Yohane 21 - ŊMALƐ KRƆŊKRƆŊ LƐ

Yesu jie ehe kpo etsɔ̃ɔ kaselɔi lɛ ateŋ mɛi kpawo

¹ Nii nɛɛ asɛɛ lɛ Yesu saa jie ehe kpo ekoŋŋ etsɔ̃ɔ kaselɔi lɛ yɛ Tiberia Ŋshɔ lɛ naa. Ni bɔ ni ejie ehe kpo etsɔ̃ɔ amɛ nɛ.

² Simon Petro kɛ Toma ni atsɛɔ lɛ Didimo lɛ, kɛ Natanael ni jɛ Kana yɛ Galilea lɛ, kɛ Zebedeo bii lɛ, kɛ ekaselɔi lɛ ateŋ mɛi krokomɛi enyɔ hu yɛ he kome kutuu.

³ Simon Petro kɛɛ amɛ akɛ, “Miiya wuo.” Amɛkɛɛ lɛ akɛ, “Wɔ hu wɔkɛ bo miiya.” Amɛyiŋ ni amɛyabote lɛlɛ mli, ni nakai nyɔɔŋ lɛ mli lɛ amɛgbeee nɔ ko.

⁴ Shi be ni je tsɛre lɛ, Yesu badamɔ ŋshɔ lɛ naa, shi kaselɔi lɛ leee akɛ lɛ ni.

⁵ Kɛkɛ ni Yesu bi amɛ akɛ, “Bii, nyɛyɛ niyenii ko lo?” Amɛhere lɛ nɔ akɛ, “Dabi.”

⁶ Ni ekɛɛ amɛ akɛ, “Nyɛfɔ̃a yaa lɛ yɛ lɛlɛ lɛ ninejurɔ gbɛ, ni nyɛaana nɔ ko.” Kɛkɛ ni amɛfɔ̃, ni loi lɛ afalɛ hewɔ lɛ amɛanyɛɛɛ yaa lɛ amɛgbala.

⁷ No hewɔ lɛ, kaselɔ ni Yesu sumɔɔ lɛ kɛɛ Petro akɛ, “Nuŋtsɔ lɛ ni.” Be ni Simon Petro nu akɛ Nuŋtsɔ lɛ ni lɛ, ekɛ etade lɛ ŋmɔ ehɛ, ejaakɛ eta shi yayai, ni etu egbee ŋshɔ lɛ mli.

⁸ Shi kaselɔi krokomɛi lɛ tsɔ̃ lɛlɛ bibioo lɛ mli kɛba, ejaakɛ amɛkɛ shikpɔŋ jekɛɛɛ, shi aaafee ninetalɔi oha loo nɔ kɛkɛ, ni amɛmiigbala yaa lɛ kɛ loo lɛ.

⁹ Shi be ni amɛkpeleke lɛ, amɛbana ŋãi kɛ la yɛ jɛi, ni loo jwere nɔ, kɛ aboloo.

¹⁰ Yesu kɛɛ amɛ akɛ, “Nyɛkɛ loo ni nyɛgbe bianɛ lɛ eko abaa.”

¹¹ Simon Petro tee lɛlɛ lɛ mli, ni eyagbala yaa lɛ kɛba shikpɔŋ kɛ emli loo wuji obɔ̃, oha kɛ nyɔŋmai enumɔ kɛ etɛ̃ ni loo lɛ fa nɛkɛ moŋ, shi kɛ̃lɛ yaa lɛ gbalaaa.

¹² Yesu kɛɛ amɛ akɛ, “Nyɛbaa nyɛbakpaa nyɛnaa nɔ ko.” Ni kaselɔi lɛ ateŋ mɔ ko ekaaa lɛ bimɔ akɛ, “Namɔ ji bo?” Ejaakɛ amɛle akɛ Nuŋtsɔ lɛ ni.

¹³ Kɛkɛ ni Yesu ba ni ebakɔ aboloo lɛ, ni ekɛhã amɛ, kɛ loo lɛ hu.

