛ, ekɛ naanɔ kpãi efimɔ amɛ eto duŋ kpii mli ehã Gbi Wulu lɛ nɔ kojomɔ lɛ.

⁷ Kaimɔ bɔ ni Sodom kɛ Gomora kɛ maji ni jwere amɛhe lɛ, bɔ ni amɛbɔ ajwamãŋ aahu tamɔ mɛnɛɛmɛi nɛɛ nɔŋŋ ni amɛtao ni amɛkɛ bɔfoi lɛ afee efɔŋ lɛ. Enɛ fɛɛ kã shi akɛ okadii hã mɛi fɛɛ ni naa naanɔ la mli nyɔmɔwoo lɛ.

⁸ Nakai nɔŋŋ mɛi ni ju shi bote mli lɛ hu buleɔ heloo lɛ yɛ amɛlamɔi amli, ni amɛbuuu nɔyeli, ni amɛwieɔ anunyamtsɛmɛi ahe wiemɔi fɔ̃ji.

⁹ Shi bɔfonukpa Mikael lɛ, be ni ekɛ abonsam yiyiɔ ni ekɛ lɛ taa naa yɛ Mose gbonyo lɛ he lɛ, ekaaa akɛ eeebu lɛ fɔ ko, shi moŋ ekɛɛ, “Kã Nuŋtsɔ lɛ aaakã ohiɛ!”

¹⁰ Shi mɛnɛɛmɛi lɛ, amɛ lɛ nii fɛɛ ni amɛleee lɛ amɛyeɔ he osheku, shi nii ni amɛle yɛ amɛfɔmɔ su lɛ naa tamɔ kooloi ni bɛ jwɛŋmɔ lɛ, nomɛi nɔŋŋ amɛkɛfiteɔ amɛhe.

¹¹ Kpoo hã amɛ! Ejaakɛ amɛkɔ Kain gbɛ lɛ, ni amɛkɔ shishiumɔ amɛfɔ̃ amɛnɔ tamɔ Bileam yɛ sɛɛnamɔ hewɔ, ni amɛhiɛ ekpãtã yɛ atuatsemɔ mli tamɔ Kora.

¹² Mɛnɛɛmɛi ji mɛi ni woɔ nyɛsuɔmɔ niyenii lɛ ahe muji, ejaakɛ amɛkɛ nyɛ yeɔ nii ni amɛsheee gbeyei. Ni amɛ diɛŋtsɛ amɛhe amɛlɛlɛɔ. Atatui ni nu bɛ amɛmli ni kɔɔyɔɔ kpalaa amɛ kɛbɔleɔ shi ji amɛ. Tsei ni yibiiwoo be mli lɛ amɛwooo yibii, shi amɛgboi shii enyɔ ni afãmɔ amɛ kɛ amɛshishifãi.

¹³ Ŋshɔkei hu ni yɔɔ hamahama ni fɛ̃ɔ amɛ diɛŋtsɛ amɛhiɛgbejianii kɛbaa ŋwɛi tamɔ afũi ji amɛ. Amɛtamɔ ŋulamii dudulɔi, ni asaa duŋ kpii lɛ ato amɛ kɛmiiya naanɔ lɛ.

¹⁴ Mɛnɛɛmɛi ahe ni Henok ni ba yɛ yinɔ ni ji kpawo mli kɛjɛ Adam nɔ lɛ gba yɛ akɛ, “Naa, Nuŋtsɔ lɛ miiba kɛ ekrɔŋkrɔŋbii akpei nyɔŋmanyɔŋmai abɔ

¹⁵ ni ebakojo mɛi fɛɛ, ni ekã mɛi ni sheee Nyɔŋmɔ gbeyei lɛ fɛɛ yɛ amɛnitsumɔ ni Nyɔŋmɔ gbeyeishemɔ bɛ mli fɛɛ kɛ wiemɔi ni wawai fɛɛ ni eshafeelɔi Nyɔŋmɔkwalɔi ewie yɛ ehe lɛ he.”

¹⁶ Mɛnɛɛmɛi ji huhuuhu wielɔi kɛ krɔlɔi ni nɔ esaaa amɛhiɛ, ni nyiɛɔ yɛ amɛ diɛŋtsɛ amɛkɔnɔi anaa, ni amɛnaabu wieɔ naafuu wiemɔi, ni amɛsumɔɔ mɛi ahiɛsaa yɛ sɛɛnamɔ hewɔ.

Kɔkɔbɔi kɛ nitsɔɔmɔi

¹⁷ Shi suɔmɔmɛi, nyɛ lɛ nyɛkaia wiemɔi ni wɔNuŋtsɔ Yesu Kristo bɔfoi lɛ ewie eto momo lɛ.

¹⁸ Amɛkɛɛ nyɛ akɛ, “Naagbee be lɛ mli lɛ, hefɛoyelɔi ni nyiɛɔ yɛ amɛ diɛŋtsɛ amɛkɔnɔi fɔ̃ji lɛ anaa lɛ aaaba.”

¹⁹ Mɛnɛɛmɛi ji mɛi ni kɛ mligbalamɔi baa lɛ, mɛi ni nyiɛɔ yɛ heloo naa ni bɛ mumɔ lɛ.

²⁰ Shi suɔmɔmɛi, nyɛ lɛ nyɛtswaa nyɛhe nyɛmaa nyɛhemɔkɛyeli ni he tse jogbaŋŋ lɛ nɔ, ni nyɛsɔlea yɛ Mumɔ Krɔŋkrɔŋ lɛ mli,

²¹ ni nyɛkwɛa nyɛhe nɔ jogbaŋŋ yɛ Nyɔŋmɔ suɔmɔ lɛ mli, ni nyɛkwɛa wɔNuŋtsɔ Yesu Kristo mɔbɔnalɛ lɛ gbɛ koni nyɛna naanɔ wala.

²² Mɛi ni ji jwɛŋmɔ enyɔnyɔɔnyɔtsɛmɛi lɛ, nyɛnaa amɛ mɔbɔ;

²³ mɛi komɛi hu nyɛshaa amɛ kɛjɛa la lɛ mli kɛherea amɛyiwala; mɛi komɛi hu nyɛkɛ hegbeyeishemɔ anaa amɛ mɔbɔ, ni nyɛhĩa amɛtaade ni amɛkɛ heloo jeŋba ewo he muji lɛ tete.

Nyɔŋmɔ yijiemɔ

²⁴ Shi lɛ mɔ ni yɔɔ hewalɛ ni ekɛaabu nyɛhe ni nyɛkatɛrɛ ni eŋɔ nyɛ eyadamɔ enunyam lɛ hiɛ ni kpa ko bɛ nyɛhe yɛ mliflimɔ mli lɛ,

²⁵ Nyɔŋmɔ koome ni ji wɔyiwalaherelɔ kɛtsɔ̃ wɔNuŋtsɔ Yesu Kristo nɔ lɛ, lɛ aŋɔ anunyam kɛ agbojee kɛ hewalɛ kɛ hegbɛ ahã kɛjɛ naanɔ agbɛnɛ kɛ naanɔ fɛɛ. Amen!