Yohane 8 - ŊMALƐ KRƆŊKRƆŊ LƐ

Yoo gbãlãfitelɔ lɛ

¹ Shi Yesu yiŋ etee Mugɔŋ lɛ nɔ.

² Ni leebi maaŋkpa lɛ eba Sɔlemɔ we lɛ ekoŋŋ, ni maŋ lɛ fɛɛ ba eŋɔɔ, ni eho eta shi etsɔ̃ɔ amɛ nii.

³ Ni mlatsɔɔlɔi lɛ kɛ Farisifoi lɛ ŋɔ yoo ko ni amɔ lɛ yɛ gbãlãfitemɔ mli kɛba eŋɔɔ, ni amɛhã edamɔ teŋ,

⁴ ni amɛkɛɛ Yesu akɛ, “Tsɔɔlɔ, nɛkɛ yoo nɛɛ, gbãlãfitemɔ mli diɛŋtsɛ amɔ lɛ yɛ amrɔ nɛɛ nɔŋŋ.

⁵ Mla lɛ mli lɛ Mose wo wɔ kitã akɛ atswia nɛkɛ yei atɛi. Shi bo lɛ, te okɛɔ tɛŋŋ?”

⁶ Shi enɛ lɛ amɛkɛɛ amɛkɛtsɔ̃ lɛ, koni amɛna nɔ ko amɛkɛyafolɔ enaa. Ni Yesu koto shi, ni ekɛ ewao ŋma nii yɛ shikpɔŋ.

⁷ Shi be ni amɛhiɛ lɛ bimɔ lɛ, ewo ehe nɔ ekɛɛ amɛ akɛ, “Nyɛteŋ mɔ ni esha bɛ ehe lɛ, lɛ tsutsu etswa lɛ tɛ lɛ.”

⁸ Ni esaa ekoto shi ekoŋŋ, ni eŋma nii yɛ shikpɔŋ.

⁹ Be ni amɛnu nɔ ni ekɛɛ lɛ, amɛbɔ̃i kpojee ekomekome, kɛjɛ klɛŋklɛŋ mɔ nɔ kɛyashi sɛɛkpee mɔ nɔ, ni bashwɛ Yesu kome kɛkɛ kɛ yoo lɛ ni edãmɔ te lɛ mli.

¹⁰ Shi be ni Yesu wo ehe nɔ ni enaaa mɔ ko akɛ ja yoo lɛ kɛkɛ lɛ, ebi lɛ akɛ, “Awo, nɛgbɛ onaafolɔlɔi lɛ yɔɔ, Ani mɔ ko ebuko bo fɔ?”

¹¹ Ni ekɛɛ, “Mɔ ko ebuko mi fɔ, Nuŋtsɔ.” Ni Yesu kɛɛ lɛ akɛ, “Mi hu mibuuu bo fɔ; yaa, shi kaafee esha dɔŋŋ.”]

Yesu ye lɛ diɛŋtsɛ ehe odase

¹² Kɛkɛ ni Yesu kɛ amɛ wie ekoŋŋ ekɛɛ, “Mi ji je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeena wala la lɛ.”

¹³ No hewɔ lɛ, Farisifoi lɛ kɛɛ lɛ akɛ, “Bo lɛ, bo diɛŋtsɛ ohe odase oyeɔ; odase lɛ bɛ mli.”

¹⁴ Yesu here nɔ ekɛɛ, “Kɛ miiye mi diɛŋtsɛ mihe odase hu jiŋŋ, midase lɛ anɔkwale ni, ejaakɛ mile he ni mijɛ kɛ he ni miyaa, shi nyɛ lɛ, nyɛleee he ni mijɛ aloo he ni miyaa.

¹⁵ Nyɛ lɛ nyɛkojoɔ bɔ ni gbɔmɛi kojoɔ; mi lɛ mikojooo mɔ ko.

¹⁶ Ni kɛ mikojoɔ tete po, mikojomɔ lɛ anɔkwale ni; ejaakɛ jeee mi kome ni, shi moŋ mi kɛ Tsɛ ni tsu mi lɛ ni.

¹⁷ Ni asaŋ nyɛmla lɛ mli hu aŋma akɛ, ‘Mɛi enyɔ odase lɛ anɔkwaleŋ.’

¹⁸ Mi lɛ miyeɔ mi diɛŋtsɛ mihe odase, ni Tsɛ ni tsu mi lɛ hu yeɔ mihe odase.”

¹⁹ Kɛkɛ ni amɛbi lɛ akɛ, “Nɛgbɛ oTsɛ lɛ yɔɔ?” Yesu here nɔ akɛ, “Nyɛleee mi ni nyɛsaa nyɛleee miTsɛ; nyɛle mi jikulɛ, nyɛaale miTsɛ hu.”

²⁰ Yesu wie wiemɔi nɛɛ yɛ nitoohe lɛ, be ni etsɔ̃ɔ nii yɛ Sɔlemɔ we lɛ; ni mɔ ko mɔɔɔ lɛ, ejaakɛ eŋmɛlɛtswaa lɛ shɛko.

