Yohane 9 - ŊMALƐ KRƆŊKRƆŊ LƐ

Yesu tsa nuu ko ni afɔ lɛ shwilafo

¹ Ni be ni Yesu hoɔ lɛ, ena nuu ko ni eshwila kɛjɛ efɔmɔ mli.

² Ni ekaselɔi lɛ bi lɛ akɛ, “Tsɔɔlɔ, namɔ fee esha, mɔ nɛ loo efɔlɔi, hewɔ ni afɔ lɛ shwilafo lɛ?”

³ Yesu here nɔ ekɛɛ, “Jeee esha ni mɔ nɛ loo efɔlɔi fee hewɔŋ, shi moŋ bɔ ni afee ni Nyɔŋmɔ nitsumɔi lɛ ana aje kpo yɛ emli.

⁴ Mi lɛ, ni je etsɛre nɛɛ, ja mitsu mɔ ni tsu mi lɛ nitsumɔi lɛ, je baana, be ni mɔ ko nyɛŋ nii atsu.

⁵ Gbii abɔ ni miyɔɔ je lɛ mli nɛɛ, je lɛ la ji mi.”

⁶ Be ni ekɛɛ enɛ lɛ, etsɛ̃ lajɔ̃ efɔ̃ shikpɔŋ, ni ekɛ lajɔ̃ lɛ kpɔtɔ su, ni ekɛ su lɛ kpa shwilafo lɛ hiŋmɛii anɔ,

⁷ ni ekɛɛ lɛ akɛ, “Yaaju ohe yɛ Siloam (eshishi ji, Mɔ ni atsu lɛ) Kpaakpo lɛ mli.” Kɛkɛ ni etee eyaju ehe, ni eba ni eena nii.

⁸ Kɛkɛ lɛ ekuŋbii kɛ mɛi ni na lɛ tsutsu ko akɛ sisɛ̃lɔ ji lɛ lɛ kɛɛ, “Ani jeee mɔ ni kulɛ etaa shi ni esisɛ̃ɔ lɛ nɛ?”

⁹ Mɛi komɛi kɛɛ, “Lɛ ni.” Mɛi komɛi hu kɛɛ, “Jeee lɛ ni; etamɔ lɛ.” Ni lɛ diɛŋtsɛ ekɛɛ, “Mi ni.”

¹⁰ No hewɔ lɛ, amɛbi lɛ akɛ, “Te fee tɛŋŋ ni ohiŋmɛii lɛ gbeleŋ?”

¹¹ Ehere nɔ ekɛɛ, “Nuu ko ni atsɛɔ lɛ Yesu lɛ kpɔtɔ su, ni ekɛkpa mihiŋmɛii lɛ anɔ, ni ekɛɛ mi akɛ, ‘Yaa Siloam Kpaakpo lɛ mli ni oyaju ohe.’ Ni be ni mitee miyaju mihe lɛ, mina nii.”

¹² Kɛkɛ ni amɛbi lɛ akɛ, “Nɛgbɛ eyɔɔ?” Eto he akɛ, “Mileee.”

Farisifoi lɛ bibii saji yɛ etsamɔ lɛ he

¹³ Ni amɛŋɔ mɔ ni tsutsu ni eshwila lɛ kɛtee Farisifoi lɛ aŋɔɔ.

¹⁴ Shi gbi ni Yesu kpɔtɔ su ni ekɛgbele ehiŋmɛii lɛ Hejɔɔmɔ gbi ni.

¹⁵ Kɛkɛ ni Farisifoi lɛ hu saa bi lɛ bɔ ni fee ni ena nii lɛ. Ni ekɛɛ amɛ akɛ, “Su ni akpɔtɔ ekɛkpa mihiŋmɛii anɔ, ni miyaju mihe, ni minaa nii nɛɛ.”

¹⁶ No hewɔ lɛ, Farisifoi lɛ ateŋ mɛi komɛi kɛɛ, “Nuu nɛɛ jɛɛɛ Nyɔŋmɔ ŋɔɔ, ejaakɛ eyeee hejɔɔmɔ gbi lɛ mla lɛ nɔ.” Mɛi komɛi hu kɛɛ, “Te gbɔmɔ ko ni ji eshafeelɔ aaafee tɛŋŋ ni enyɛ efee naakpɛɛnii ni tamɔ enɛɛmɛi hu?” Ni mligbalamɔ ba amɛteŋ.

¹⁷ Kɛkɛ ni amɛbi shwilafo lɛ ekoŋŋ akɛ, “Bo hu, te okɛɔ yɛ ehe tɛŋŋ akɛni egbele ohiŋmɛii lɛ?” Ni ekɛɛ, “Gbalɔ ji lɛ.”

¹⁸ Shi Yudafoi lɛ heee yeee akɛ shwilafo ji lɛ sa ni agbɛnɛ enaa nii nɛɛ, kɛyashi beyinɔ ni amɛyatsɛ efɔlɔi

¹⁹ ni amɛbi amɛ akɛ, “Ani nyɛbi ni nyɛkɛɔ akɛ afɔ lɛ shwilafo lɛ nɛ? Te fee tɛŋŋ mɔ ni agbɛnɛ enaa niiŋ?”

