Yohane 7 - ŊMALƐ KRƆŊKRƆŊ LƐ

Yesu tee Asesei Agbijurɔ lɛ

¹ Enɛ sɛɛ lɛ, Yesu kpa shi yɛ Galilea. Esumɔɔɔ akɛ eyakpaa shi yɛ Yudea, ejaakɛ Yudafoi lɛ miitao lɛ agbe.

² Agbɛnɛ Yudafoi lɛ Asesei agbijurɔ lɛ eshɛ etã.

³ No hewɔ lɛ, enyɛmimɛi lɛ kɛɛ lɛ akɛ, “Jee biɛ ni oya Yudea, koni okaselɔi lɛ hu ana onitsumɔi ni otsuɔ lɛ.

⁴ Ejaakɛ mɔ ko ni etao akɛ ale lɛ jogbaŋŋ lɛ efeee nɔ ko yɛ teemɔ mli. Akɛni oofee nibii nɛɛ lɛ, jiemɔ ohe shi otsɔ̃ɔ je lɛ.”

⁵ Shi enyɛmimɛi lɛ tete po heee enɔ yeee.

⁶ Kɛkɛ ni Yesu kɛɛ amɛ akɛ, “Mibe lɛ nako ashɛ, shi nyɛ lɛ nyɛbe lɛ daa nɛɛ eshɛ.

⁷ Je lɛ nyɛɛɛ nyɛ anyɛ; shi mi lɛ enyɛɔ mi, ejaakɛ miyeɔ ehe odase akɛ enitsumɔi lɛ nitsumɔi fɔ̃ji ni.

⁸ Nyɛ lɛ nyɛyaa gbijurɔ nɛɛ yeli; shi mi lɛ minako maya, ejaakɛ mibe lɛ nako ashɛ.”

⁹ Be ni ekɛɛ amɛ nɛkɛ lɛ, ehi shi yɛ Galilea.

¹⁰ Shi be ni enyɛmimɛi lɛ etee gbijurɔ lɛ sɛɛ lɛ, lɛ hu etee, shi ejieee ehe shi, shi moŋ efee tamɔ mɔ ko ni miitee ehe.

¹¹ Agbɛnɛ Yudafoi lɛ bɔ̃i lɛ taomɔ yɛ gbijurɔ lɛ nɔ, ni amɛkɛɛ, “Nɛgbɛ eyɔɔ?”

¹² Ni huhuhuhu wiemɔi pii ete shi yɛ mɛi lɛ ateŋ yɛ ehe. Mɛi komɛi kɛɛ akɛ, “Gbɔmɔ kpakpa ji lɛ;” ni mɛi komɛi hu kɛɛ akɛ, “Dabi, hã moŋ ehãa asafo lɛ duduɔ.”

¹³ Tsɛbelɛ mɔ ko ejeee faŋŋ ewieee ehe yɛ Yudafoi lɛ ashemɔ hewɔ.

¹⁴ Shi be ni shɛ gbijurɔ lɛ teŋ lɛ, Yesu tee Sɔlemɔ we lɛ ni eyatsɔ̃ɔ nii.

¹⁵ Ni Yudafoi lɛ anaa kpɛ amɛhe ni amɛkɛɛ, “Te mɔ nɛ ni ekaseko nii lɛ fee tɛŋŋ ni ele woji amli nii nɛkɛ?”

¹⁶ Yesu here amɛ nɔ ni ekɛɛ, “Minitsɔ̃ɔmɔ lɛ, jeee minɔŋ, shi moŋ mɔ ni tsu mi lɛ nɔŋ.

¹⁷ Kɛji mɔ ko miisumɔ akɛ efee esuɔmɔnaanii lɛ, ebaayoo yɛ tsɔ̃ɔmɔ lɛ he akɛ Nyɔŋmɔ dɛŋ jɛ aloo mi diɛŋtsɛ miyiŋ mitoɔ miwieɔ.

¹⁸ Mɔ ni toɔ lɛ diɛŋtsɛ eyiŋ ewieɔ lɛ, lɛ diɛŋtsɛ enunyam etaoɔ, shi mɔ ni taoɔ mɔ ni tsu lɛ lɛ anunyam lɛ, lɛ lɛ anɔkwafo ji lɛ, ni nɔ ni ejaaa gbɛ bɛ emli.