²¹ Kɛkɛ lɛ Yesu saa kɛɛ amɛ ekoŋŋ akɛ, “Mi lɛ miiya, ni nyɛaatao mi, ni nyɛhe esha lɛ mli nyɛaagboi yɛ; he ni miyaa lɛ, nyɛnyɛŋ jɛi nyɛba.”

²² No hewɔ lɛ, Yudafoi lɛ kɛɛ, “Ani eyaagbe ehe hewɔ ekɛɔ akɛ, ‘he ni miyaa lɛ, nyɛnyɛŋ jɛi nyɛba’ lɛ?”

²³ Ni ekɛɛ amɛ akɛ, “Nyɛ lɛ nyɛjɛ shishi nɛɛ, mi lɛ mijɛ ŋwɛi; nyɛ lɛ nyɛjɛ je nɛɛ mli, mi lɛ mijɛɛɛ je nɛɛ mli.

²⁴ No hewɔ ni mikɛɛ nyɛ akɛ nyɛaagboi yɛ nyɛhe eshai lɛ amli lɛ; ejaakɛ kɛ nyɛheee nyɛyeee akɛ mi nɛɛ ji lɛ lɛ, nyɛaagboi yɛ nyɛhe eshai lɛ amli.”

²⁵ Agbɛnɛ amɛbi lɛ akɛ, “Namɔ ji bo?” Ni Yesu kɛɛ amɛ akɛ, “Nɔ nɔŋŋ ni mikɛɔ nyɛ kɛjɛ shishijee lɛ.

²⁶ Miyɛ nyɛhe saji pii ni mawie ni mikɛaakojo nyɛ; shi kɛ̃lɛ mɔ ni tsu mi lɛ anɔkwafoŋ, ni mi lɛ, nii ni minu yɛ enaa lɛ, nomɛi nɔŋŋ miwieɔ mitsɔ̃ɔ je lɛ.”

²⁷ Amɛleee akɛ Tsɛ lɛ he ekɛ amɛ wieɔ lɛ.

²⁸ No hewɔ lɛ, Yesu kɛɛ amɛ akɛ, “Be ni nyɛaawo Gbɔmɔ Bi lɛ nɔ lɛ, no mli nyɛaale akɛ mi ni, ni akɛ mitooo miyiŋ mifeee nɔ ko, shi moŋ bɔ ni miTsɛ tsɔ̃ɔ mi lɛ, nakai miwieɔ.

²⁹ Ni mɔ ni tsu mi lɛ kɛ mi yɛ; Tsɛ lɛ shiko mi kome, ejaakɛ mi lɛ nɔ ni sa ehiɛ mifeɔ daa.”

³⁰ Be ni ewieɔ nii nɛɛ lɛ, mɛi pii he enɔ ye.

Anɔkwale lɛ aaahã nyɛye nyɛhe

³¹ Kɛkɛ ni Yesu kɛɛ Yudafoi ni ehe lɛ eye lɛ akɛ, “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ,

³² ni nyɛaale anɔkwale lɛ, ni anɔkwale lɛ aaahã nyɛye nyɛhe.”

³³ Amɛhere lɛ nɔ akɛ, “Abraham shwiei ji wɔ, ni wɔtsɔ̃mɔ̃ko mɔ ko nyɔji pɛŋ; te tɛŋŋ ni bo okɛɔ akɛ, ‘Nyɛaaye nyɛheŋ?’ ”

³⁴ Yesu here amɛ nɔ akɛ, “Anɔkwale mikɛɔ nyɛ akɛ, mɔ fɛɛ mɔ ni feɔ esha lɛ, esha lɛ nyɔŋ ji lɛ.

³⁵ Nyɔŋ ehiii shĩa kɛyaaa naanɔ; shi bi hiɔ shi kɛyaa naanɔ.

³⁶ No hewɔ lɛ, kɛji Bi lɛ hã nyɛye nyɛhe lɛ, no nyɛaaye nyɛhe lɛɛlɛŋ.

³⁷ Mile akɛ Abraham shwiei ji nyɛ; shi kɛ̃lɛ nyɛmiitao mi nyɛgbe, ejaakɛ miwiemɔ hooo nyɛmli.

³⁸ Mi lɛ, nɔ ni mina yɛ miTsɛ he lɛ, no miwieɔ; ni nyɛ hu, nɔ ni nyɛnu yɛ nyɛtsɛ naa lɛ, no nyɛfeɔ.”

³⁹ Amɛhere nɔ amɛkɛɛ lɛ akɛ, “Wɔtsɛ ji Abraham.” Yesu kɛɛ amɛ akɛ, “Abrahambii ji nyɛ jikulɛ, nyɛaatsu Abraham nitsumɔi.

⁴⁰ Shi agbɛnɛ nyɛmiitao mi nyɛgbe, mi gbɔmɔ ko ni mikɛɛ nyɛ anɔkwale ni minu yɛ Nyɔŋmɔ naa lɛ; Abraham efeee enɛ.

