Yoshua 10 - ŊMALƐ KRƆŊKRƆŊ LƐ

Aye Amorbii anɔ kunim

¹ Yerusalɛm maŋtsɛ Adonizedek nu akɛ Yoshua eye Ai maŋ lɛ nɔ kunim, ni ekpãtã hiɛ butubutu, ni asaŋ efee Ai kɛ emaŋtsɛ lɛ bɔ ni efee Yeriko kɛ emaŋtsɛ lɛ. Agbɛnɛ enu hu akɛ Gibeonbii lɛ etee amɛkɛ Israelbii lɛ eyakpãŋ, ni amɛ kɛ amɛ efee ekome, ni amɛfutu amɛ tete amɛ kɛ amɛ yɛ. Be ni Adonizedek nu saji nɛɛ lɛ

² amɛshe gbeyei naakpa. Eshishi ji akɛ maŋ wulu ji Gibeon; etamɔ maŋtsɛmaji lɛ eko nɔŋŋ, ni eda po fe Ai, asaŋ emli hii lɛ kãkãlɔi sɔŋŋ ni.

³ Enɛ hã Yerusalɛm maŋtsɛ Adonizedek tsu kɛtee Hebron maŋtsɛ Hoham kɛ Yarmut maŋtsɛ Piram kɛ Lakish maŋtsɛ Yafia kɛ Eglon maŋtsɛ Debir ŋɔɔ, ni ayakɛɛ amɛ akɛ,

⁴ “Nyɛbaa nyɛbafataa mihe koni wɔyatua Gibeon shikpɔŋ lɛ, ejaakɛ amɛkɛ Yoshua kɛ Israelbii lɛ eyafee ekome.”

⁵ No hewɔ lɛ, Amorbii amaŋtsɛmɛi enumɔ nɛɛ, ni ji Yerusalɛm maŋtsɛ kɛ Hebron maŋtsɛ kɛ Yarmut maŋtsɛ kɛ Lakish maŋtsɛ kɛ Eglon maŋtsɛ bua amɛtabilɔi lɛ anaa, kɛkɛ ni amɛto ta kɛtee koni amɛkɛ Gibeonbii ayawu; ni amɛyagba ta kɛbɔle Gibeon maŋ lɛ he.

⁶ Enɛ hã Gibeon hii lɛ tsu mɛi Yoshua ŋɔ̃ɔ yɛ eshitoohe lɛ yɛ Gilgal, ni amɛbakɛɛ lɛ akɛ, “Naa, Amorbii amaŋtsɛmɛi fɛɛ ni yɔɔ gɔji lɛ anɔ lɛ ebua amɛhe naa ewo wɔ. No hewɔ lɛ, ofainɛ, ba mra koni obaye obua wɔ. Kaaŋmɛɛ wɔhe ohã amɛ, shi otsuji ji wɔ.”

⁷ Enɛ hewɔ lɛ, Yoshua kɛ Israel tabilɔi kãkãlɔi lɛ fɛɛ kɛ amɛta lɛ fɛɛ fã kɛjɛ Gilgal kɛtee.

⁸ Yehowa kɛɛ Yoshua akɛ, “Kaashe Amorbii lɛ gbeyei ejaakɛ mijɔɔ amɛnɔ momo mihã bo; amɛteŋ mɔ ko mɔ ko nyɛŋ ohiɛ edamɔ.”

⁹ Yoshua kɛ etabilɔi lɛ nyiɛ nyɔɔŋnyɔɔŋ fɛɛ kɛjɛ Gilgal, ni amɛbahɛ̃ŋ Amorbii lɛ.

¹⁰ Yehowa hã Amorbii lɛ jijaa yɛ Israelbii lɛ ahiɛ, ni Israelbii lɛ gbe amɛ babaoo diɛŋtsɛ yɛ Gibeon. Asaŋ amɛnyiɛ Amorbii lɛ asɛɛ kɛtsɔ̃ Bet Horon Gɔŋ lɛ nɔ, ni amɛgbe amɛ kɛyashi Azeka kɛ Makeda tɔ̃ɔ.

