Yona 1 - ŊMALƐ KRƆŊKRƆŊ LƐ

Yona gbo Nyɔŋmɔ nɔ toi

¹ Gbi ko lɛ Yehowa kɛ Yona, Amitai bi lɛ wie, ni ekɛɛ Yona akɛ,

² “Tee shi ni oya Nineve maŋ kpeteŋkple lɛ mli koni oyashiɛ oshi maŋ lɛ, ejaakɛ nifɔɔjianii fɛɛ ni emli bii lɛ feɔ lɛ miina fɛɛ.”

³ Shi be ni Yona yi mli lɛ, ewo ehiɛ ema Tarshish gbɛ moŋ. Eyiŋtoo ji akɛ eejo Yehowa tsumɔ lɛ naa foi. Etee Yopa; eyana lɛlɛ ko yɛ jɛi ni miiya Tarshish. No hewɔ lɛ, ewo lɛlɛ lɛ mlitamɔ he nyɔmɔ, kɛkɛ ni ebote mli koni ekɛ lɛlɛ lɛ mli bii lɛ aya Tarshish, koni ejo foi yɛ Yehowa hiɛ.

⁴ Shi Yehowa hã kɔɔyɔɔ ko ni naa wa jogbaŋŋ tswa yɛ ŋshɔ lɛ hiɛ. Ahum fã waa, ni efee tamɔ nɔ ni lɛlɛ lɛ baajwa.

⁵ Amlakui lɛ she gbeyei, kɛkɛ ni amɛteŋ mɔ fɛɛ mɔ bolɔ etsɛ nɔ ni ejaa akɛ ebahere amɛ. Fee sɛɛ lɛ amlakui lɛ jie lɛlɛ lɛ mli jatsu lɛ amɛwo ŋshɔ lɛ mli, bɔ ni afee ni lɛlɛ lɛ afee huyɛhuyɛ ahã amɛ. Nɛkɛ be mli lɛ Yona etee lɛlɛ lɛ shishigbɛ eyakã shi, ni lɛ lɛ, ewɔ vii diɛŋtsɛ.

⁶ Lɛlɛtsɛ lɛ yana Yona yɛ eshikamɔhe lɛ. Kɛkɛ ni ekɛɛ lɛ akɛ, “Ataa, bo lɛ wɔɔ owɔɔ lo? Tee shi ni osɔle otsɛ nɔ ni ojaa akɛ aleenɔ emusuŋ aaatsɔ̃ lɛ yɛ wɔhe koni ebahere wɔ koni wɔhiɛ akakpãtã lo.”

⁷ Enɛ sɛɛ lɛ amlakui lɛ kɛɛkɛɛ amɛhe akɛ, “Nyɛhãa wɔfɔ̃a oshiki kɛtao mɔ koome hewɔ ni nɛkɛ sane fɔŋ nɛɛ eba wɔnɔ nɛɛ.” Amɛfɔ̃ oshiki lɛ; ni oshiki lɛ gbee Yona nɔ.

⁸ Kɛkɛ ni amlakui lɛ kɛɛ Yona akɛ, “Agbɛnɛ gbaa wɔ. Te bo ohewɔ jɛ ni osharã nɛɛ fɛɛ ebasharã wɔ nɛɛ? Mɛni otsuɔ? Nɛgbɛ ojɛ yɛ biɛ nɛɛ? Mɛɛ shikpɔŋ nɔ ojɛ, ni mɛɛ maŋ nɔ fɔmɔbi ji bo?”

⁹ Yona jie naa akɛ, “Hebrinyo ji mi; ni Yehowa mɔ ni yɔɔ ŋwɛi ni lɛ ebɔ ŋshɔ kɛ shikpɔŋ gbiŋ fɛɛ lɛ mijaa.”

¹⁰ Be ni Yona egba amɛ akɛ eejo foi yɛ Yehowa tsumɔ naa lɛ, amlakui lɛ she gbeyei jogbaŋŋ diɛŋtsɛ. Kɛkɛ ni amɛkɛɛ Yona akɛ, “Mɛni ofee nɛɛ?”

¹¹ Nakai be mli fɛɛ lɛ ŋshɔ lɛ miiya nɔ eefee hamahama sɔŋŋ. Kɛkɛ ni amlakui lɛ kɛɛ Yona akɛ, “Mɛni kɛ̃ wɔfee bo, ni eeeha ŋshɔ lɛ aŋmɛ ahã wɔ?”

¹² Yona hã hetoo akɛ, “Nyɛwoa mi, ni nyɛshɛa mi nyɛfɔa ŋshɔ lɛ mli, ni ŋshɔ lɛ baaŋmɛ ahã nyɛ, ejaakɛ mile akɛ mi mihewɔ ni nɛkɛ ahum kpeteŋkple nɛɛ tswaa nyɛ nɛɛ.”

¹³ Amlakui lɛ mia amɛhiɛ amɛwiri kɛ amɛnyɛmɔ fɛɛ akɛ amɛkɛ lɛlɛ lɛ aaaku sɛɛ kɛba shikpɔŋ; shi amɛnyɛɛɛ ejaakɛ ŋshɔ lɛ tee nɔ efee hamahama ekpee amɛ.

¹⁴ Enɛ hã amlakui lɛ sɔle amɛtsɛ Yehowa, ni amɛkɛɛ akɛ, “Ao, Yehowa, wɔmiikpa bo fai, kaahã wɔhiɛ miikpãtã yɛ nuu nɛɛ wala hewɔ. Ela yi sɔ̃ akatere wɔ, ejaakɛ Yehowa, wɔle akɛ bo lɛ, ofeɔ nɔ ni osumɔɔ.”

¹⁵ Kɛkɛ ni amlakui lɛ wo Yona, ni amɛshɛ lɛ amɛfɔ̃ ŋshɔ lɛ mli; kɛkɛ ni ŋshɔ lɛ ŋmɛ.

¹⁶ Amlakui lɛ she Yehowa gbeyei bɔ sɔŋŋ ni ehã amɛshã afɔle amɛhã Yehowa, asaŋ mɛi wowoo shii srɔtoi hu.

¹⁷ Yɛ Yehowa fãmɔ naa lɛ, ŋshɔŋloo kpeteŋkple ko mi Yona, ni Yona hi loo nɛɛ musuŋ shwaneshwane kɛ nyɔɔŋnyɔɔŋ gbii etɛ̃.