⁴¹ Nyɛ lɛ, nyɛtsɛ nitsumɔi nyɛtsuɔ lɛ.” Kɛkɛ lɛ amɛkɛɛ lɛ akɛ, “Wɔ lɛ afɔɔɔ wɔ yɛ ajwamãŋbɔɔ mli; Tsɛ kome wɔyɔɔ, lɛ ji Nyɔŋmɔ.”

⁴² Kɛkɛ lɛ Yesu kɛɛ amɛ akɛ, “Nyɔŋmɔ ji nyɛTsɛ kulɛ, nyɛaasumɔ mi; ejaakɛ mi lɛ Nyɔŋmɔ ŋɔɔ mijɛ miba; ni asaŋ mitooo mi diɛŋtsɛ miyiŋ mibaaa, shi moŋ lɛ etsu mi.

⁴³ Shi mɛɛ hewɔ nyɛnaaa miwiemɔ naa lɛ? Ejɛ miwiemɔ toi ni nyɛbooo lɛ.

⁴⁴ Nyɛ lɛ nyɛtsɛ ni nyɛjɛ emli ji abonsam, ni nyɛtsɛ lɛ suɔmɔnaanii nyɛsumɔɔ akɛ nyɛfee. Lɛ lɛ gbɔmɔgbelɔ ji lɛ kɛjɛ teteete, ni ekɛ anɔkwale lɛ bɛ sane ko, ejaakɛ anɔkwale bɛ emli. Kɛ eemale lɛ, esu ni, ejaakɛ amalelɔ kɛ ablatsɛ ji lɛ.

⁴⁵ Shi mi lɛ, akɛni miwieɔ anɔkwale hewɔ lɛ, nyɛheee mi nyɛyeee.

⁴⁶ Nyɛteŋ namɔ kãa mi yɛ esha ko he? Shi kɛji anɔkwale miwieɔ lɛ, mɛɛ hewɔ ni nyɛheee mi nyɛyeee lɛ?

⁴⁷ Mɔ ni jɛ Nyɔŋmɔ mli lɛ, enuɔ Nyɔŋmɔ wiemɔi; no hewɔ ni nyɛ lɛ nyɛnuuu lɛ, ejaakɛ nyɛjɛɛɛ Nyɔŋmɔ mli.”

Miyɛ dani Abraham ba

⁴⁸ Yudafoi lɛ here nɔ ni amɛkɛɛ lɛ akɛ, “Ani jeee gbɛnaa wɔkɛɔ akɛ Samarianyo ji bo, ni mumɔ fɔŋ hu yɛ omli lɛ?”

⁴⁹ Yesu here nɔ akɛ, “Mumɔ fɔŋ bɛ mimli, shi miiwo miTsɛ, ni nyɛ lɛ nyɛmiishwie mihiɛ shi moŋ.

⁵⁰ Mitaooo mi diɛŋtsɛ minunyam; shi mɔ ko yɛ ni taoɔ ni ekojoɔ ehãa mi.

⁵¹ Anɔkwale mikɛɔ nyɛ akɛ, kɛji mɔ ko ye miwiemɔ lɛ nɔ lɛ, enaŋ gbele kɛaatee naanɔ.”

⁵² Kɛkɛ ni Yudafoi lɛ kɛɛ lɛ akɛ, “Kpaako wɔna wɔle akɛ mumɔ fɔŋ yɛ omli. Abraham gbo, ni gbalɔi lɛ hu gboi, ni bo lɛ okɛɔ akɛ, ‘Kɛji mɔ ko ye miwiemɔ lɛ nɔ lɛ, esaŋ enaa gbele gbi ko gbi ko kɛaatee naanɔ.’

⁵³ Ani ofe wɔtsɛ Abraham ni gbo lɛ? Ni gbalɔi lɛ hu gboi. Te otsɛɔ ohe tɛŋŋ nɛɛ?”

⁵⁴ Yesu here nɔ akɛ, “Kɛji miwo mi diɛŋtsɛ mihiɛ nyam lɛ, minunyam lɛ jeee nɔ ko; miTsɛ ji mɔ ni woɔ mihiɛ nyam, mɔ ni nyɛkɛɔ akɛ nyɛNyɔŋmɔ ji lɛ lɛ,

⁵⁵ ni nyɛleko lɛ, shi mi lɛ mile lɛ; ni kɛji mikɛɛ akɛ mileee lɛ lɛ, matsɔ̃ amalelɔ tamɔ nyɛ; shi mile lɛ, ni miyeɔ ewiemɔ nɔ.

⁵⁶ Nyɛtsɛ Abraham mli fili lɛ akɛ eeena migbi lɛ, ni ena ni emii shɛ ehe.”

⁵⁷ Kɛkɛ lɛ Yudafoi lɛ kɛɛ lɛ akɛ, “Onako oye afii nyɔŋmai enumɔ, ni ona Abraham lo?”

⁵⁸ Yesu kɛɛ amɛ akɛ, “Anɔkwale mikɛɔ nyɛ akɛ, miyɛ momo dani afɔ Abraham.”

⁵⁹ Kɛkɛ ni amɛkɔlɔ tɛi ni amɛbaatswia lɛ; shi Yesu tee ehe, ni eje Sɔlemɔ we lɛ etee.