Yoshua 8 - ŊMALƐ KRƆŊKRƆŊ LƐ

Akpãtã Ai maŋ lɛ hiɛ butuu

¹ Yehowa kɛɛ Yoshua akɛ, “Kaashe gbeyei, ni otsui akafã! Ŋɔ̃ɔ tabilɔi lɛ fɛɛ ofata ohe koni nyɛfã ta kɛya Ai. Naa, mibahã nyɛye Ai maŋtsɛ kɛ emaŋbii lɛ kɛ emaŋ lɛ kɛ eshikpɔŋ lɛ fɛɛ nɔ kunim.

² Feemɔ Ai maŋ lɛ kɛ emaŋtsɛ lɛ tamɔ ofee Yeriko kɛ emaŋtsɛ lɛ; shi agbɛnɛ lɛ nyɛbaanyɛ nyɛha maŋ lɛŋ nibii kɛ kooloi lɛ. Nyɛwoa maŋ lɛ ka yɛ esɛɛgbɛ.”

³ No hewɔ lɛ, be ni Yoshua kɛ Israelbii lɛ fɛɛ fã koni amɛ kɛ Aibii lɛ ayawu lɛ, Yoshua hala hii kãkãlɔi sɔŋŋ akpei nyɔŋmai etɛ̃, ni ewo amɛ gbɛ nyɔɔŋ,

⁴ ni efã amɛ akɛ, “Nyɛyawoa maŋ lɛ ka yɛ esɛɛgbɛ; nyɛ kɛ maŋ lɛ teŋ akajekɛa tsɔ̃ ko. Nyɛ fɛɛ nyɛfea kralo ŋmɛlɛtswaa fɛɛ ŋmɛlɛtswaa.

⁵ Shi mi lɛ mi kɛ maŋbii lɛ fɛɛ ni yɔɔ mimasɛi lɛ, wɔbaatsi wɔbɛŋkɛ Ai maŋ lɛ. Kɛji Aibii lɛ je kpo kɛjɛ amɛmaŋ lɛŋ koni amɛkɛ wɔ abakpe lɛ, tamɔ wɔfee nyɛsɛɛ lɛ, wɔbaanaanaa sɛɛsɛɛ tamɔ nɔ ni wɔmiijo amɛnaa foi.

⁶ Kɛfee nakai lɛ amɛbaatiu wɔ, kɛyaashi wɔɔgbala amɛ kɛshi maŋ lɛ; ni nɔ ni amɛbaakɛɛ ji akɛ, ‘Naa, wɔnaa foi amɛjoɔ ekoŋŋ tamɔ nyɛsɛɛ lɛ.’ Wɔ lɛ, wɔbaakwa wɔjo amɛnaa foi;

⁷ shi nyɛ lɛ, nyɛbaafamɔ kpo yɛ he ni nyɛwo ka lɛ yɛ lɛ koni nyɛbaŋɔ Ai maŋ lɛ, ejaakɛ Yehowa, nyɛNyɔŋmɔ lɛ, baahã nyɛye maŋ lɛ nɔ kunim.

⁸ Kɛji nyɛnine shɛ maŋ lɛ nɔ lɛ, nyɛmaa maŋ lɛ naa la, koni nyɛfea lɛ tamɔ bɔ ni Yehowa efã lɛ. Naa, kitã miwoɔ nyɛ nɛɛ.”

⁹ Kɛkɛ ni Yoshua wo hii tabilɔi kãkãlɔi ni ehala lɛ gbɛ, ni amɛyiŋ amɛtee, ni amɛyawo ka lɛ yɛ Betel kɛ Ai teŋ, yɛ Ai anaigbɛ.

¹⁰ Yoshua te shi leebi maŋkpa, ni ebua maŋbii lɛ anaa. Kɛkɛ ni lɛ kɛ Israel maŋ onukpai lɛ yi maŋ lɛ hiɛ kɛmiiya Ai.

¹¹ Tabilɔi fɛɛ ni kɛ Yoshua nyiɛ lɛ fã, ni amɛtee aahu kɛyashi amɛbɛŋkɛ Ai maŋ lɛ. Kɛkɛ ni amɛwa yɛ Ai kooyigbɛ he ko; ni jɔɔ kã amɛ kɛ Ai teŋ.

¹² Yoshua hala hii aaafee akpei enumɔ, ni ehã amɛyawo ka yɛ Betel kɛ Ai teŋ yɛ maŋ lɛ anaigbɛ.