¹⁹ Ani jeee Mose hã nyɛ Mla lɛ? Ni nyɛteŋ mɔ ko mɔ ko yeee Mla lɛ nɔ. Mɛni hewɔ nyɛtaoɔ mi nyɛgbe lɛ?”

²⁰ Asafo lɛ here nɔ ni amɛkɛɛ, “Mumɔ fɔŋ yɛ omli; namɔ taoɔ bo agbe?”

²¹ Yesu here nɔ ni ekɛɛ amɛ akɛ, “Nitsumɔ kome mitsu, ni nyɛ fɛɛ nyɛnaa ekpɛ nyɛhe yɛ he.

²² Mose kɛ ketiafoo lɛ hã nyɛ — jeee akɛ lɛ Mose lɛ eŋɔɔ ejɛ, shi moŋ ejɛ tsɛmɛi lɛ aŋɔɔ — ni hejɔɔmɔ gbi lɛ nɔ lɛ nyɛfoɔ mɔ ketia.

²³ Kɛji hejɔɔmɔ gbi lɛ nɔ lɛ afoɔ mɔ kɛtia bɔ ni afee ni akatɔ̃ Mose Mla lɛ nɔ lɛ, mɛɛba nyɛmli fuɔ mi akɛ mitsa gbɔmɔ muu lɛ yɛ hejɔɔmɔ gbi lɛ nɔ?

²⁴ Nyɛkakwɛa hiɛiaŋ nyɛkojoa, shi moŋ nyɛkojoa jalɛ kojomɔ.”

Ani Kristo lɛ nɛ?

²⁵ Kɛkɛ ni Yerusalɛmbii lɛ ateŋ mɛi komɛi kɛɛ, “Ani jeee mɔ ni amɛtaoɔ amɛgbe lɛ nɛ?

²⁶ Ni naa, faŋŋ ewieɔ yɛ nɛɛ, ni amɛkɛɛɛ lɛ nɔ ko. Ekolɛ benɛ onukpai lɛ ena ele lɛɛlɛŋ akɛ mɔ nɛ ji Kristo lɛ?

²⁷ Shi mɔ nɛ lɛ, wɔle he ni ejɛ; shi Kristo lɛ, be ni eeeba lɛ, mɔ ko leŋ he ni ejɛ.”

²⁸ No hewɔ lɛ, be ni Yesu tsɔ̃ɔ nii yɛ Sɔlemɔ we lɛ, ebo ekɛɛ, “Nyɛle mi, ni asaŋ nyɛle he ni mijɛ; ni mitooo mi diɛŋtsɛ miyiŋ mibaaa, shi moŋ anɔkwafo ji mɔ ni tsu mi lɛ, ni nyɛleee lɛ.

²⁹ Shi mi lɛ mile lɛ, ejaakɛ eŋɔɔ mijɛ, ni lɛ etsu mi.”

³⁰ No hewɔ lɛ, amɛmiitao amɛmɔ lɛ, shi kɛ̃lɛ mɔ ko etaaa ehe, ejaakɛ eŋmɛlɛtswaa lɛ shɛko.

³¹ Shi asafo lɛ mli mɛi pii he enɔ amɛye, ni amɛkɛɛ, “Be ni Kristo lɛ aaaba lɛ, ani eeefee okadii pii fe nii ni mɔ nɛ feɔ nɛɛ?”

Yesu gba eŋwɛiyaa eto

³² Farisifoi lɛ nu akɛ asafo lɛ miiwie nii nɛɛ ahe huhuhuhu yɛ ehe; ni Farisifoi lɛ kɛ osɔfonukpai lɛ tsu tsuji koni amɛyamɔ lɛ.

³³ Kɛkɛ ni Yesu kɛɛ amɛ akɛ, “Be fioo kɛkɛ eshwɛ ni mikɛ nyɛ baahi shi, ni mibaya mɔ ni tsu mi lɛ ŋɔɔ.

³⁴ Nyɛaatao mi ni nyɛnaŋ mi, ni he ni miyɔɔ lɛ, nyɛnyɛŋ jɛi nyɛba.”

