Yoshua 1 - ŊMALƐ KRƆŊKRƆŊ LƐ

Nyɔŋmɔ fã Yoshua akɛ eŋɔ̃ Kanaan

¹ Yehowa tsulɔ Mose gbele sɛɛ lɛ, Yehowa kɛɛ Yoshua, Nun bi lɛ, ni lɛ ji Mose sɔ̃ɔlɔ lɛ akɛ,

² “Mitsulɔ Mose egbo, no hewɔ lɛ, saamɔ ohe koni bo kɛ Israelbii lɛ fɛɛ afo Yordan Faa nɛɛ kɛya shikpɔŋ lɛ ni mikɛhãa amɛ lɛ nɔ.

³ He fɛɛ he ni nyɛnane shi aaasa lɛ mikɛhã nyɛ tamɔ bɔ ni miwo minaa shi mihã Mose lɛ.

⁴ “Nyɛhusu ji kɛjɛ ŋã lɛ nɔ kɛ nɛkɛ Lebanon gɔji nɛɛ ahe kɛyashi faa wulu ni ji Eufrate Faa lɛ naa, kɛtsɔ̃ Hitbii ashikpɔŋ tso muu lɛ fɛɛ mli kɛyashi Mediterenia Ŋshɔ lɛ naa yɛ anaigbɛ fɛɛ.

⁵ Mɔ ko mɔ ko nyɛŋ ohiɛ adamɔ owalagbii abɔ fɛɛ. Bɔ ni mikɛ Mose hi shi lɛ, nakai nɔŋŋ mikɛ bo aaahi shi; mishiŋ bo, ni mikwaŋ bo hu.

⁶ Wajemɔ ohe ni ofee ekãa; ejaakɛ shikpɔŋ lɛ ni mikã maŋbii nɛɛ atsɛmɛi lɛ ehe kitã akɛ mikɛbaahã amɛ lɛ, bo obaahã etsɔ̃ amɛnɔ.

⁷ “Bo lɛ wajemɔ ohe ni ofee ekãa jogbaŋŋ kɛkɛ; asaŋ ojwɛŋ nɔ, ni oye mla ni mitsulɔ Mose wo bo lɛ fɛɛ nɔ. Kaagba afã kɛmiiya ninejurɔ loo abɛku bɔ ni afee ni oye omanye yɛ nɔ fɛɛ nɔ ni ofeɔ mli.

⁸ Kaahã nɛkɛ Mla Wolo nɛɛ mli wiemɔi lɛ miikpa yɛ odaaŋ; shi jwɛŋmɔ he be fɛɛ be, nyɔɔŋ kɛ shwane, ni ojwɛŋ nɔ bɔ ni afee ni ohiɛ ahi ohe nɔ, ni ofee bɔ ni aŋma yɛ mli lɛ pɛpɛɛpɛ, ejaakɛ no baahã oshwere.

⁹ Ani jeee mi mifã bo? Wajemɔ ohe ni ofee ekãa. Kaahã ŋmiŋmi miimɔ bo, ni asaŋ otsui akafã ejaakɛ mi, Yehowa, oNyɔŋmɔ lɛ, mifĩ osɛɛ yɛ he fɛɛ he ni oyaa.”

Yoshua tsɔ̃ɔ maŋbii lɛ nɔ ni afee

¹⁰ Kɛkɛ ni Yoshua fã maŋ lɛ nɔkwɛlɔi lɛ, ni ekɛɛ,

¹¹ “Nyɛkpaa maŋ lɛŋ koni nyɛwoa maŋbii lɛ shi. Nyɛkɛa amɛ akɛ, ‘Nyɛtaoa gbɛ nɔ niyenii nyɛtoa, ejaakɛ biɛ gbii etɛ̃ lɛ, nyɛbaafo Yordan Faa nɛɛ koni nyɛya nyɛyaŋɔ shikpɔŋ ni Yehowa, nyɛNyɔŋmɔ lɛ, kɛhãa nyɛ akɛ nyɛnɔ lɛ.’ ”

¹² Agbɛnɛ Yoshua kɛɛ Rubenbii lɛ kɛ Gadbii lɛ kɛ Manasebii akutso lɛ fã lɛ akɛ,

¹³ “Nyɛkaia wiemɔ ni Yehowa tsulɔ Mose kɛ nyɛ wie akɛ Yehowa, nyɛNyɔŋmɔ lɛ, baahã nyɛ he ko ni nyɛaajɔɔ nyɛhe yɛ; ni ekɛ nɛkɛ shikpɔŋ nɛɛ baake nyɛ.

¹⁴ Nyɛbaashi nyɛŋamɛi kɛ nyɛbifabii kɛ nyɛkooloi yɛ shikpɔŋ ni Mose kɛhã nyɛ yɛ Yordan Faa nɛɛ sɛɛ lɛ nɔ; shi nyɛteŋ hii fɛɛ ni eshɛ tayaa amia kɛnyiɛ nyɛnyɛmimɛi lɛ ahiɛ koni nyɛye nyɛbua amɛ,

¹⁵ kɛyashi beyinɔ ni Yehowa aaahã nyɛnyɛmimɛi lɛ hu ana he ko ni amɛjɔɔ amɛhe yɛ, tamɔ bɔ ni ehã nyɛjɔɔ nyɛhe lɛ, be mli ni amɛ hu shikpɔŋ ni Yehowa, nyɛNyɔŋmɔ lɛ, kɛhãa amɛ lɛ aaashɛ amɛdɛŋ lɛ. No sɛɛ dani nyɛku nyɛsɛɛ kɛba nyɛshikpɔŋ ni Yehowa tsulɔ Mose kɛhã nyɛ yɛ Yordan Faa nɛɛ sɛɛ yɛ bokãgbɛ lɛ nɔ, ni nyɛbahi nɔ.”

¹⁶ Maŋbii lɛ to he amɛhã Yoshua amɛkɛɛ akɛ, “Nɔ fɛɛ nɔ ni owo wɔ ehe kitã lɛ wɔɔfee, ni he fɛɛ he ni oootsu wɔ lɛ wɔɔtee.

¹⁷ Bɔ ni wɔbo Mose toi lɛ, nakai nɔŋŋ wɔɔbo bo hu toi. Yehowa, oNyɔŋmɔ lɛ kɛkɛ, kɛ bo ahi shi tamɔ bɔ ni ekɛ Mose hi shi lɛ.

¹⁸ Mɔ fɛɛ mɔ ni aaatse ohiɛ atua, ni efeee nɔ ni ofã akɛ efee lɛ, aaagbe lɛ. Bo lɛ wajemɔ ohe ni ofee ekãa jogbaŋŋ kɛkɛ.”