Yona 3 - ŊMALƐ KRƆŊKRƆŊ LƐ

Yona ye Nyɔŋmɔ fãmɔ nɔ

¹ Yehowa kɛ Yona wie ekoŋŋ nɔ ni ji shii enyɔ nɔ, ni ekɛɛ lɛ akɛ,

² “Tee shi ni oya Nineve maŋ kpeteŋkple lɛ mli, koni okɛ wiemɔ ni mikɛhã bo lɛ ayahã amɛ.”

³ No hewɔ lɛ, Yona te shi, ni eyiŋ etee Nineve yɛ Yehowa wiemɔ lɛ naa. Nineve lɛ, maŋ kpeteŋkple jogbaŋŋ ni, ejaakɛ ayeɔ gbii etɛ̃ dani anyiɛɔ kɛjɛɔ maŋ lɛ krotia kome kɛyashɛɔ ekrotia kroko.

⁴ Yona je shishi koni etsɔ̃ maŋ lɛ mli kɛho. Be ni enyiɛ gbi kome gbɛ lɛ, ewo eshiɛmɔ lɛ nɔ, ni ekɛɛ akɛ, “Naa, biɛ gbii nyɔŋmai ejwɛ sɛɛ lɛ, abaabutu Nineve.”

⁵ Ninevebii lɛ he Nyɔŋmɔ nɔ amɛye; ni no hewɔ lɛ, amɛfã akɛ, kɛjɛ mɔ wulu nɔ aahu kɛyashi mɔ bibioo nɔ lɛ, ahi ŋmaa, ni abu kpekpe kɛtsɔ̃ɔ akɛ amɛje amɛhe sɛɛ.

⁶ Be ni Nineve maŋtsɛ lɛ nu wiemɔ lɛ, ete shi yɛ emaŋtsɛ sɛi lɛ nɔ, ni ejie etade fɛɛfɛo ni ewo lɛ yɛ ehe efɔ̃ shi, ni ekɔ kpekpe ebu, ni eho eta lamlu mli.

⁷ Ewo akpɔ, ni ehã ashiɛ yɛ Nineve maŋ lɛ mli akɛ, “Maŋtsɛ kɛ enukpai lɛ miiwo akpɔ akɛ, ‘Gbɔmɔ jio, kooloo jio, tsina kɛ too hu, amɛteŋ ekoeko akasa enaa nɔ ko; akaye nɔ ko nɔ ko lɛ, akanu nu hu;

⁸ shi moŋ gbɔmɔ kɛ kooloo fɛɛ abu kpekpe, ni mɔ fɛɛ mɔ asɔle kɛ hiɛdɔɔ atsɛ Nyɔŋmɔ; asaŋ mɔ fɛɛ mɔ atsake ejeŋba gbonyo lɛ, ni akpa yitsoŋwalɛ sane ni akɛyeɔ mɛi lɛ,

⁹ akɛ aleenɔ Yehowa hu aaatsake eyiŋ ni eto lɛ, ni eeeŋmɛɛ emli ni efu waa lɛ he, ni no aaahã wɔhiɛ akakpãtã lo!’ ”

¹⁰ Nyɔŋmɔ na nɔ ni Ninevebii lɛ fee lɛ akɛ amɛtsake amɛjeŋba fɔŋ lɛ. No hewɔ lɛ, Nyɔŋmɔ hu ŋmɛɛ efɔŋ ni eto eyiŋ akɛ ebaafee amɛ lɛ he, ni egbalaaa amɛtoi.