¹³ No hewɔ lɛ, bɔ ni Israel tabilɔi lɛ gba ta lɛ amɛhã lɛ nɛ: amɛtabilɔi lɛ tsiimɔ jwere Ai maŋ lɛ kooyigbɛ, ni fãbii ni ji sɛɛbii lɛ ewo ka yɛ Ai anaigbɛ. Yoshua kpeleke shi kɛtee jɔɔ lɛŋ nakai nyɔɔŋ lɛŋ nɔŋŋ.

¹⁴ Be ni Ai maŋtsɛ lɛ na ta ni Israelbii lɛ egba lɛ, lɛ kɛ ewebii lɛ fɛɛ ni ji maŋ lɛŋ hii lɛ ahe fee oya, ni amɛfã mra kɛtee Yordan Jɔɔ lɛ mli koni amɛ kɛ Israelbii lɛ abakpe yɛ ŋã kplanaa lɛ nɔ; shi eleee kwraa akɛ awo lɛ ka yɛ maŋ lɛ sɛɛ gbɛ.

¹⁵ Be ni awuɔ ta lɛ Yoshua kɛ Israel tabilɔi lɛ fɛɛ kwa tamɔ nɔ ni Aibii anine etsɔ̃ amɛnɔ, ni amɛjo foi kɛtee ŋã lɛ nɔ.

¹⁶ Kɛkɛ ni afɔ̃ nine atsɛ Ai maŋ lɛŋ bii lɛ fɛɛ koni amɛtiu Israelbii lɛ. Be ni amɛtiuɔ Yoshua kɛ ewebii lɛ belɛ Israelbii lɛ miigbala amɛhe shi kɛmiishi amɛmaŋ lɛ.

¹⁷ Eshwɛɛɛ nuu kome nɛkɛ yɛ Ai ni eyaaa eyanyiɛɛɛ Israelbii lɛ asɛɛ eko. Amɛshi amɛmaŋ lɛ amɛŋmɛ shi butuu, ni amɛtiu Israelbii lɛ.

¹⁸ Kɛkɛ ni Yehowa kɛɛ Yoshua akɛ, “Okɛ akplɔ ni ohiɛ lɛ atsɔ̃ɔ Ai gbɛ, ejaakɛ mikɛ maŋ lɛ ehã bo.” Yoshua kɛ akplɔ ni ehiɛ lɛ tsɔ̃ɔ Ai gbɛ.

¹⁹ Amrɔ nɔŋŋ ni Yoshua kpã enine mli lɛ, Israelbii tabilɔi lɛ ni eyawo ka lɛ tetee shi kɛjɛ hei ni amɛteetee amɛhe yɛ lɛ, ni amɛwowoo foi kɛyabote Ai maŋ lɛŋ, ni amɛŋɔ̃ maŋ lɛ. Oya nɔŋŋ ni amɛma maŋ lɛ naa la.

²⁰ Be ni Ai hii lɛ yaakwɛ amɛsɛɛ lɛ amɛna akɛ lasu miifã yɛ amɛmaŋ lɛŋ kɛmiiya ŋwɛi. Nakai be mli nɔŋŋ kɛkɛ ni Israelbii ni kwa wo foi kɛtee ŋã lɛ nɔ lɛ tsɔ̃ amɛhe amɛwo Aibii lɛ; ehiii Aibii lɛ foijee kɛmiitsɔ̃ biɛ loo biɛ.

²¹ Be ni Yoshua kɛ Israel asafo muu lɛ fɛɛ na akɛ kawolɔi lɛ eŋɔ̃ maŋ lɛ, ni asaŋ amɛma enaa la lɛ, amɛfo amɛhe kɛtua Ai hii lɛ, ni amɛgbe amɛ.

²² Israel tabilɔi lɛ ekomɛi hu fã kpo kɛjɛ maŋ lɛŋ amɛbatua Aibii lɛ. No hewɔ lɛ, Israelbii lɛ wo Aibii lɛ teŋ; mɛi komɛi yɛ amɛbiɛ, ni mɛi komɛi hu yɛ amɛbiɛ, ni amɛgbe Aibii lɛ kɛyashi eshwɛɛɛ amɛteŋ gbɔmɔ kome ni hiɛ kã aloo ni ena gbɛ ejo foi.

²³ Israel tabilɔi lɛ mɔ Ai maŋtsɛ lɛ hiɛkãalɔ, ni amɛkɛ lɛ bahã Yoshua.

