Yoshua 15 - ŊMALƐ KRƆŊKRƆŊ LƐ

Shikpɔŋ ni akɛhã Yudabii lɛ

¹ Shikpɔŋ ni akɛha Yudabii lɛ akutso lɛ akɛ amɛgbɛfaŋnɔ yɛ amɛwekui lɛ anaa lɛ, ekã shi kɛtee aahu kɛyashɛ Edom husu lɛ nɔ yɛ Zin ŋã lɛ wuoyigbɛ naagbeehe fe fɛɛ lɛ.

² Amɛshikpɔŋ nɛɛ wuoyigbɛ husu lɛ jɛ Ŋoo Ŋshɔ lɛ naagbeehe lɛ, yɛ ble ni kã wuoyigbɛ lɛ naa,

³ ni etsɔ̃ Akrabim gɔji ateŋ gbɛ lɛ wuoyigbɛ kɛfo mli kɛtsɔ̃ Zin kɛyaje Kadesh Barnea wuoyigbɛ. Kɛkɛ ni husu lɛ sharã Hezron he kɛtee Adar, ni elɔgɔ kɛtee Karka.

⁴ Kɛjɛ biɛ lɛ husu lɛ tsɔ̃ Azmon kɛtee Ijipt faa lɛ naa, ni enaa yatã yɛ Mediterenia Ŋshɔ lɛ naa. Enɛ ji Yudabii lɛ ashikpɔŋ lɛ wuoyigbɛ husu lɛ.

⁵ Bokãgbɛ husu lɛ ji Ŋoo Ŋshɔ lɛ kɛlɛ kɛyashi he ni Yordan lɛ kɛ enaa woɔ Ŋoo Ŋshɔ lɛ mli yɛ lɛ. Kooyigbɛ husu lɛ jɛ ble ni yɔɔ he ni Yordan lɛ kɛ enaa woɔ Ŋoo Ŋshɔ lɛ mli yɛ lɛ.

⁶ Kɛjɛ biɛ lɛ husu lɛ tee Bet Hogla; kɛkɛ ni etsɔ̃ Bet Araba Kooyigbɛ kɛtee Ruben bi Bohan tɛ lɛ he.

⁷ Husu lɛ wo ehe nɔ kɛjɛ Akor Jɔɔ lɛ mli kɛtee Debir, ni edɔ eyi kɛtsɔ̃ kooyigbɛ kɛtee Gilgal ni kwɛɔ Adumim gɔji ateŋ gbɛ lɛ ni yɔɔ jɔɔ lɛ wuoyigbɛ lɛ hiɛ lɛ. Kɛkɛ lɛ husu lɛ sharã Enshemesh nuhiŋmɛii lɛ ahe, ni ekɛ enaa yawo Rogel Nubu lɛ mli.

⁸ Husu lɛ tsa nɔ ekoŋŋ kɛtsɔ̃ Hinom Jɔɔ lɛ mli, yɛ gɔŋ ni Yebusbii amaŋ ni ji Yerusalɛm lɛ mã nɔ lɛ wuoyigbɛ, ni ewo ehe nɔ kɛtee gɔŋ ni ye Hinom Jɔɔ lɛ hiɛ lɛ yiteŋ anaigbɛ, yɛ he ni Refaim Jɔɔ lɛ naa yatãa yɛ, yɛ kooyigbɛ lɛ.

⁹ Agbɛnɛ husu lɛ kã shi kɛjɛ gɔŋ lɛ yiteŋ kɛtee Neftoa Nuhiŋmɛii lɛ ahe. Kɛjɛ jɛi lɛ etse mli kɛtsɔ̃ Efrom Gɔŋ lɛ nɔ maji lɛ ahe, ni edɔ eyi kɛtee Baala, ni ji Kiriat-Yearim.

¹⁰ Elɔgɔ kɛjɛ Baala kɛtsɔ̃ anaigbɛ yɛ Edom gɔji ashikpɔŋ lɛ he kɛtee Yearim Gɔŋ lɛ, ni atsɛɔ lɛ Kesalon hu lɛ, kooyigbɛ. Ekpeleke shi kɛtee Bet Shemesh, ni esharã Timna he kɛho.

¹¹ Husu lɛ tse mli, ni enyiɛ gɔŋ lɛ ni yɔɔ Ekron kooyigbɛ lɛ masɛi kɛtee Shikeron. No sɛɛ lɛ, etsɔ̃ Baala Gɔŋ lɛ nɔ kɛyaje Yamnia, ni enaa yamɔ Mediterenia Ŋshɔ lɛ.

