Yoshua 9 - ŊMALƐ KRƆŊKRƆŊ LƐ

Gibeonbii lɛ laka Yoshua

¹ Majiatsɛmɛi ni yɔɔ Yordan lɛ anaigbɛ lɛ nu Israelbii akunimyeli sane lɛ. Amɛ ji mɛi ni yɔɔ gɔji lɛ anɔ kɛ gɔji lɛ ajɔi lɛ amli kɛ Mediterenia Ŋshɔ lɛ naa maji ni yɔɔ aahu kɛyashi Lebanon lɛ. Majiatsɛmɛi nɛɛ ji Hitbii kɛ Amorbii kɛ Kanaanbii kɛ Perizbii kɛ Hivbii kɛ Yebusbii amajiatsɛmɛi lɛ.

² Amɛbua amɛhe naa amɛfee ekome koni amɛkɛ Yoshua kɛ Israel abawu ta.

³ Shi Gibeonbii lɛ, be ni amɛnu nɔ ni Yoshua efee Yeriko kɛ Ai lɛ,

⁴ amɛ lɛ amɛto ŋaa. Amɛtao gbɛ nɔ niyenii, ni amɛloo kpekpei memeji kɛ wain wolo tɔi memeji ni asaŋ egbalagbalai ni etserɛtserɛi, ni atratrai amɛkɛtere tejii.

⁵ Amɛ gbɔmɛi lɛ, amɛwowoo tokotai memeji ni atsaratsrai kɛ atadei memeji hu. Gbɛ nɔ niyenii ni amɛhiɛ lɛ tete egbi, ni asaŋ efufuui.

⁶ Ni amɛyi mli amɛtee Yoshua ŋɔ̃ɔ yɛ Israelbii lɛ ashitoohe lɛ yɛ Gilgal, ni amɛyakɛɛ lɛ kɛ Israelhii lɛ akɛ, “Maŋsɛɛ shɔŋŋ he ko wɔjɛ wɔbaa nɛɛ; ni wɔba koni nyɛ kɛ wɔ akpãŋ ni wɔfee ekome.”

⁷ Israel hii lɛ kɛɛ Gibeonbii ni eba amɛŋɔ̃ɔ lɛ akɛ, “Akakwɛ ni wɔmasɛi nɛɛ nɔŋŋ nyɛyɔɔ. Kɛji nakai ni lɛ, te feɔ tɛŋŋ ni wɔ kɛ nyɛ kpãŋɔ, ni wɔfeɔ ekome lɛ.”

⁸ Gibeonbii lɛ kɛɛ Yoshua akɛ, “Wɔyɛ oshishi.” Yoshua bi amɛ akɛ, “Namɛi ji nyɛ; ni nɛgbɛ hu nyɛjɛ?”

⁹ Amɛ jie Yoshua naa akɛ, “Maŋsɛɛ shɔŋŋ otsuji jɛ baa nɛɛ yɛ Yehowa, nyɛNyɔŋmɔ lɛ, hewɔ. Wɔnu ehe sane, ni ji nibii fɛɛ ni efee yɛ Ijipt lɛ,

¹⁰ kɛ nɔ ni efee Amorbii amaŋtsɛmɛi enyɔ ni yɔɔ Yordan lɛ bokãgbɛ lɛ, ni ji Heshbon maŋtsɛ Sihon kɛ Bashan maŋtsɛ Og, ni hi Ashtarot lɛ.

¹¹ Enɛ hã wɔmaŋ onukpai lɛ kɛ wɔshikpɔŋ lɛ nɔ bii fɛɛ wo wɔ gbɛ amɛkɛɛ, ‘Nyɛtaoa gbɛ nɔ niyenii, ni nyɛyaa koni nyɛkɛ amɛ ayakpea yɛ gbɛteŋ, ni nyɛkɛa amɛ akɛ, wɔyɛ nyɛshishi; no hewɔ lɛ, nyɛkɛ wɔ akpãŋa.’

¹² Naa bɔ ni aboloo ni wɔhiɛ lɛ efee. Afã aboloo lɛ oheo nɔŋŋ ni wɔkɛyi gbɛ koni wɔbaye yɛ gbɛ lɛ nɔ; shi naa no; egbi ni asaŋ efu tete.

¹³ Nɛkɛ wain wolo tɔi nɛɛ hu ehei ni, be ni wɔwowoo amɛmli wain lɛ; shi naa amɛ ni amɛgbalagbalaa; ni wɔtadei kɛ tokotai lɛ hu etserɛtserɛi yɛ gbɛ ni wɔnyiɛ ni jɛkɛ tsɔ̃ lɛ hewɔ.”

