Yoshua 2 - ŊMALƐ KRƆŊKRƆŊ LƐ

Yoshua tsu mɛi amɛyasara Yeriko

¹ Kɛkɛ ni Yoshua, Nun bi lɛ, tsu hii enyɔ nigii kɛjɛ Shitim koni amɛyasara shikpɔŋ lɛ nɔ, ni ekɛɛ amɛ akɛ, “Nyɛyaa nyɛyasaraa shikpɔŋ lɛ nyɛbaa, shi titri lɛ Yeriko.” Kɛkɛ ni hii lɛ yi mli amɛtee, ni amɛyato yoo ajwamãŋ ko ni atsɛɔ lɛ Rahab lɛ we.

² Ni atee ayakɛɛ Yeriko maŋtsɛ lɛ akɛ, “Naa, Israelbii lɛ ateŋ hii komɛi eba biɛ nyɔɔŋ nɛɛŋ koni amɛbasara shikpɔŋ lɛ.”

³ Kɛkɛ ni Yeriko maŋtsɛ lɛ tsu kɛtee Rahab ŋɔɔ ayakɛɛ lɛ akɛ, “Jiemɔ hii lɛ ni ba oŋɔɔ ni amɛbato owe lɛ kɛba, ejaakɛ amɛba koni amɛbasara shikpɔŋ lɛ fɛɛ.”

⁴ Shi Rahab kɛ hii enyɔ lɛ tee, ni ekɛɛ bɔfoi ni atsu lɛ akɛ, “Eji anɔkwale akɛ hii komɛi ba miŋɔɔ; shi mileee he ni amɛjɛ.

⁵ Be ni je na ni abaaŋã maŋ agbo lɛ, kɛkɛ ni hii lɛ je kpo; shi moŋ mileee he ni amɛtee; nyɛtiua amɛ mramra, ni nyɛbaanina amɛ.”

⁶ Shi no mli lɛ Rahab eŋɔ̃ egbɔi lɛ eyatee yɛ gblɔ́ ni akɛ feɔ kpãa ni eka yɛ etsu lɛ yiteŋ lɛ shishi.

⁷ No hewɔ lɛ, maŋtsɛ lɛ tsuji lɛ tiu hii lɛ kɛtsɔ̃ Yordan Faa lɛ naagbɛ kɛtee faafoohe lɛ tɔ̃ɔ. Amrɔ ni maŋtsɛ lɛ tsuji lɛ je kpo pɛ, ni aŋã maŋ lɛ agbo lɛ.

⁸ Rahab gbɔi enyɔ lɛ nako amɛkamɔ shi, ni etee amɛŋɔ̃ɔ yɛ tsu lɛ yiteŋ,

⁹ ni eyakɛɛ amɛ akɛ, “Mile akɛ Yehowa kɛ shikpɔŋ nɛɛ ehã nyɛ, ni nyɛhe ŋmiŋmi emɔmɔ wɔmaŋbii fɛɛ, ni shikpɔŋ lɛ nɔ bii fɛɛ ejijaa yɛ nyɛhewɔ;

¹⁰ ejaakɛ wɔnu bɔ ni Yehowa hã Ŋshɔ Tsuru lɛ mli nu lɛ gbi yɛ nyɛhiɛ be ni nyɛshi Ijipt lɛ. Asaŋ wɔnu bɔ ni nyɛfee Amorbii amaŋtsɛmɛi enyɔ, ni ji Sihon kɛ Og, ni yɔɔ Yordan bokãgbɛ lɛ musumusu nyɛhã lɛ.

¹¹ Amrɔ nɔŋŋ ni wɔnu saji nɛɛ lɛ, wɔtsui fã, ni shi ofɔ̃ shi nuu fɛɛ nuu nɔ yɛ nyɛhewɔ, ejaakɛ Yehowa, nyɛNyɔŋmɔ lɛ, lɛ ji ŋwɛi ni yɔɔ shɔŋŋ lɛ kɛ shikpɔŋ ni yɔɔ ŋwɛi shishi lɛ nɔ Nyɔŋmɔ.