¹¹ Be ni Amorbii lɛ joɔ Israelbii lɛ anaa foi kɛkpelekeɔ Bet Horon Gɔŋ lɛ, Yehowa hã nyɔŋmɔŋtɛi wuji jɛ ŋwɛi bashwie Amorbii lɛ anɔ aahu kɛyashi Azeka, ni amɛgboi. Mɛi abɔ ni tɛi nɛɛ gbe lɛ ayi fa kwraa fe mɛi ni gboi yɛ Israelbii lɛ aklante naa.

¹² Gbi nɔ ni Yehowa hã Israelbii lɛ ye Amorbii lɛ anɔ kunim nɛɛ lɛ, Yoshua kɛ Yehowa wie yɛ Israelbii lɛ fɛɛ ahiɛ, ni ekɛɛ akɛ, “Hulu, wa odamɔ shi yɛ Gibeon! Nyɔɔŋtsere bo hu wa yɛ Ayalon Jɔɔ lɛŋ!”

¹³ Hulu lɛ wa lɛɛlɛŋ, ni nyɔɔŋtsere lɛ hu wa kɛyashi Israelbii lɛ tɔ amɛhe owele amɛgbe naa yɛ amɛhenyɛlɔi lɛ anɔ. Aŋma sane nɛɛ yɛ Yashar Wolo lɛ mli. Hulu wa edamɔ shi yɛ ŋwɛi aaafee gbi muu ni eyeee oyai ni eyanyɔ shi.

¹⁴ Nakai gbi lɛ henɔ bako pɛŋ dã, ni kɛjɛ no sɛɛ hu eko bako dɔŋŋ ni Yehowa ebo gbɔmɔ toi nɛkɛ, ejaakɛ gbi lɛ Yehowa wu Israel ta lɛ ehã lɛ.

¹⁵ Ta nɛɛ sɛɛ lɛ Yoshua kɛ Israelbii lɛ fɛɛ ku amɛsɛɛ kɛba amɛshitoohe lɛŋ yɛ Gilgal.

Yoshua mɔmɔ Amorbii amaŋtsɛmɛi enumɔ lɛ

¹⁶ Amorbii amaŋtsɛmɛi enumɔ lɛ jo foi yɛ ta lɛŋ, ni amɛyatee amɛhe yɛ tɛkplo ko ni yɔɔ Makeda lɛ mli.

¹⁷ Abatswa Yoshua adafi akɛ, “Ayana Amorbii amaŋtsɛmɛi enumɔ lɛ ni amɛyatee amɛhe yɛ tɛkplo ni yɔɔ Makeda lɛ mli.”

¹⁸ No ni Yoshua fã akɛ, “Nyɛyakokloa tɛi kpeteŋkplei nyɛtsimɔa tɛkplo lɛ naa, ni nyɛshĩa hii yɛ jɛi koni amɛbu maŋtsɛmɛi lɛ ahe.

¹⁹ No sɛɛ lɛ, nyɛ lɛ nyɛkadamɔa shi; nyɛtiua henyɛlɔi lɛ, ni nyɛjɛa amɛsɛɛgbɛ nyɛtswiaa amɛ nii. Nyɛkaŋmɛa amɛ gbɛ ni amɛyabote amɛmaji lɛ amli, ejaakɛ Yehowa, nyɛNyɔŋmɔ lɛ, ehã nyɛye amɛnɔ kunim momo.”

²⁰ Yoshua kɛ Israelbii lɛ gbe amɛhenyɛlɔi Amorbii lɛ kɛyashi amɛyi tã; shi mɛi ni na gbɛ jo foi lɛ yabote maji ni atswa gbogbo kɛfofoo amɛhe lɛ amli.

²¹ Kɛkɛ ni hii tabilɔi lɛ fɛɛ ku amɛsɛɛ shweshweeshwe kɛba Yoshua ŋɔ̃ɔ yɛ Makeda shitoohe lɛ. Mɔ ko mɔ ko etswaaa esɛŋ eshiii Israelbii lɛ.

²² Yoshua fã ni ekɛɛ akɛ, “Nyɛgbelea tɛkplo lɛ naa koni nyɛkɛ nakai maŋtsɛmɛi enumɔ lɛ abahãa mi.”

