Yoshua 4 - ŊMALƐ KRƆŊKRƆŊ LƐ

Yoshua mãmɔ kaimɔ tɛi

¹ Be ni maŋ muu lɛ fɛɛ efo Yordan Faa lɛ etã lɛ, Yehowa kɛɛ Yoshua akɛ,

² “Halamɔ hii nyɔŋma kɛ enyɔ kɛjɛ maŋbii lɛ ateŋ, akutso fɛɛ akutso lɛ nuu kome,

³ koni ofã amɛ akɛ, ‘Nyɛholea tɛi nyɔŋma kɛ enyɔ yɛ Yordan teŋ he ni osɔfoi lɛ anaji mãmɔ lɛ koni nyɛtere kɛfo mli kɛya he ni nyɛyaato ŋmɛnɛ gbɛkɛ nɛɛ, nyɛkɛyamãmɔ shi yɛ jɛi.’ ”

⁴ Kɛkɛ ni Yoshua tsɛ hii nyɔŋma kɛ enyɔ ni ehala yɛ Israelbii lɛ ateŋ lɛ, akutso fɛɛ akutso lɛ eŋɔ̃ nuu kome yɛ mli,

⁵ ni ekɛɛ amɛ akɛ, “Nyɛtsɔ̃a Yehowa Adeka lɛ hiɛ kɛyaa Yordan teŋ, ni nyɛteŋ mɔ fɛɛ mɔ awo tɛ kome atswa ekɔŋ yɛ Israelbii akutsei lɛ ayibɔ naa.

⁶ Enɛ afee okadi ahã nyɛ koni wɔsɛɛ ko kɛji nyɛbii bi nyɛ akɛ, ‘Te nɛkɛ tɛi nɛɛ ashishi hu lɛ,’

⁷ nyɛjie naa nyɛhã amɛ akɛ, ‘Yordan Faa lɛŋ nu lɛ sɛɛ fo yɛ Kpãŋmɔ Adeka lɛ hiɛ be ni akɛfo Yordan lɛ.’ No hewɔ lɛ, tɛi nɛɛ baatsɔ̃ kaimɔ nɔ ahã Israelbii kɛya naanɔ.”

⁸ Israelbii lɛ fee bɔ ni Yoshua fã amɛ lɛ: amɛhole tɛi nyɔŋma kɛ enyɔ yɛ Yordan Faa lɛ teŋ yɛ Israelbii lɛ akutsei lɛ ayibɔ naa tamɔ bɔ ni Yehowa kɛɛ Yoshua lɛ. Amɛtere tɛi nɛɛ kɛba he ni Israelbii lɛ to shi yɛ gbi lɛ, ni amɛkɛ tɛi lɛ bamãmɔ shi yɛ jɛi.

⁹ Yoshua diɛŋtsɛ hu hole tɛi nyɔŋma kɛ enyɔ komɛi emãmɔ shi yɛ Yordan teŋ he ni osɔfoi ni tere Kpãŋmɔ Adeka lɛ anaji mãmɔ lɛ. Tɛi nɛɛ yɛ jɛi kɛbashi ŋmɛnɛ.

¹⁰ Osɔfoi lɛ ni tere Kpãŋmɔ Adeka lɛ wa damɔ shi yɛ Yordan teŋ kɛyashi beyinɔ ni agbe nɔ fɛɛ nɔ ni Yehowa fã Yoshua akɛ ekɛɛ maŋ lɛ koni afee lɛ naa, tamɔ bɔ ni Mose fã Yoshua lɛ pɛpɛɛpɛ. Israelbii lɛ ahe fee oya kɛfo faa lɛ.

¹¹ Be ni maŋ lɛ fɛɛ efo faa lɛ etã lɛ, osɔfoi lɛ kɛ Yehowa Kpãŋmɔ Adeka lɛ hu fo, kɛkɛ ni amɛyi maŋ lɛ hiɛ.

¹² Rubenbii lɛ kɛ Gadbii lɛ kɛ Manase akutso lɛ fã lɛ mĩa kɛnyiɛ Israelbii lɛ ahiɛ kɛfo mli tamɔ bɔ ni Mose fã amɛ lɛ.

¹³ Hii aaafee akpei nyɔŋmai ejwɛ ni esaa amɛhe kɛhã ta nyiɛ Yehowa hiɛ kɛtee ta yɛ Yeriko ŋã kplanaa lɛ nɔ.

¹⁴ Nakai gbi lɛ nɔ Yehowa wo Yoshua hiɛ nyam etsɔ̃ɔ Israelbii fɛɛ, ni amɛshe Yoshua gbeyei ewala gbii abɔ fɛɛ tamɔ amɛshe Mose gbeyei lɛ.

¹⁵ Yehowa kɛɛ Yoshua akɛ,

¹⁶ “Fã osɔfoi ni tere Kpãŋmɔ Adeka lɛ akɛ amɛje Yordan Faa lɛ mli.”

¹⁷ No hewɔ lɛ, Yoshua fã osɔfoi lɛ, ni ekɛɛ amɛ akɛ, “Nyɛjea Yordan lɛ mli!”

¹⁸ Be ni osɔfoi lɛ ni tere Yehowa Kpãŋmɔ Adeka lɛ je Yordan lɛ mli, ni amɛnaji sa shikpɔŋ gbiŋ nɔ pɛ, kɛkɛ ni Yordan mli nu lɛ yiridi kɛba ekoŋŋ, ni esram nɔ tamɔ tsuutsu lɛ.

¹⁹ Israelbii lɛ fo Yordan lɛ yɛ klɛŋklɛŋ nyɔŋ lɛ nɔ gbi ni ji nyɔŋma lɛ nɔ, ni amɛyato shi yɛ Gilgal yɛ Yeriko bokãgbɛ husu lɛ nɔ.

²⁰ Yoshua kɛ tɛi nyɔŋma kɛ enyɔ ni ahole yɛ Yordan lɛ mli lɛ mãmɔ shi yɛ Gilgal nɛɛ,

²¹ kɛkɛ ni ekɛɛ Israelbii lɛ akɛ, “Kɛji nyɛbii aaabi nyɛ wɔsɛɛ ko akɛ, ‘Te nɛkɛ tɛi nɛɛ ashishi hu lɛ,’

²² nyɛgbaa nyɛbii lɛ akɛ, ‘Israel nyiɛ shikpɔŋ gbiŋ nɔ kɛfo Yordan nɛɛ,’

²³ ejaakɛ Yehowa, nyɛNyɔŋmɔ, lɛ hã Yordan mli nu lɛ gbi hã nyɛ kɛyashi beyinɔ ni nyɛfo nyɛtã tamɔ bɔ ni Yehowa, nyɛNyɔŋmɔ lɛ, fee Ŋshɔ Tsuru lɛ, be ni ehã egbi ehã wɔ kɛyashi beyinɔ ni wɔfo wɔtã lɛ,

²⁴ koni je lɛŋ gbɔmɛi fɛɛ ana ale akɛ Yehowa yɛ hewalɛ, koni nyɛshe Yehowa, nyɛNyɔŋmɔ lɛ, gbeyei kɛya naanɔ.”