Yoshua 11 - ŊMALƐ KRƆŊKRƆŊ LƐ

Yoshua ye Maŋtsɛ Yabin kɛ ehefatalɔi lɛ anɔ kunim

¹ Be ni Hazor maŋtsɛ Yabin nu kunim ni Israelbii lɛ eye lɛ he lɛ, etsu maŋtsɛmɛi srɔtoi nɛɛ aŋɔɔ: Madom maŋtsɛ Yobab kɛ Shimron maŋtsɛ lɛ kɛ Ashkaf maŋtsɛ lɛ,

² kɛ maŋtsɛmɛi ni yɔɔ kooyigbɛ gɔji ashikpɔŋ lɛ nɔ lɛ kɛ maŋtsɛmɛi ni yɔɔ Yordan jɔɔ lɛ mli yɛ Galilea Kpaakpo lɛ wuoyigbɛ lɛ, kɛ maŋtsɛmɛi ni yɔɔ gɔji lɛ ashishi lɛ, kɛ maŋtsɛmɛi ni yɔɔ Dor ŋshɔnaa yɛ anaigbɛ lɛ.

³ Etsu Kanaanbii ni yɔɔ Yordan Faa lɛ bokãgbɛ kɛ anaigbɛ hu lɛ fɛɛ kɛ Amorbii lɛ kɛ Hitbii lɛ kɛ Perizbii lɛ kɛ Yebusbii ni yɔɔ gɔji lɛ anɔ lɛ, kɛ Hivbii ni yɔɔ Hermon Gɔŋ lɛ shishi yɛ Mizpa shikpɔŋ lɛ nɔ lɛ hu aŋɔ̃ɔ.

⁴ Kɛkɛ ni maŋtsɛmɛi nɛɛ fɛɛ fã kɛba kɛ amɛkpɔŋɔi kɛ ta shwiilii babaoo diɛŋtsɛ. Amɛyi fa babaoo oookɛɛ ŋshɔnaa shia.

⁵ Maŋtsɛmɛi nɛɛ fɛɛ anaa bakpe shi yɛ Merom Faa lɛ naa koni amɛ kɛ Israelbii lɛ abawu.

⁶ Kɛkɛ ni Yehowa kɛɛ Yoshua akɛ, “Kaashe amɛ gbeyei ejaakɛ wɔ be ni aaashɛ nɛkɛ be mli lɛ mahã amɛ fɛɛ amɛnyɔnyɔi yɛ Israelbii ahiɛ. Nyɛfolɔa amɛkpɔŋɔi lɛ ananesɛɛ fãi lɛ, ni nyɛshãa amɛta shwiilii lɛ.”

⁷ No hewɔ lɛ, Yoshua kɛ Israelbii lɛ fɛɛ bahɛ̃ŋ amɛhenyɛlɔi lɛ yɛ Merom Faa lɛ toi.

⁸ Yehowa jɔɔ henyɛlɔi lɛ anɔ ehã Israelbii lɛ, ni amɛye amɛnɔ kunim. Israelbii lɛ gbe amɛ, ni asaŋ amɛtiu amɛ kɛtee Sidon kɛ Misrefot Maim tɔ̃ɔ. Yɛ bokãgbɛ lɛ Israelbii lɛ tiu henyɛlɔi lɛ kɛyashɛ Mizpa Jɔɔ lɛ mli tɔ̃ɔ, ni amɛgbe amɛ kɛyashi eshwɛɛɛ gbɔmɔ hiɛkãalɔ kome nɛkɛ.

⁹ Yoshua fee henyɛlɔi nɛɛ bɔ ni Yehowa fã lɛ akɛ efee lɛ: efolɔ amɛkpɔŋɔi lɛ ananesɛɛ fãi lɛ, ni eshã amɛta shwiilii lɛ hu.

¹⁰ Enɛ sɛɛ lɛ Yoshua ku esɛɛ kɛtee, ni eyaŋɔ̃ Hazor maŋ lɛ, ni egbe emli maŋtsɛ lɛ ejaakɛ nakai be mli lɛ Hazor ji jɛi kpokpai lɛ anɔ maŋtsɛyelihei lɛ fɛɛ kwa yitso.

¹¹ Israelbii lɛ kɛ klante gbe Hazor mli gbɔmɛi fɛɛ. Eshwɛɛɛ gbɔmɔ hiɛkãalɔ kome nɛkɛ; ni no sɛɛ lɛ Israelbii lɛ ma Hazor maŋ lɛ naa la, ni amɛshã.

