Yohane 3 - ŊMALƐ KRƆŊKRƆŊ LƐ

Yesu kɛ Nikodemo

¹ Nuu ko yɛ ni jɛ Farisifoi lɛ ateŋ ni atsɛɔ lɛ Nikodemo ni ji Yudafoi lɛ anukpa;

² lɛ eba Yesu ŋɔɔ nyɔɔŋ, ni ebakɛɛ lɛ akɛ, “Rabi, wɔle akɛ tsɔɔlɔ ni jɛ Nyɔŋmɔ ŋɔɔ ba ji bo; ejaakɛ mɔ ko nyɛŋ afee okadii ni ofeɔ nɛɛ, akɛ ja Nyɔŋmɔ kɛ mɔ lɛ yɛ.”

³ Yesu here nɔ ni ekɛɛ lɛ akɛ, “Anɔkwale mikɛɔ bo akɛ, kɛji ajɛɛɛ ŋwɛi afɔɔɔ mɔ ko lɛ, enyɛŋ Nyɔŋmɔ maŋtsɛyeli lɛ ena.”

⁴ Nikodemo bi lɛ akɛ, “Te aaafee tɛŋŋ ni be ni gbɔmɔ egbɔ lɛ ni aaafɔ lɛŋ? Ani eeenyɛ ebote enyɛ musu mli ekoŋŋ ni afɔ lɛ?”

⁵ Yesu here nɔ akɛ, “Miikɛɛ bo anɔkwale akɛ, kɛji ajɛɛɛ nu kɛ Mumɔ mli afɔɔɔ mɔ ko lɛ, enyɛŋ Nyɔŋmɔ maŋtsɛyeli lɛ mli ebote.

⁶ Nɔ ni ajɛ heloo mli afɔ lɛ, heloo ni; ni nɔ ni ajɛ Mumɔ mli afɔ lɛ, mumɔ ni.

⁷ Ohiɛ akafee bo yaa akɛ mikɛɛ bo akɛ, ‘ja ajɛ ŋwɛi afɔ nyɛ’ lɛ.

⁸ Kɔɔyɔɔ lɛ, he ni esumɔɔ etswaa kɛyaa, ni egbɛɛmɔ onuɔ, shi oleee he ni ejɛɔ kɛ he ni eyaa; nakai ji mɔ fɛɛ mɔ ni ajɛ Mumɔ mli afɔ lɛ lɛ.”

⁹ Nikodemo here nɔ ni ebi lɛ akɛ, “Te aaafee tɛŋŋ ni nii nɛɛ aaanyɛ aba mli hu?”

¹⁰ Yesu here nɔ ni ekɛɛ lɛ akɛ, “Te Israel tsɔɔlɔ ji bo? Ni oleee enɛɛmɛi nɛɛ?

¹¹ Miikɛɛ bo anɔkwale akɛ, nɔ ni wɔle lɛ, no wɔwieɔ; ni nɔ ni wɔna lɛ, no he odase wɔyeɔ; shi nyɛŋɔɔɔ wɔdase lɛ.

¹² Kɛ mikɛ nyɛ wie shikpɔŋ nɔ nii ahe ni nyɛheee nyɛyeee lɛ, te aaafee tɛŋŋ kɛji mikɛ nyɛ wie ŋwɛinii ahe ni nyɛaahe nyɛyeŋ?

¹³ Ni mɔ ko ekwɔko kɛyako ŋwɛi, akɛ ja mɔ ni jɛ ŋwɛi kpeleke shi lɛ, Gbɔmɔ Bi lɛ ni yɔɔ ŋwɛi lɛ.

¹⁴ Ni bɔ ni Mose wo onufu lɛ nɔ yɛ ŋa lɛ nɔ lɛ, nakai nɔŋŋ sa akɛ awo Gbɔmɔ Bi lɛ nɔ,

¹⁵ koni mɔ fɛɛ mɔ ni heɔ enɔ eyeɔ lɛ ana naanɔ wala.”

¹⁶ “Ejaakɛ nɛkɛ Nyɔŋmɔ sumɔ je lɛ, akɛ eŋɔ eBi koome lɛ ehã, koni mɔ fɛɛ mɔ ni heɔ enɔ yeɔ lɛ hiɛ akakpãtã, shi moŋ ena naanɔ wala.

¹⁷ Ejaakɛ Nyɔŋmɔ tsuuu eBi lɛ kɛbaaa je lɛ mli koni ebakojo je lɛ, shi moŋ koni atsɔ̃ enɔ ahere je lɛ yiwala.