²⁴ Be ni Israelbii lɛ egbe Aibii lɛ fɛɛ yɛ ŋã lɛ nɔ he ni Aibii lɛ nyiɛ amɛsɛɛ kɛtee lɛ, (no ji amɛhã Aibii fɛɛ nyɔnyɔi yɛ klante naa) amɛku amɛsɛɛ kɛba Ai maŋ lɛ mli; ni amɛbagbe mɔ fɛɛ mɔ hu ni yɔɔ jɛi.

²⁵ Mɛi fɛɛ ni nyɔnyɔi nakai gbi lɛ nɔ, ni ji hii kɛ yei, fee gbɔmɛi akpei nyɔŋma kɛ enyɔ, no ji Ai maŋ muu lɛŋ bii fɛɛ.

²⁶ Ejaakɛ Yoshua esuuu enine ni hiɛ akplɔ ni ekɛtsɔ̃ɔ Ai maŋ lɛŋ gbɛ lɛ kɛyashi agbe Aibii fɛɛ.

²⁷ Kitã ni Yehowa ewo Yoshua hewɔ lɛ, Israelbii lɛ ha maŋ lɛ mli kooloi kɛ nibii fɛɛ.

²⁸ Yoshua shã Ai maŋ lɛ, ni ehã etsɔ̃ naanɔ amaŋfɔ̃.

²⁹ Esɛŋ Ai maŋtsɛ lɛ yɛ tso ko nɔ kɛyashi gbɛkɛnaashi hulu lɛ shinyɔɔ be mli dani Yoshua fã, ni ayajie maŋtsɛ lɛ gbonyo lɛ yɛ tso lɛ nɔ, ni ashɛ lɛ afɔ̃ maŋ lɛ agbo lɛ naa. Ato tɛ ashwie Ai maŋtsɛ lɛ gbonyo lɛ nɔ, ni etsɔ̃ gɔŋ ni ma shi kɛbashi ŋmɛnɛ.

Akane Mla Wolo lɛ yɛ Ebal Gɔŋ lɛ he

³⁰ Kɛkɛ ni Yoshua mã afɔleshãa latɛ yɛ Ebal Gɔŋ lɛ nɔ ehã Yehowa.

³¹ Emã latɛ lɛ bɔ pɛpɛɛpɛ ni Yehowa tsulɔ Mose wo Israelbii lɛ ehe kitã lɛ, no ji bɔ ni aŋma yɛ Mla Wolo lɛ mli lɛ: “Afɔleshãa latɛ ni akɛ tɛi muji ni ŋaalɔ dade naa esako he dã ma.” Israelbii lɛ shã shãa afɔlei yɛ nɔ amɛkɛhã Yehowa, ni amɛshã shidaa afɔlei hu.

³² Kɛkɛ ni Yoshua kwɛ mlai ni Mose eŋma lɛ nɔ, ni eŋma mlai lɛ ahenɔ ewo tɛi anɔ yɛ Israelbii lɛ fɛɛ ahiɛ yɛ jɛi.

³³ Kɛkɛ ni Israel muu fɛɛ, ni ji gbɔi kɛ Israel fɔmɔbii fɛɛ, kɛ amɛmaŋ onukpai lɛ kɛ maŋnɔkwɛlɔi lɛ kɛ kojolɔi lɛ yabua shi yɛ Kpãŋmɔ Adeka lɛ ŋmawuiaŋ biɛ kɛ biɛ, yɛ Levibii osɔfoi ni tereɔ Kpãŋmɔ Adeka lɛ ahiɛ. Israel fã jwere Gerizim Gɔŋ lɛ hiɛ, ni fã hu jwere Ebal Gɔŋ lɛ hiɛ tamɔ bɔ ni Yehowa tsulɔ Mose ewo amɛ kitã eto akɛ afee kɛji abaajɔɔ Israelbii lɛ.

³⁴ Be ni maŋ lɛ ebabua shi lɛ, Yoshua kane mla lɛ mli wiemɔi lɛ bluublu, no ji jɔɔmɔi lɛ kɛ loomɔi hu, bɔ ni aŋma yɛ Mla Wolo lɛ mli lɛ pɛpɛɛpɛ.

³⁵ Wiemɔ ko kwraa bɛ nibii ni Mose ewo amɛ he kitã lɛ fɛɛ mli ni Yoshua kaneee yɛ Israel asafo lɛ, ni ji hii kɛ yei kɛ gbekɛbii kɛ gbɔi ni yɔɔ amɛteŋ lɛ, fɛɛ ahiɛ etsɔ̃ɔɔ amɛ.