¹² Yoshua ŋɔ̃ maŋtsɛmɛi lɛ amaji lɛ fɛɛ, ni emɔ̃mɔ amɛmli maŋtsɛmɛi lɛ hu, ni akɛ klante gbe amɛ tamɔ bɔ ni Yehowa tsulɔ, Mose fã lɛ.

¹³ Shi maji fɛɛ ni jwere ŋmeŋmei anɔ lɛ, Yoshua eshãaa amɛmli ekoeko akɛ ja Hazor pɛ.

¹⁴ Israelbii lɛ ha maji lɛ amli bii lɛ anibii fɛɛ kɛ amɛkooloi hu amɛhã amɛhe. Asaŋ amɛkɛ klante gbe maji lɛ amli gbɔmɛi kɛyashi amɛkpãtã mɔ fɛɛ mɔ hiɛ; amɛshwɛɛɛ gbɔmɔ hiɛkãalɔ kome nɛkɛ.

¹⁵ Bɔ ni Yehowa wo etsulɔ Mose kitã lɛ, nakai nɔŋŋ Mose hu wo Yoshua kitã lɛ, ni nakai pɛpɛɛpɛ Yoshua fee. Nii fɛɛ ni Yehowa wo he kitã lɛ, Yoshua shiii mli ekoeko ni etsuuu he nii.

Shikpɔŋ ni Yoshua shɔ̃ lɛ

¹⁶ Yoshua shɔ̃ shikpɔŋ tso muu lɛ fɛɛ, ni ji gɔji lɛ anɔ shikpɔŋ lɛ, kɛ wuoyigbɛ shikpɔŋ lɛ fɛɛ kɛ Goshen shikpɔŋ lɛ fɛɛ kɛ ŋa nɔ shikpɔŋ lɛ kɛ amɛjɔɔ mli shikpɔŋ kplanaa lɛ.

¹⁷ Shikpɔŋ ni Yoshua shɔ̃ lɛ kã shi kɛjɛ Halak Gɔŋ lɛ ni woɔ ehe nɔ kɛyaa Seir kpokpai anɔ lɛ he kɛyashi Baal-Gad, yɛ Lebanon Jɔɔ lɛ mli, yɛ Hermon Gɔŋ lɛ shishi. Yoshua mɔ̃mɔ shikpɔji nɛɛ anɔ maŋtsɛmɛi lɛ fɛɛ, ni etswia amɛ nii, ni egbe amɛ.

¹⁸ Yoshua kɛ nɛkɛ maŋtsɛmɛi nɛɛ fɛɛ wu ta be babaoo.

¹⁹ Kɛjɛ Hivbii ni ji Gibeonbii lɛ asɛɛ lɛ, maŋ ko maŋ ko kwraa bɛ ni emli bii lɛ kɛ Israelbii lɛ kpãŋ kɛfee ekome. No hewɔ lɛ, maji krokomɛi lɛ fɛɛ lɛ, ta Israelbii lɛ wu ni amɛkɛna.

²⁰ Ejaakɛ Yehowa ninenaa nitsumɔ nɛ, akɛ ehã maji lɛ amli bii lɛ kpliŋ amɛtsui, bɔ ni afee ni amɛ kɛ Israelbii lɛ awu ta koni atsɔ̃ no nɔ amɛkpãtã amɛhiɛ ni mɔbɔnalɛ bɛ mli, tamɔ bɔ ni Yehowa fã Mose lɛ.

²¹ Yoshua fã ta nakai be lɛ mli, ni etee eyabule Anakbii lɛ ashwiei lɛ shishi yɛ gɔji lɛ anɔ hei ni amɛyɔɔ lɛ, ni ji Hebron kɛ Debir kɛ Anab kɛ Yuda gɔji lɛ anɔ fɛɛ kɛ Israel gɔji lɛ hu fɛɛ anɔ. Ekpãtã amɛ kɛ amɛmaji lɛ fɛɛ ahiɛ butuu.

²² Anakbii nɛɛ ateŋ mɔ kome nɛkɛ eshwɛɛɛ hiɛkãalɔ yɛ Israelbii lɛ ashikpɔŋ lɛ nɔ. Gaza kɛ Gat kɛ Ashdod pɛ ji hei ni eshwɛ mɛi komɛi yɛ.

²³ Yoshua ŋɔ̃ shikpɔŋ tso muu lɛ fɛɛ tswɛm tamɔ bɔ ni Yehowa ekɛɛ Mose eto lɛ pɛpɛɛpɛ; ni Yoshua ja shikpɔŋ lɛ ehã Israel akutsei lɛ akɛ amɛnɔ koni amɛhi nɔ. Agbɛnɛ taitai lɛ asɛɛ fo, ni shikpɔŋ lɛ nɔ jɔ.