Yoshua 7 - ŊMALƐ KRƆŊKRƆŊ LƐ

Akan bɔ musu

¹ Israelbii lɛ tɔ̃, ni amɛyayeee kɔkɔ ni abɔ amɛ yɛ musunii lɛ gbɛfaŋ lɛ nɔ, ejaakɛ Akan, ni ji Zabdi bi Karmi bi lɛ, ni jɛ Zera we yɛ Yuda akutso lɛŋ lɛ, kɔlɔ musunii lɛ eko. Enɛ hã Yehowa mli fu Israelbii lɛ naakpa.

² Kɛkɛ ni Yoshua tsu hii kɛjɛ Yeriko koni amɛya Ai maŋ lɛ ni yɔɔ Betaven masɛi yɛ Betel bokãgbɛ lɛ. Ni ekɛɛ amɛ akɛ, “Nyɛyaa ni nyɛyasaraa shikpɔŋ lɛ nyɛkwɛa.” Hii nɛɛ tee ni amɛyasara Ai,

³ ni amɛku amɛsɛɛ kɛba, ni amɛbakɛɛ Yoshua akɛ, “Kaahã maŋ muu lɛ fɛɛ miiya; wo hii aaafee akpei etɛ̃ kɛkɛ gbɛ kɛya ni amɛyatua Ai. Kaahao maŋ muu lɛ fɛɛ akɛ amɛya ejaakɛ Aibii lɛ ayi faaa kwraa.”

⁴ No hewɔ lɛ, maŋbii lɛ ateŋ hii aaafee akpei etɛ̃ kɛkɛ yi mli kɛtee, shi amɛyanyɛɛɛ Aibii lɛ ahiɛ amɛdamɔ.

⁵ Aibii lɛ gbe Israelbii lɛ ateŋ mɛi aaafee nyɔŋmai etɛ̃ kɛ ekpaa. Aibii lɛ wo Israelbii lɛ foi kɛjɛ Ai maŋ agbo lɛ naa kɛtee Shebarim, ni amɛgbe Israelbii lɛ be ni amɛkpelekeɔ jɔɔ lɛ. Sane nɛɛ hã Israelbii lɛ atsui fã, ni amɛhe jɔ tamɔ nu.

⁶ Kɛkɛ ni Yoshua kɛ Israel onukpai lɛ kɛ dɔlɛ gbala amɛhe atadei, ni amɛloo mlu amɛwo amɛyiteiaŋ, ni amɛkɛ amɛhiɛi bumɔ shi yɛ Yehowa Kpãŋmɔ Adeka lɛ hiɛ kɛyashi gbɛkɛ;

⁷ ni Yoshua kɛɛ akɛ, “Ao! Nuŋtsɔ Nyɔŋmɔ, mɛni hewɔ ni okɛ gbɔmɛi nɛɛ fo Yordan lɛ kɛba? Koni okɛ wɔ abawo Amorbii lɛ adɛŋ koni amɛkpãtã wɔhiɛ? Wɔle nɛkɛ kulɛ wɔkpɛ̃lɛ ni wɔhi Yordan lɛ sɛɛ kɛkɛ.

⁸ Ao! Nuŋtsɔ, te makɛɛ tɛŋŋ be ni Israel enaa sɛɛsɛɛ yɛ ehenyɛlɔi ahiɛ nɛɛ?

⁹ Ejaakɛ Kanaanbii lɛ kɛ shikpɔŋ lɛ nɔ bii fɛɛ baanu he, ni amɛaaba amɛbabɔle wɔ kpula, ni amɛbaakpãtã wɔhiɛ butuu. No hewɔ lɛ, te ofeɔ tɛŋŋ yɛ ogbɛi kpeteŋkple lɛ hewɔ hu?”

¹⁰ Yehowa kɛɛ Yoshua akɛ, “Tee shi; mɛni hewɔ ni okɛ ohiɛ ebu shi?

¹¹ Naa, Israel etɔ̃ minɔ; amɛgbo toi, ni kɔkɔ ni mibɔ amɛ lɛ, amɛyayeee nɔ, ni amɛkɔlɔ musunii lɛ eko tete amɛkɛfutu amɛnibii amli; ni asaŋ amɛju, ni amɛmale hu.

¹² “No hewɔ lɛ, Israelbii lɛ nyɛɛɛ amɛhenyɛlɔi ahiɛ amɛdamɔ, amɛtsɔ̃ amɛsɛɛ amɛhã amɛhenyɛlɔi, ejaakɛ amɛloo musu. Mikɛ nyɛ ehiŋ shi dɔŋŋ ja nyɛjie musunii lɛ yɛ nyɛnibii amli nyɛshwie.

¹³ Tee shi; tsuumɔ maŋbii lɛ ahe. Kɛɛmɔ amɛ akɛ, ‘Nyɛtsua nyɛhe nyɛkɛfea nyɛhe krɔŋkrɔŋ nyɛtoa wɔ’, ejaakɛ bɔ ni Yehowa, Israel Nyɔŋmɔ lɛ, kɛɛ nɛ, ‘Israelbii, nyɛkɔlɔ musu nibii lɛ eko, no hewɔ lɛ, nyɛnyɛŋ nyɛhenyɛlɔi lɛ ahiɛ nyɛdamɔ kɛyaashi beyinɔ ni nyɛaajie musunii lɛ nyɛshwie.’

