Yoshua 5 - ŊMALƐ KRƆŊKRƆŊ LƐ

¹ Be ni Amorbii amaŋtsɛmɛi fɛɛ ni yɔɔ Yordan sɛɛ yɛ anaigbɛ lɛ kɛ Kanaanbii amaŋtsɛmɛi fɛɛ ni yɔɔ ŋshɔnaa lɛ nu akɛ Yehowa hã Yordan lɛ mli nu lɛ gbi kɛyashi Israelbii lɛ fo faa lɛ tã lɛ, amɛtsui fã, ni mɔ fɛɛ mɔ mli ekãa laaje yɛ Israelbii lɛ ahewɔ.

Afo Israel hii lɛ ketia yɛ Gilgal

² Nakai be lɛ mli nɔŋŋ ni Yehowa kɛɛ Yoshua akɛ, “Feemɔ tɛ kaklai koni ofolɔ Israelbii lɛ ketia.”

³ Yoshua fee tɛ kaklai lɛ, ni ekɛfolɔ Israelbii ketia yɛ Gibeat Haaralot (eshishi ji Ketia Foohe).

⁴ Nɔ hewɔ ni Yoshua folɔ Israelbii lɛ ketia lɛ nɛ: Israelbii ni shi Ijipt lɛ ateŋ hii fɛɛ, ni ji tabilɔi lɛ, egboi yɛ gbɛteŋ yɛ ŋã lɛ nɔ be ni ajɛ Ijipt abaa lɛ.

⁵ Hii fɛɛ ni shi Ijipt lɛ afolɔ amɛ ketia momo; shi mɛi fɛɛ ni afɔ yɛ gbɛteŋ be ni ajɛ Ijipt abaa lɛ, afolɔko amɛ ketia.

⁶ Israelbii nyiɛ ŋã lɛ nɔ afii nyɔŋmai ejwɛ sɔŋŋ kɛyashi maŋ lɛ mli hii tabilɔi ni fata he be ni ashi Ijipt lɛ fɛɛ gboi, ejaakɛ amɛbooo Yehowa toi; ni no hewɔ lɛ, Yehowa kã amɛ kitã akɛ ehaŋ amɛna shikpɔŋ lɛ ni, lɛ, Yehowa ekã amɛtsɛmɛi lɛ ehe kitã akɛ ekɛbaahã amɛ lɛ, ni ji shikpɔŋ kpakpa ni baa nii lɛ.

⁷ No hewɔ lɛ, nɛkɛ hii nɛɛ abii ni ebaye amɛsɛɛ lɛ, amɛ ji mɛi ni Yoshua fo amɛ ketia nɛɛ, ejaakɛ foolɔi ji amɛ, akɛni afolɔko amɛ ketia lɛ.

⁸ Be ni afo maŋ lɛŋ hii fɛɛ ketia lɛ agbe naa lɛ, maŋ muu lɛ hi shi yɛ shitoohe ni amɛyɔɔ lɛ kɛyashi hii lɛ ahe tã.

⁹ Kɛkɛ ni Yehowa kɛɛ Yoshua akɛ, “Ŋmɛnɛ gbi nɛɛ, mifɔ nyɛhe muji ni awo yɛ Ijipt lɛ mishwie.” No hewɔ ni atsɛɔ shitoohe nɛɛ akɛ Gilgal kɛbashi ŋmɛnɛ lɛ.

¹⁰ Be ni Israelbii lɛ yɔɔ Gilgal lɛ, amɛye Hehoo Gbijurɔ lɛ yɛ nyɔŋ lɛ nɔ gbi ni ji nyɔŋma kɛ ejwɛ lɛ nɔ gbɛkɛ yɛ Yeriko ŋã kplanaa lɛ nɔ.

¹¹ Hehoo Gbijurɔ lɛ nɔ jetsɛremɔ gbi lɛ tuuŋtu nɔ lɛ, Israelbii lɛ ye shikpɔŋ lɛ nɔ nibaanii: amɛye ma akpiti aboloo kɛ abele fɔ ni ashã.

¹² Ni gbi ni amɛye shikpɔŋ lɛ nɔ nibaanii lɛ eko lɛ nɔ jetsɛremɔ pɛ kɛkɛ ni mana lɛ sɛɛ fo, ni Israelbii lɛ naaa mana dɔŋŋ. No hewɔ lɛ, Kanaan shikpɔŋ lɛ nɔ nibaanii ji nii ni amɛye nakai afi lɛ nɔ.

Yoshua kɛ Nuu ni hiɛ tayaa kakla lɛ

¹³ Be ni Yoshua ebɛŋkɛ Yeriko lɛ, gbi ko trukaa eyaawo ehiɛ nɔ lɛ, naa nuu ko damɔ ehiɛ ni egbala eklante ehiɛ. Yoshua tsi bɛŋkɛ nuu lɛ, ni ebi lɛ akɛ, “Wɔgbɛfaŋ oyɔɔ aloo wɔhenyɛlɔi lɛ agbɛfaŋ?”

¹⁴ Nuu lɛ to he ekɛɛ, “Dabi; miba akɛ Yehowa ta lɛ nɔ tatsɛ.” Kɛkɛ ni Yoshua kɛ ehiɛ bu shi, ni eja lɛ, ni ekɛɛ lɛ akɛ, “Mɛni minuŋtsɔ kɛɔ etsulɔ?”

¹⁵ Yehowa ta lɛ nɔ tatsɛ lɛ kɛɛ Yoshua akɛ, “Jiemɔ otokota lɛ yɛ onane, ejaakɛ he ni odamɔ lɛ shikpɔŋ krɔŋkrɔŋ ni.” Ni Yoshua fee nakai.