¹² Ŋshɔ nɛɛ nɔŋŋ ji Yudabii lɛ anaigbɛ husu lɛ. Enɛ ji Yudabii lɛ awekui lɛ ashikpɔŋ lɛ husu.

Kaleb ye Hebron Kɛ Debir nɔ kunim

¹³ Yoshua hã Kaleb, Yefune bi lɛ, egbɛfaŋ shikpɔŋ yɛ Yudabii lɛ ateŋ tamɔ bɔ ni Yehowa efã lɛ, Yoshua lɛ. Maŋ ni eha Kaleb lɛ ji Hebron, ni atsɛɔ lɛ Kiriat Arba hu lɛ. Anak nɛɛ, etsɛ gbɛi akɛwo Kiriat Arba nɛɛ.

¹⁴ Kaleb shwie Anak shwiei etɛ̃ lɛ, ni ji Sheshai kɛ Ahiman kɛ Talmai, kɛje Hebron.

¹⁵ Kɛkɛ ni Kaleb fã kɛjɛ Hebron, ni etee ekɛ Debirbii lɛ yawu. Sa lɛ Debir gbɛi ji Kiriat Sefer.

¹⁶ Kaleb wo shi ekɛɛ akɛ, “Mɔ ni aaanyɛ ayatua Kiriat Sefer, ni eshɔ̃ maŋ lɛ mikɛ mibiyoo Aksa baahã lɛ gbãlã.”

¹⁷ Kɛkɛ ni Kaleb nɔŋŋ nyɛmi nuu gbekɛ Kenaz Otniel fã ta kɛtee ni eyaŋɔ Debir maŋ lɛ. No hewɔ lɛ, Kaleb kɛ ebiyoo Aksa ha Otniel gbãlã.

¹⁸ Be ni Aksa tee ewu Otniel ŋɔɔ lɛ, Otniel wo Aksa yiŋ akɛ ebi etsɛ Kaleb koni efo shikpɔŋ ko ehã lɛ. Be ni Aksa shɛ etsɛ ŋɔɔ, ni ejɛ teji ni eta nɔ lɛ nɔ eyi shi lɛ, Kaleb bi lɛ akɛ, “Aksa, mɛni he hiaa bo?”

¹⁹ Aksa jie naa akɛ, “Oha mi shikpɔŋ yɛ wuoyigbɛ shikpɔŋ gbiŋ lɛ nɔ; ha mi nubui hu ofata he akɛ gbɛwoo nii.” Kɛkɛ ni Kaleb ha Aksa nubui ni yɔɔ gɔŋ nɔ kɛ nubui ni yɔɔ jɔɔ mli hu.

Yudabii lɛ amaji wuji lɛ

²⁰ Yudabii akutso lɛ mli wekui lɛ maji ni ahã amɛ lɛ agbɛii baa nɛɛ.

²¹ Yudabii lɛ akutso lɛ mli bii lɛ, amɛmaji wuji ni yaye wuoyigbɛ kwraa, kɛyaa Edom husu lɛ naa, ji Kabzeel kɛ Eder kɛ Yagur,

²² kɛ Kina kɛ Dimona kɛ Adada,

²³ kɛ Kedesh kɛ Hazor kɛ Itnan.

²⁴ Maji lɛ ekomɛi hu ji Zif kɛ Telem kɛ Bealot,

²⁵ kɛ Hazor Hadata kɛ Keriot Hezron ni ji Hazor,

²⁶ kɛ Amam kɛ Shema kɛ Molada.

²⁷ Maji lɛ ekrokomɛi hu ji Hazar Gada kɛ Heshmon kɛ Bet Pelet,

²⁸ kɛ Hazar Shual kɛ Beersheba kɛ Biziotia,

²⁹ kɛ Baala kɛ Yim kɛ Ezem.

³⁰ Yudabii lɛ nɔŋŋ amaji wuji krokomɛi hu ji Eltolad kɛ Kesil kɛ Horma,

³¹ kɛ Ziklag kɛ Madmana kɛ Sansana,

³² agbɛnɛ kɛ Lebaot kɛ Shilhim kɛ Ain kɛ Rimon. Maji lɛ fɛɛ fee nyɔŋmai enyɔ kɛ nɛɛhu kɛ amɛhe akrowai hu.