¹⁴ Enɛ hewɔ lɛ, wɔ leebi lɛ, nyɛbaato kɛho yɛ akutsei lɛ anaa. Akutso ni Yehowa baatsɔ̃ɔ lɛ, ebaato kɛho yɛ emli wekui lɛ anaa; ni weku ni Yehowa baatsɔ̃ɔ lɛ ebaato kɛho yɛ emli shĩaishĩai lɛ anaa; ni shĩa ni Yehowa baatsɔ̃ɔ lɛ mli bii lɛ baato kɛho ekome kome.

¹⁵ Mɔ ni Yehowa baamɔ lɛ akɛ lɛ edɛŋ musu nii lɛ yɔɔ lɛ, abaashã lɛ kɛ nii fɛɛ ni eyɔɔ, ejaakɛ etɔ̃ Yehowa kitã nɔ, ni asaŋ efee hiɛgbejianii yɛ Israel.”

¹⁶ No hewɔ lɛ, Yoshua te shi leebi maŋkpa ni ehã Israelbii lɛ to kɛbaho yɛ akutseiakutsei anaa, ni amɔ Yuda akutso lɛ.

¹⁷ Kɛkɛ ni Yoshua hã Yuda akutso lɛ to kɛbaho, ni amɔ Zerabii aweku lɛ. Ehã Zerabii lɛ to kɛbaho yɛ shĩaishĩai anaa, ni amɔ Zabdi shĩa lɛ.

¹⁸ Be ni ehã Zabdi hii lɛ to kɛbaho ekomekome lɛ, amɔ Karmin bi Akan ni ji Zabdi nabi lɛ.

¹⁹ Kɛkɛ ni Yoshua kɛɛ Akan akɛ, “Mibi, wo Yehowa, Israel Nyɔŋmɔ lɛ, hiɛ nyam, ni asaŋ jiemɔ eyi. Jajemɔ otsɔ̃ɔ mi nɔ ni ofee; kaashiu mi sane nɔ.”

²⁰ Akan to he ehã Yoshua akɛ, “Lɛɛlɛŋ, mifee esha mishi Yehowa, Israel Nyɔŋmɔ lɛ.

²¹ Mina Babilon mama fɛɛfɛo ko kɛ jwiɛtɛi ni tsiimɔ ji shekeli ohai enyɔ kɛ agbɛnɛ shika ŋmiiŋmi antɛle kome ni tsiimɔ ji shekeli nyɔŋmai enumɔ yɛ ofɔ̃yeli nibii lɛ ateŋ; mihiɛ kɔ̃ nibii nɛɛ anɔ, ni mikɔlɔ. Mikɛ jwiɛtɛi lɛ hɔ nibii nɛɛ ashishi, ni mifu fɛɛ yɛ mibuu lɛ teŋ tuuŋtu.”

²² Yoshua tsu bɔfoi, ni amɛjo foi kɛtee Akan buu lɛ mli, ni lɛɛlɛŋ amɛyana nibii lɛ ni akɛtee yɛ buu lɛ mli, ni jwiɛtɛi lɛ hɔ shishi.

²³ Bɔfoi lɛ famɔ nibii lɛ, ni amɛkɛbahã Yoshua kɛ Israelbii lɛ, ni akɛ nibii lɛ shwie Yehowa hiɛ.

²⁴ Kɛkɛ ni Yoshua kɛ Israelbii lɛ fɛɛ mɔ Akan, Zeranyo lɛ, ni akɛ jwiɛtɛi lɛ kɛ mama lɛ kɛ shika antɛle lɛ kɛ ebihii kɛ ebiyei kɛ agbɛnɛ etoi kɛ etsinai kɛ etejii kɛ ebuu lɛ, no ji nɔ fɛɛ nɔ ni eyɔɔ, fɛɛ fata ehe ni akpala amɛ kɛtee Akor Jɔɔ lɛŋ.

²⁵ Be ni ayashɛ jɛi lɛ Yoshua kɛɛ Akan akɛ, “Mɛɛba ni ogba wɔnaa nɛkɛ? Yehowa hu baahao bo ŋmɛnɛ.” Kɛkɛ ni Israel muu lɛ fɛɛ tswia Akan tɛ, ni ama enaa la ni ashã lɛ.

²⁶ Asafo lɛ loo tɛ amɛkɛbua Akan nɔ, ni tɛi lɛ tsɔ̃ gɔŋ ni ma shi kɛbashi ŋmɛnɛ. Kɛkɛ ni Yehowa mlifu ni naa wa lɛ sɛɛ fo. No hewɔ lɛ, kɛbashi ŋmɛnɛ lɛ atsɛɔ jɛi akɛ Amanehulu Jɔɔ.