²³ Afee bɔ ni Yoshua fã lɛ; ajie nakai maŋtsɛmɛi enumɔ lɛ yɛ tɛkplo lɛ mli kɛje kpo abahã lɛ. Maŋtsɛmɛi nɛɛ ji Yerusalɛm maŋtsɛ lɛ kɛ Hebron maŋtsɛ lɛ kɛ Yarmut maŋtsɛ lɛ kɛ Lakish maŋtsɛ lɛ kɛ Eglon maŋtsɛ lɛ.

²⁴ Be ni akɛ maŋtsɛmɛi nɛɛ je kpo kɛba Yoshua ŋɔ̃ɔ lɛ, Yoshua tsɛ Israel hii lɛ fɛɛ kɛbakpe. Kɛkɛ ni ekɛɛ tabilɔi ni kɛ lɛ tee ta lɛ anɔ asafoiatsɛmɛi lɛ akɛ, “Nyɛtsia nyɛbaa koni nyɛkɛ nyɛnaji abamãmɔa nɛkɛ maŋtsɛmɛi nɛɛ akuɛi anɔ.” Asafoiatsɛmɛi lɛ ba, ni amɛkɛ amɛnaji bamãmɔ maŋtsɛmɛi lɛ akuɛi anɔ.

²⁵ Yoshua tee nɔ, ni ekɛɛ asafoiatsɛmɛi lɛ akɛ, “Nyɛkashea gbeyei, ni nyɛtsuii hu akafãa; nyɛfea kakaaka kɛ ekãa fɛɛ, ejaakɛ nɛkɛ ji bɔ ni Yehowa baafee nyɛhenyɛlɔi fɛɛ ni nyɛkɛbaawu lɛ.”

²⁶ No sɛɛ lɛ, Yoshua tswia maŋtsɛmɛi lɛ nii, ni egbe amɛ; ni ekɛ amɛgbohii lɛ tsotsoro shi yɛ tsei enumɔ anɔ. Gbohii nɛɛ tsotsoro tsei lɛ anɔ kɛyashi gbɛkɛnaashi

²⁷ be ni hulu yaanyɔ shi dani Yoshua hã ajie amɛ yɛ tsei lɛ anɔ, ni ashɛrɛ amɛ ashwie tɛkplo lɛ ni amɛyatee yɛ mli lɛ nɔŋŋ mli. Kɛkɛ ni akoklo tɛi kpeteŋkplei akɛtsi tɛkplo lɛ naa; ni eyɛ nakai kɛbashi ŋmɛnɛ.

Yoshua shɔ̃ Amorbii ashikpɔji krokomɛi hu

²⁸ Nakai gbi lɛ nɔŋŋ lɛ Yoshua yatua Makeda maŋ lɛ, ni egbe emaŋtsɛ lɛ kɛ maŋ lɛ mli bii fɛɛ; eshwɛɛɛ gbɔmɔ hiɛkãalɔ kome nɛkɛ. Efee Makeda maŋtsɛ lɛ bɔ ni efee Yeriko maŋtsɛ lɛ.

²⁹ No sɛɛ lɛ, Yoshua kɛ Israelbii lɛ fɛɛ tse mli kɛjɛ Makeda kɛtee Libna, ni eyatua Libna maŋ lɛ hu.

³⁰ Yehowa jɔɔ Libna kɛ emaŋtsɛ lɛ fɛɛ nɔ ehã Yoshua, ni eye amɛnɔ kunim. Yoshua kɛ klante kpãtã gbɔmɛi fɛɛ ni yɔɔ Libna lɛ ahiɛ. Efee Libna maŋtsɛ lɛ bɔ ni efee Yeriko maŋtsɛ lɛ.

³¹ Kɛkɛ ni Yoshua kɛ Israelbii lɛ fɛɛ tse mli kɛjɛ Libna kɛtee Lakish, ni amɛyagba ta kɛbɔle maŋ lɛ he, ni amɛtua maŋ lɛ.

³² Yehowa jɔɔ Lakish nɔ ehã Yoshua, ni gbi ni ji enyɔ lɛ nɔ lɛ eye nɔ kunim, ni Yoshua shɔ̃ maŋ lɛ. Ekɛ klante kpãtã maŋ lɛ kɛ emli gbɔmɛi lɛ fɛɛ ahiɛ tamɔ bɔ ni efee Libna lɛ.