³³ Ŋa nɔ shikpɔŋ nɔ maji lɛ ji Eshtaol kɛ Zora kɛ Ashna,

³⁴ Zanoa kɛ En-Ganim kɛ Tapua kɛ Enam,

³⁵ kɛ Yarmut kɛ Adullam kɛ Soko kɛ Azeka,

³⁶ kɛ Shaaraim kɛ Aditaim kɛ Gedera kɛ Gederotaim. Enɛɛmɛi feɔ maji nyɔŋma kɛ ejwɛ kɛ amɛhe akrowai.

³⁷ Ŋa nɔ maji lɛ ekrokomɛi hu ji Zenan kɛ Hadasha kɛ Migdal-Gad,

³⁸ kɛ Dilan kɛ Mizpa kɛ Yokte-El,

³⁹ kɛ Lakish kɛ Bozkat kɛ Eglon,

⁴⁰ kɛ Kabon kɛ Lakmas kɛ Kitlish,

⁴¹ kɛ Gederot kɛ Bet-Dagon kɛ Naama kɛ Makeda: maji nyɔŋma kɛ ekpaa kɛ amɛhe akrowai.

⁴² Maji ni agbɛii baa nɛɛ hu jwere ŋa nɔ: Libna kɛ Eter kɛ Ashim,

⁴³ kɛ Ifta kɛ Ashna kɛ Nezib,

⁴⁴ kɛ Keila kɛ Akzib kɛ Maresha: maji nɛɛhu kɛ amɛhe akrowai.

⁴⁵ Maji krokomɛi hu ni jwere ŋa nɔ shikpɔŋ lɛ nɔ ji Ekron kɛ ehe maji kɛ ehe akrowai lɛ; ejwere shi kɛjɛ Ekron diɛŋtsɛ aahu kɛyanina Mediterenia Ŋshɔ lɛ, maji wuji kɛ maji bibii fɛɛ,

⁴⁶ kɛ maji kɛ akrowai ni yɔɔ Ashdod masɛi lɛ fɛɛ.

⁴⁷ Ashdod kɛ ehe maji kɛ ehe akrowai lɛ, kɛ Gaza hu kɛ ehe maji kɛ ehe akrowai kɛyashi Ijipt faa lɛ naa kɛ Mediterenia Ŋshɔ lɛ hu naa lɛ fɛɛ yɛ ŋa nɔ shikpɔŋ lɛ nɔ.

⁴⁸ Gɔji anɔ maji lɛ ekomɛi ji Shamir kɛ Yatir kɛ Soko,

⁴⁹ kɛ Dana kɛ Kiriat-Sana, ni ji Debir,

⁵⁰ kɛ Anab kɛ Eshtemo kɛ Anim,

⁵¹ kɛ Goshen kɛ Holon kɛ Gilo: maji nyɔŋma kɛ ekome kɛ amɛhe akrowai.

⁵² Maji krokomɛi hu ji Arab kɛ Duma kɛ Eshean,

⁵³ kɛ Yanum kɛ Bet-Tapua kɛ Afeka,

⁵⁴ kɛ Humta kɛ Kiriat-Arba, ni ji Hebron, kɛ Zior: maji nɛɛhu kɛ amɛhe akrowai.

⁵⁵ Maji krokomɛi hu ji Maon kɛ Karmel kɛ Zif kɛ Yuta,

⁵⁶ kɛ Yezreel kɛ Yokdeam kɛ Zanoa,

⁵⁷ kɛ Kain kɛ Gibea kɛ Timna: maji nyɔŋma kɛ amɛhe akrowai.

⁵⁸ Maji lɛ ekomɛi hu ji Halhul kɛ Bet-Zur kɛ Gedor,

⁵⁹ kɛ Maarat kɛ Bet-Anot kɛ Eltekon: maji ekpaa kɛ amɛhe akrowai.

⁶⁰ Maji komɛi hu ji Kiriat-Baal, ni ji Kiriat-Yearim kɛ Raba: maji enyɔ kɛ amɛhe akrowai.

⁶¹ Shiaŋa lɛ nɔ diɛŋtsɛ maji lɛ ji Bet-Araba kɛ Midin kɛ Sekaka,

⁶² kɛ Nibshan kɛ Ŋoomaŋ kɛ En-Gedi: maji ekpaa kɛ amɛhe akrowai.

⁶³ Shi Yudabii lɛ eyanyɛɛɛ Yebusbii, ni ji mɛi ni yɔɔ Yerusalɛm lɛ amɛshwie. No hewɔ lɛ, Yebusbii lɛ futu Yudabii lɛ kɛhi Yerusalɛm kɛbashi ŋmɛnɛ.