¹² No hewɔ lɛ, agbɛnɛ, miikpa nyɛ fai, nyɛkɛ Yehowa akãa mi kitã akɛ gbii abɔ ni mifee nyɛ ejurɔ nɛɛ lɛ, nyɛ hu nyɛbaafee mitsɛ we lɛ ejurɔ nakai nɔŋŋ; ni nyɛbaato mi okadi krɛdɛɛ ko,

¹³ ni nyɛbaahere mitsɛ kɛ minyɛ kɛ minyɛmimɛi hii kɛ minyɛmimɛi yei kɛ nii fɛɛ ni amɛyɔɔ lɛ ayiwala koni nyɛjie wɔ kɛje gbele mli.”

¹⁴ Hii lɛ wo Rahab shi amɛkɛɛ, “Wɔwala lɛ owala ni. Kɛji nyɛjieee wɔ shi lɛ, no lɛ kɛji Yehowa kɛ shikpɔŋ lɛ hã wɔ lɛ, wɔkɛ bo aaaye yɛ mɔbɔnalɛ kɛ anɔkwale naa.”

¹⁵ Kɛkɛ ni Rahab shiu hii lɛ kɛ taŋkpee kɛtsɔ̃ samflɛ mli kɛyimɔ shi, ejaakɛ Rahab shĩa lɛ ama akpɛtɛ maŋ lɛ gbogbo lɛ, ni jɛi Rahab yɔɔ.

¹⁶ Rahab kɛɛ hii lɛ akɛ, “Nyɛyaa gɔji lɛ anɔ koni mɛi ni atsu akɛ amɛyatao nyɛ lɛ kɛ nyɛ akakpe. Nyɛtea nyɛhe yɛ jɛi gbii etɛ̃ kɛyashi mɛi ni etiu nyɛ lɛ aaaku amɛsɛɛ kɛaaba; no sɛɛ dani nyɛyi gbɛ nyɛya.”

¹⁷ Hii lɛ kɛɛ Rahab akɛ, “Wɔbaaye kitã ni ohã wɔkã bo nɛɛ nɔ.

¹⁸ Naa, kɛji wɔbashɛ shikpɔŋ nɛɛ nɔ lɛ, okɛ kpãa tsuru faa nɛɛ afi samflɛ ni okɛ wɔ tsɔ̃ mli kɛyimɔ shi lɛ he. Nakai be mli nɔŋŋ lɛ ohã otsɛ kɛ onyɛ kɛ onyɛmimɛi lɛ kɛ otsɛ we lɛŋ bii fɛɛ ababua amɛhe naa yɛ oŋɔ̃ɔ yɛ owe lɛ.

¹⁹ Kɛji mɔ ko aaaje kpo yɛ owe lɛŋ ayi blohu lɛŋ lɛ, mɔ lɛ lá abua lɛ diɛŋtsɛ eyiteŋ, ni eyi sɔ̃ ko tereee wɔ. Shi kɛji mɔ ko yɛ oŋɔɔ yɛ owe lɛŋ, ni mɔ ko nine ta ehe lɛ, no lɛ no sɔ̃ lɛ atere wɔ.

²⁰ Shi kɛji oyajie wɔ shi lɛ, no lɛ wɔhe eje kitã ni ohã wɔkã bo nɛɛ mli.”

²¹ Rahab kɛɛ hii lɛ akɛ, “Bɔ ni nyɛkɛɛ nɛɛ aba mli nakai.” Kɛkɛ ni ewo hii lɛ gbɛ, ni amɛtee; ni Rahab fĩ kpãa tsuru lɛ etsotsoro samflɛ lɛ he.

²² Hii lɛ shwie nɔ kɛtee gɔji lɛ anɔ; ni amɛhi jɛi gbii etɛ̃ kɛyashi mɛi ni atsu akɛ amɛtiu amɛ lɛ ku amɛsɛɛ amɛba. Mɛi ni tiu hii lɛ tao Israelbii ni atsu lɛ yɛ gbɛ lɛ nɔ fɛɛ, shi amɛnaaa amɛhe okadi ko kwraa.

²³ Kɛkɛ ni Israelbii abɔfoi enyɔ lɛ kpeleke gɔŋ lɛ, ni amɛfo Yordan lɛ kɛba Yoshua, Nun bi lɛ, ŋɔɔ, ni amɛbagba lɛ saji ni ba amɛnɔ lɛ fɛɛ.

²⁴ Amɛkɛɛ Yoshua akɛ, “Yehowa etu shikpɔŋ lɛ ewo wɔdɛŋ lɛɛlɛŋ. Shikpɔŋ lɛ nɔ bii lɛ ejijaa yɛ wɔhewɔ.”