³³ No be lɛ mli ni Gezer maŋtsɛ Horam fã ta kɛba, ni ebawa Lakishbii lɛ. Shi Yoshua gbe lɛ kɛ emaŋbii lɛ kɛyashi eshwɛɛɛ Gezer tabilɔ hiɛkãalɔ kome nɛkɛ.

³⁴ Kɛkɛ ni Yoshua kɛ Israelbii lɛ fɛɛ tse mli kɛjɛ Lakish kɛtee Eglon, ni amɛyagba ta kɛbɔle maŋ lɛ he, ni amɛtua Eglonbii lɛ, ni amɛ kɛ amɛ wu.

³⁵ Israelbii lɛ ŋɔ̃ maŋ lɛ gbi lɛ nɔŋŋ; kɛkɛ ni amɛfite maŋ lɛ, ni amɛkɛ klante kpãtã emli gbɔmɛi fɛɛ ahiɛ gbi lɛ nɔŋŋ tamɔ bɔ ni efee Lakish lɛ.

³⁶ Kɛkɛ ni Yoshua kɛ Israelbii lɛ fɛɛ fã kɛjɛ Eglon kɛtee Hebron, ni amɛyatua maŋ lɛ ni amɛ kɛ amɛ wu.

³⁷ Amɛshɔ̃ Hebron, ni amɛkɛ klante kpãtã Hebron maŋtsɛ kɛ maŋbii lɛ kɛ maŋ lɛ akrowai lɛ hu fɛɛ amli bii ahiɛ butuu. Eshwɛɛɛ gbɔmɔ hiɛkãalɔ kome nɛkɛ tamɔ bɔ ni efee yɛ Eglon lɛ pɛpɛɛpɛ. Ekpãtã maŋ lɛ kɛ emli gbɔmɛi fɛɛ ahiɛ.

³⁸ Agbɛnɛ Yoshua kɛ Israelbii lɛ fɛɛ ku amɛsɛɛ kɛba Debir, ni amɛbatua maŋ lɛ, ni amɛ kɛ amɛ wu.

³⁹ Eye maŋ lɛ kɛ emli maŋtsɛ lɛ kɛ maŋ lɛ akrowai lɛ fɛɛ anɔ kunim. Amɛkɛ klante kpãtã maji lɛ kɛ gbɔmɛi fɛɛ ni yɔɔ amɛmli lɛ ahiɛ butuu. Eshwɛɛɛ gbɔmɔ hiɛkãalɔ kome nɛkɛ. Bɔ ni Yoshua fee Hebron kɛ Libna kɛ emaŋtsɛ lɛ, nakai pɛpɛɛpɛ efee Debir kɛ emaŋtsɛ lɛ.

⁴⁰ No hewɔ lɛ, Yoshua ye shikpɔŋ tso muu lɛ fɛɛ nɔ kunim: kɛjɛ gɔji lɛ anɔ kɛmɔ wuoyigbɛ shikpɔŋ lɛ, kɛbote jɔi lɛ amli aahu kɛyashwie ŋmeŋmei lɛ anɔ fɛɛ. Yoshua ye maji lɛ kɛ amɛmli maŋtsɛmɛi lɛ fɛɛ anɔ kunim bɔ ni eshwɛɛɛ nɔ ko nɔ ko hiɛkãalɔ; ekpãtã nɔ fɛɛ nɔ hiɛ butuu tamɔ bɔ ni Yehowa ni ji Israel Nyɔŋmɔ lɛ efã lɛ.

⁴¹ Yoshua ye maji lɛ fɛɛ anɔ kunim kɛjɛ Kadesh Barnea kɛtee Gaza, kɛmɔ Goshen shikpɔŋ tso muu lɛ fɛɛ aahu kɛtee Gibeon tɔ̃ɔ.

⁴² Ta shi kome ni Yoshua fã lɛ, ekɛye shikpɔji nɛɛ kɛ amɛmaŋtsɛmɛi lɛ fɛɛ anɔ kunim ejaakɛ Yehowa, Israel Nyɔŋmɔ lɛ, ji mɔ ni wu tai lɛ ehã Israelbii lɛ.

⁴³ Enɛ sɛɛ lɛ Yoshua kɛ Israelbii lɛ fɛɛ ku amɛsɛɛ kɛba amɛshitoohe lɛ mli yɛ Gilgal.