Yoshua 23 - ŊMALƐ KRƆŊKRƆŊ LƐ

Yoshua kɛ Israelbii lɛ ye shɛɛ

¹ Be kplaŋŋ sɛɛ be ni Yoshua egbɔ kotokoto, ni Israelbii lɛ ahenyɛlɔi fɛɛ ni bɔle amɛ ekpa amɛnaagbamɔ lɛ,

² Yoshua fɔ̃ nine etsɛ Israel tso muu fɛɛ kɛbakpe. Maŋ onukpai kɛ weku nukpai kɛ kojolɔi kɛ maŋ nitsulɔi fɛɛ ba, ni Yoshua kɛɛ amɛ akɛ, “Agbɛnɛ migbɔ.

³ Te nyɛna nii fɛɛ ni Yehowa, nyɛNyɔŋmɔ lɛ, efee majimaji ni bɔle nyɛ nɛɛ fɛɛ yɛ nyɛhewɔ? Yehowa, nyɛNyɔŋmɔ lɛ, lɛ ewu nyɛtai lɛ ehã nyɛ.

⁴ Maji ni eshwɛ lɛ mija momo mihã nyɛkutsei lɛ akɛ amɛgbɛfaŋnii koni akɛshi maji ni miye amɛnɔ kɛjɛ Yordan lɛ naa kɛyashi Mediterenia Ŋshɔ lɛ naa yɛ anaigbɛ lɛ anɔ.

⁵ Yehowa, nyɛNyɔŋmɔ lɛ, baashwie maji nɛɛ amli bii lɛ yɛ nyɛhiɛ; ebaahã amɛjo nyɛnaa foi, ni nyɛbaaŋɔ amɛshikpɔŋ lɛ tamɔ bɔ ni Yehowa, nyɛNyɔŋmɔ lɛ, ewo nyɛ shi eto lɛ.

⁶ No hewɔ lɛ, nyɛfĩa shi jogbaŋŋ, nyɛyea nii fɛɛ ni aŋma yɛ Mose Mla Wolo lɛ mli lɛ nɔ koni nyɛkɛba nyɛjeŋ hu. Nyɛkagbaa kɛmiiya abɛku hu,

⁷ bɔ ni afee ni maji krokomɛi anɔ bii ni ashi futu nyɛ lɛ asu ko akabagbale nyɛ ni nyɛmiitsɛ amɛnyɔŋmɔi lɛ agbɛii nyɛkɛmiikã kitã, aloo ni nyɛsɔ̃mɔ amɛ, aloo nyɛja amɛ.

⁸ Shi moŋ nyɛkpɛtɛa Yehowa, nyɛNyɔŋmɔ lɛ, tamɔ bɔ ni nyɛfee kɛbashi ŋmɛnɛ gbi nɛɛ lɛ,

⁹ ejaakɛ Yehowa ehã maji wuji ni ahe wa ejo nyɛnaa foi, ni maŋ ko nyɛko nyɛhiɛ adamɔ kɛbashi ŋmɛnɛ.

¹⁰ Nyɛteŋ gbɔmɔ kome aaashwie mɛi akpe kɛ foi. Ejaakɛ Yehowa, nyɛNyɔŋmɔ lɛ, lɛ ji mɔ ni wuɔ nyɛta lɛ ehãa nyɛ tamɔ bɔ ni ewo nyɛ shi eto lɛ.

¹¹ No hewɔ lɛ, nyɛlea nyɛhenɔkwɛmɔ jogbaŋŋ koni nyɛsumɔ Yehowa, nyɛNyɔŋmɔ lɛ.

¹² Ejaakɛ naa, kɛji nyɛfeee nakai, shi moŋ nyɛkwa lɛ, ni nyɛkɛ nyɛhe yabɔ maji ni anɔ bii ni eshwɛ futu nyɛteŋ nɛɛ ahe, ni nyɛ kɛ amɛ botebotee gbãlãshihilɛ mli, ni nyɛkɛ amɛyei hihii shi, ni amɛ hu amɛkɛ nyɛyei hihii shi lɛ,

¹³ nyɛnaa nyɛlea faŋŋ akɛ Yehowa, nyɛNyɔŋmɔ lɛ, eyaŋ nɔ ehaŋ maji nɛɛ ajo nyɛnaa foi dɔŋŋ. Moŋ amɛaatsɔ̃mɔ tamɔ tsɔne loo akpa ni atsɔ̃ ato nyɛ, loo tamɔ kpelebii ni akɛmiiyi nyɛ ŋmawuiaŋ, loo tamɔ ŋmei ni miitsurɔ nyɛhiŋmɛiiaŋ; ni nii nɛɛ baaya nɔ kɛyashi beyinɔ ni nyɛhiɛ aaakpãtã yɛ shikpɔŋ kpakpa ni Yehowa, nyɛNyɔŋmɔ lɛ, ehã nyɛ nɛɛ nɔ.

¹⁴ “Eshɛ be ni mibaya jeŋjeŋ fɛɛ yaahe agbɛnɛ. Nyɛle anɔkwale mli yɛ nyɛtsuii amli krɛdɛɛ akɛ nɔ kpakpa ko kwraa bɛ ni Yehowa, nyɛNyɔŋmɔ lɛ, wo nyɛ shi akɛ ebaafee ehã nyɛ ni efeko ehako nyɛ. Nɔ fɛɛ nɔ eba mli, ni ekome folo nɛkɛ efeko yaka.

¹⁵ Bɔ ni nibii fɛɛ ni Yehowa, nyɛNyɔŋmɔ lɛ, wo nyɛ amɛhe shi lɛ eba mli eha nyɛ lɛ, nakai nɔŋŋ kɛ̃ Yehowa aaahã nibii fɔ̃ji fɛɛ hu aba nyɛnɔ kɛaatee beyinɔ ni eeekpãtã nyɛhiɛ yɛ shikpɔŋ kpakpa ni lɛ Yehowa, nyɛNyɔŋmɔ lɛ, nɔŋŋ kɛhã nyɛ nɛɛ nɔ.

¹⁶ Kɛji nyɛtɔ̃ Yehowa, nyɛNyɔŋmɔ lɛ, kpãŋmɔ ni ewo nyɛ ehe kitã lɛ nɔ, ni nyɛtee nyɛyasɔ̃mɔ nyɔŋmɔi krokomɛi, ni nyɛja amɛ lɛ, no lɛ Yehowa mli aaawo la awo nyɛ; ni oya ni nyɛhiɛ aaakpãtã yɛ shikpɔŋ kpakpa ni ekɛhã nyɛ nɛɛ nɔ.”