³⁵ No hewɔ lɛ, Yudafoi lɛ kɛɛkɛɛ amɛhe akɛ, “Nɛgbɛ mɔ nɛ baaya ni wɔnaŋ lɛ? Ani mɛi ni egbɛ eshwã Helabii lɛ ateŋ lɛ aŋɔɔ ebaaya, ni eyatsɔ̃ɔ Helabii lɛ anii?

³⁶ Mɛɛ wiemɔ ewie nɛɛ, ‘Nyɛaatao mi ni nyɛnaŋ mi, ni he ni miyɔɔ lɛ, nyɛnyɛŋ jɛi nyɛba lɛ?’ ”

Wala nu lɛ he shiwoo

³⁷ Shi naagbee gbi ni ji gbii juji lɛ ateŋ gbi wulu lɛ nɔ lɛ, Yesu yadamɔ shi ni ebo ekɛɛ, “Kɛji kumai miiye mɔ ko lɛ, eba miŋɔɔ ni ebanu nu.

³⁸ Mɔ ni heɔ minɔ eyeɔ lɛ, bɔ ni ŋmalɛ lɛ kɛɔ lɛ, fai ni wala nu yɔɔ mli aaajɛ emli aho.”

³⁹ Shi Mumɔ lɛ ni mɛi ni heɔ enɔ yeɔ lɛ baana lɛ he ewie nɛɛ; shi Mumɔ Krɔŋkrɔŋ lɛ nako aba, ejaakɛ anako awo Yesu hiɛ nyam.

Mligbalamɔ ba mɛi lɛ ateŋ yɛ Yesu hewɔ

⁴⁰ Be ni asafo lɛ mli mɛi komɛi nu wiemɔ nɛɛ lɛ, amɛkɛɛ, “Gbalɔ lɛ nɛ lɛɛlɛŋ!”

⁴¹ Mɛi komɛi kɛɛ, “Kristo lɛ nɛ!” Shi mɛi krokomɛi hu kɛɛ, “Ani Kristo lɛ, Galilea ebaajɛ?

⁴² Ani Ŋmalɛ lɛ ekɛɛɛ akɛ David shwiei lɛ mli kɛ Betlehem maŋ he ni David hi lɛ, jɛi Kristo lɛ baajɛ?”

⁴³ Kɛkɛ ni mligbalamɔ ba asafo lɛ mli yɛ ehewɔ.

⁴⁴ Shi kulɛ amɛteŋ mɛi komɛi miitao akɛ amɛmɔɔ lɛ shi kɛ̃lɛ mɔ ko etaaa ehe.

Yudafoi anukpai lɛ sumɔɔɔ akɛ mɔ ko heɔ Yesu nɔ yeɔ

⁴⁵ Kɛkɛ ni tsuji lɛ ku amɛsɛɛ kɛtee osɔfonukpai lɛ kɛ Farisifoi lɛ aŋɔɔ. Amɛbi tsuji lɛ akɛ, “Mɛɛba nyɛkɛ lɛ baaa?”

⁴⁶ Tsuji lɛ here nɔ akɛ, “Bɔ ni gbɔmɔ nɛɛ wieɔ lɛ, mɔ ko ewieko nakai dã.”

⁴⁷ Kɛkɛ ni Farisifoi lɛ here amɛ nɔ akɛ, “Ani nyɛ hu alaka nyɛ?

⁴⁸ Ani onukpai lɛ loo Farisifoi lɛ ateŋ mɔ ko ehe enɔ eye?

⁴⁹ Shi asafo ni leee Mla nɛɛ, alomɔ amɛ.”

⁵⁰ Nikodemo, amɛteŋ mɔ kome ni ba Yesu ŋɔɔ be ko lɛ, kɛɛ amɛ akɛ,

⁵¹ “Kɛ anuko mɔ ko daaŋ gbee ni aaale nɔ ni efee lɛ, wɔmla lɛ buɔ le fɔ lo?”

⁵² Amɛhere nɔ amɛkɛɛ lɛ akɛ, “Ani bo hu Galilea ojɛ? Taomɔ mli okwɛ, shi gbalɔ ko eteko shi kɛjɛko Galilea pɛŋ.” [

⁵³ Ni amɛteŋ mɔ fɛɛ mɔ tee ewe.