²⁰ Efɔlɔi lɛ here amɛ nɔ amɛkɛɛ, “Wɔle akɛ wɔbi lɛ nɛ, ni wɔle akɛ afɔ lɛ shwilafo;

²¹ shi bɔ ni fee ni enaa nii agbɛnɛ nɛɛ, wɔleee, asaŋ mɔ ni gbele ehiŋmɛii lɛ hu wɔleee; eda, nyɛbia lɛ; lɛ diɛŋtsɛ ebaawie ehã ehe.”

²² Efɔlɔi lɛ kɛɛ enɛ, ejaakɛ amɛmiishe Yudafoi lɛ agbeyei; shi Yudafoi lɛ ekpãŋ eto akɛ, kɛji mɔ ko gba mli kpoo kɛɛ Yesu ji Kristo lɛ, abaashwie mɔ lɛ kɛjɛ kpeehe lɛ.

²³ No hewɔ ni efɔlɔi lɛ kɛɛ akɛ, “Eda, nyɛbia lɛ diɛŋtsɛ” lɛ.

²⁴ Kɛkɛ ni amɛtsɛ nuu ni sa ni eji shwilafo lɛ nɔ ni ji shii enyɔ, ni amɛkɛɛ lɛ akɛ, “Ŋɔɔ anunyam ohã Nyɔŋmɔ; shi wɔ lɛ wɔle akɛ gbɔmɔ nɛɛ eshafeelɔ ji lɛ.”

²⁵ Kɛkɛ ni ehere nɔ ekɛɛ, “Eshafeelɔ ji lɛ jiŋŋ, mileee; nɔ kome mile, akɛ kulɛ shwilafo ji mi, shi agbɛnɛ miina nii.”

²⁶ Ni amɛbi lɛ ekoŋŋ akɛ, “Mɛni efee bo? Te efee tɛŋŋ ni egbele ohiŋmɛii lɛ?”

²⁷ Ehere amɛ nɔ akɛ, “Mikɛɛ nyɛ momo, ni nyɛnuuu: mɛɛ hewɔ nyɛtaoɔ toi nyɛbo ekoŋŋ? Ani nyɛ hu nyɛmiisumɔ akɛ nyɛtsɔ̃mɔ ekaselɔi?”

²⁸ Amɛjɛ lɛ amɛkɛɛ, “Bo ji ekaselɔ, shi wɔ lɛ Mose kaselɔi ji wɔ.

²⁹ Wɔle akɛ Nyɔŋmɔ kɛ Mose wie; shi mɔ nɛ lɛ, wɔleee he ni ejɛ.”

³⁰ Nuu lɛ here nɔ ni ekɛɛ amɛ akɛ, “Enɛ ji nɔ ni yɔɔ naakpɛɛ, akɛ nyɛleee he ni ejɛ, ni kɛ̃lɛ egbele mihiŋmɛii lɛ!

³¹ Wɔle akɛ Nyɔŋmɔ booo eshafeelɔi atoi; shi kɛji mɔ ko sheɔ lɛ gbeyei ni efeɔ esuɔmɔnaanii lɛ, eboɔ lɛ toi.

³² Kɛjɛ ni abɔ ade nɛɛ anuko akɛ mɔ ko egbele mɔ ni afɔ lɛ shwilafo hiŋmɛii dã.

³³ Gbɔmɔ nɛɛ jɛɛɛ Nyɔŋmɔ ŋɔɔ kulɛ enyɛŋ nɔ ko efee.”

³⁴ Amɛhere nɔ ni amɛkɛɛ lɛ akɛ, “Bo lɛ, esha mli kwraa afɔ bo yɛ, ni bo moŋ otsɔ̃ɔ wɔ nii nɛɛ?” Ni amɛshwie lɛ.

Nuu ni atsa lɛ lɛ he Yesu nɔ eye

³⁵ Yesu nu akɛ amɛshwie lɛ; ni be ni ena lɛ lɛ, ebi lɛ akɛ, “Oohe Nyɔŋmɔ Bi lɛ nɔ ooye lo?”

³⁶ Ehere nɔ ekɛɛ, “Namɔ ji lɛ, Nuŋtsɔ koni mahe enɔ maye?”

³⁷ Yesu kɛɛ lɛ akɛ, “Ona lɛ momo, ni asaŋ mɔ ni kɛ bo wieɔ lɛ, lɛ nɔŋŋ ni.”

³⁸ Ni ekɛɛ, “Miihe miiye, Nuŋtsɔ.” Ni ekula shi eja lɛ.

Mumɔŋ shwilamɔ

³⁹ Ni Yesu kɛɛ, “Kojomɔ hewɔ miba je nɛɛŋ, koni mɛi ni enaaa nii lɛ ana nii, ni mɛi ni naa nii lɛ atsɔ̃mɔ shwilafoi.”

⁴⁰ Ni Farisifoi lɛ ateŋ mɛi komɛi ni yɔɔ jɛi lɛ nu enɛ, ni amɛbi lɛ akɛ, “Ani wɔ hu shwilafoi ji wɔ?”

⁴¹ Yesu kɛɛ amɛ akɛ, “Eji nyɛshwila moŋ kulɛ, nyɛhe bɛ esha; shi agbɛnɛ nyɛkɛɔ akɛ, ‘Wɔmiina nii.’ No hewɔ lɛ, nyɛhe esha lɛ yɛ nyɛhe lolo.”