¹⁸ Mɔ ni heɔ enɔ yeɔ lɛ, akojooo lɛ; shi mɔ ni heee yeee lɛ, akojo lɛ momo, ejaakɛ eheko Nyɔŋmɔ Bi koome lɛ gbɛi lɛ nɔ eyeko.

¹⁹ Shi kojomɔ lɛ nɛ, akɛ la lɛ eba je lɛ mli, ni gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ efɔ̃ɔji ni;

²⁰ ni mɔ fɛɛ mɔ ni tsuɔ nifɔɔjianii lɛ nyɛɔ la lɛ, ni ebaaa la lɛ he, koni akajie enitsumɔi lɛ ashi.

²¹ Shi mɔ ni feɔ anɔkwalenii lɛ baa la lɛ he, koni enitsumɔi lɛ aje kpo, ejaakɛ Nyɔŋmɔ mli atsu yɛ.”

Yohane odase kroko ni eye yɛ Yesu he

²² Nii nɛɛ asɛɛ lɛ, Yesu kɛ ekaselɔi lɛ ba Yudea shikpɔŋ lɛ nɔ, ni ekɛ amɛ bahi jɛi, ni ebaptisiɔ.

²³ Ni Yohane hu miibaptisi yɛ Ainon yɛ Salim masɛi, ejaakɛ nu pii yɛ jɛi, ni mɛi baa ni abaptisiɔ amɛ;

²⁴ ejaakɛ no mli lɛ anako awo Yohane tsuŋ.

²⁵ Agbɛnɛ naataamɔ bate shi yɛ Yohane kaselɔi lɛ kɛ Yudafonyo ko teŋ yɛ hetsuumɔ he.

²⁶ Ni amɛba Yohane ŋɔɔ ni amɛbakɛɛ lɛ akɛ, “Rabi, mɔ ni kɛ bo hi Yordan sɛɛ ni oye ehe odase lɛ, naa, lɛ diɛŋtsɛ eebaptisi, ni mɛi fɛɛ miiya eŋɔɔ.”

²⁷ Yohane here nɔ ni ekɛɛ, “Gbɔmɔ nyɛŋ ana nɔ ko, akɛ ja ajɛ ŋwɛi akɛhã lɛ.

²⁸ Nyɛ diɛŋtsɛ nyɛmiiye mi odase akɛ mikɛɛ akɛ, jeee mi ji Kristo lɛ, shi moŋ atsu mi kɛtsɔ̃ ehiɛ.

²⁹ Mɔ ni hiɛ ayɛmforo lɛ, lɛ ji ayɛmforowu; shi ayɛmforowu lɛ shieŋtsɛ ni damɔ shi boɔ lɛ toi lɛ, nya enyaa yɛ ayɛmforowu lɛ gbee hewɔ. No hewɔ lɛ, nɛkɛ minyamɔ nɛɛ eba mli.

³⁰ Lɛ lɛ, ja eshwere, ni mi lɛ, minɔ gbɔ.”

³¹ Mɔ ni jɛ ŋwɛi ba lɛ, efe mɛi fɛɛ. Mɔ ni jɛ shikpɔŋ nɔ lɛ, shikpɔŋ lɛ nɔ ejɛ, ni shikpɔŋ lɛ he ewieɔ. Mɔ ni jɛ ŋwɛi ba lɛ, efe mɛi fɛɛ,

³² ni nɔ ni ena ni enu lɛ, no he odase eyeɔ; ni mɔ ko mɔ ko eŋɔɔɔ edase lɛ.

³³ Mɔ ni ŋɔɔ edase lɛ, esɔo naa akɛ anɔkwafo ji Nyɔŋmɔ.

³⁴ Ejaakɛ mɔ ni Nyɔŋmɔ tsu lɛ, Nyɔŋmɔ wiemɔi ewieɔ; ejaakɛ jeee susumɔ Nyɔŋmɔ susuɔ Mumɔ lɛ ehãa lɛ.

³⁵ Tsɛ lɛ sumɔɔ Bi lɛ, ni etu nii fɛɛ ewo edɛŋ.

³⁶ Mɔ ni heɔ Bi lɛ nɔ eyeɔ lɛ, eyɛ naanɔ wala; shi mɔ ni booo Bi lɛ toi lɛ, enaŋ wala; shi moŋ Nyɔŋmɔ mlifu hiɔ enɔ.