¹⁴ Kɛkɛ ni Israelbii lɛ ye Gibeonbii lɛ aniyenii lɛ eko be mli ni amɛbiii Yehowa koni etsɔ̃ɔ amɛ nɔ ni sa akɛ amɛfee.

¹⁵ Yoshua here Gibeonbii nɛɛ atuu, ni ekɛ amɛ kpãŋ hu akɛ Israel efeŋ amɛ, Gibeonbii lɛ, efɔŋ ko. Israelbii lɛ anukpai lɛ kã Gibeonbii lɛ abɔfoi lɛ kitã akɛ amɛaaye kpãŋmɔ lɛ nɔ.

¹⁶ Be ni Israelbii lɛ kɛ Gibeonbii lɛ ekpãŋ gbii etɛ̃ sɛɛ lɛ, Israelbii lɛ nu akɛ amɛkɛ Gibeonbii lɛ jekɛɛɛ; amɛyɛ amɛkpokpai anɔ nɔŋŋ.

¹⁷ No hewɔ lɛ, Israelbii lɛ fã nyiɛmɔ, ni gbi ni ji etɛ̃ lɛ nɔ lɛ amɛyanina amɛmaji lɛ ni ji Gibeon kɛ Kefira kɛ Beerot kɛ Kiriat Yearim.

¹⁸ Shi Israelbii lɛ pleneee amɛ ejaakɛ amɛmaŋ onukpai lɛ kɛ Yehowa, Israel Nyɔŋmɔ lɛ, ekã amɛ kitã. No hewɔ lɛ, maŋbii lɛ wie huhuuhu amɛshi maŋ onukpai lɛ.

¹⁹ Shi maŋ onukpai lɛ kɛɛ Israel asafo muu lɛ akɛ, “Wɔna wɔkɛ Yehowa, Israel Nyɔŋmɔ lɛ, ekã amɛ kitã, ni no hewɔ lɛ, wɔnyɛŋ amɛhe wɔta.

²⁰ Nɔ nɔŋŋ ni wɔɔfee amɛ ji wɔkɛ amɛhe ake amɛ bɔ ni afee ni Nyɔŋmɔ mli akafu wɔ yɛ kitã ni wɔkã amɛ lɛ hewɔ.

²¹ Maŋ onukpai lɛ tee nɔ amɛkɛɛ asafo lɛ akɛ, akagbe amɛ, shi moŋ ahã amɛya lai kɛ faaŋ amɛhã Israel asafo lɛ fɛɛ.” Ŋãa ni lumɛi lɛ wo nɛ.

²² Kɛkɛ ni Yoshua hã atsɛ Gibeonbii lɛ kɛba, ni ekɛɛ amɛ akɛ, “Mɛɛba ni nyɛlaka wɔ akɛ, ‘Wɔ kɛ nyɛteŋ jɛkɛ naakpa lɛ?’ Asomoaŋ wɔmasɛi nɛɛ nɔŋŋ nyɛyɔɔ?

²³ Enɛ hewɔ lɛ, nyɛlomɔ nyɛhe, ni kɛjɛ ŋmɛnɛ kɛyaa nɛɛ lɛ, nyɛteŋ nyɔji baajɛ aya lai kɛ faaŋ kɛba miNyɔŋmɔ lɛ we lɛ.”

²⁴ Gibeonbii lɛ to he amɛhã Yoshua akɛ, “Agba otsuji bɔ ni Yehowa, oNyɔŋmɔ lɛ, wo etsulɔ Mose shi akɛ ekɛ shikpɔŋ muu lɛ fɛɛ baahã nyɛ, ni ebaakpãtã shikpɔŋ lɛ nɔ bii lɛ fɛɛ ahiɛ ehã nyɛ. Sane nɛɛ hã wɔshe gbeyei; ni no hã wɔye nɛkɛ sane nɛɛ.

²⁵ Amrɔ nɛɛ wɔyɛ odɛ̃ŋ, bɔ fɛɛ bɔ ni ja yɛ ohiɛ akɛ ofee wɔ lɛ feemɔ.”

²⁶ Nɛkɛ ji bɔ ni Yoshua fee ni ekɛjie Gibeonbii lɛ yɛ Israelbii lɛ adɛŋ koni amɛkagbe amɛ.

²⁷ Shi moŋ kɛjɛ nakai gbi lɛ Yoshua fee Gibeonbii nɛɛ lailɛlɔi kɛ faaŋyalɔi ehã Israelbii lɛ. Amɛ nɔŋŋ amɛyaa lai kɛ faaŋ kɛbaa ni akɛtsuɔ nii yɛ Yehowa afɔleshãa latɛ lɛ naa kɛbashi ŋmɛnɛ.