¹⁴ Enɛ ji shii etɛ̃ ni Yesu jie ehe kpo etsɔ̃ɔ ekaselɔi lɛ, be ni ete shi kɛjɛ gbohii ateŋ lɛ.

Yesu kɛ Petro

¹⁵ Be ni amɛye nii lɛ tã lɛ, Yesu bi Simon Petro akɛ, “Simon, Yona bi, oosumɔ mi fe mɛnɛɛmɛi lo?” Ekɛɛ lɛ akɛ, “Hɛɛ, Nuŋtsɔ, ole akɛ miisumɔ bo.” Yesu kɛɛ lɛ akɛ, “Lɛɛ mitoobii lɛ!”

¹⁶ Esaa ebi lɛ nɔ ni ji shi enyɔ akɛ, “Simon, Yona bi, oosumɔ mi lo?” Ekɛɛ lɛ akɛ, “Hɛɛ, Nuŋtsɔ, ole akɛ miisumɔ bo.” Yesu kɛɛ lɛ akɛ, “Kwɛmɔ mitoi lɛ!”

¹⁷ Ebi lɛ nɔ ni ji shii etɛ̃ akɛ, “Simon, Yona bi, oosumɔ mi lo?” Edɔ Petro akɛ ebi lɛ nɔ ni ji shii etɛ̃ akɛ, “Oosumɔ mi lo?” lɛ; ni ekɛɛ lɛ akɛ, “Nuŋtsɔ, ole nii fiaa, ole akɛ miisumɔ bo.” Yesu kɛɛ lɛ akɛ, “Lɛɛ mitoi lɛ!

¹⁸ Anɔkwale mikɛɔ bo akɛ, be ni oji oblanyo lɛ, bo diɛŋtsɛ omĩaa ni onyiɛɔ he ni osumɔɔ; shi kɛ ogbɔ lɛ, oookpã oniji amli, ni mɔ kroko aaamĩa bo, ni ekɛ bo aaatee he ni osumɔɔɔ.”

¹⁹ Shi ekɛɛ enɛ ekɛtsɔ̃ɔ nɔ gbele ni Petro baagbo kɛwo Nyɔŋmɔ hiɛ nyam. Ni be ni ekɛɛ enɛ lɛ, ekɛɛ lɛ akɛ, “Nyiɛmɔ misɛɛ!”

Kaselɔ ni Yesu sumɔɔ lɛ

²⁰ Shi be ni Petro tsɔ̃ ehe lɛ, ena kaselɔ ni Yesu sumɔɔ lɛ nyiɛ amɛsɛɛ; lɛ ji mɔ ni kpasa Yesu tsitsi yɛ niyenii lɛ ashi ni ebi lɛ akɛ, “Nuŋtsɔ namɔ baatsɔ̃ɔ osɛɛgbɛ lɛ?”

²¹ No hewɔ lɛ, be ni Petro na lɛ lɛ, ekɛɛ Yesu akɛ “Nuŋtsɔ, shi mɔ nɛ hu?”

²² Yesu kɛɛ lɛ akɛ, “Kɛji miisumɔ akɛ ehi shi kɛyashi mibaabe lɛ, mɛni no kɔɔ yɛ ohe? Bo lɛ nyiɛmɔ misɛɛ!”

²³ Kɛkɛ ni wiemɔ nɛɛ gbɛ shwã yɛ nyɛmimɛi lɛ ateŋ akɛ nakai kaselɔ lɛ gboŋ; tsɛ Yesu ekɛɛɛ lɛ akɛ egboŋ, shi moŋ ekɛɛ, “Kɛji miisumɔ akɛ ehi shi kɛyashi mibaabe lɛ, mɛni no kɔɔ yɛ ohe?”

²⁴ Mɔ nɛ ji kaselɔ ni yeɔ nii nɛɛ ahe odase lɛ, ni lɛ eŋma nii nɛɛ, ni wɔle akɛ edase lɛ anɔkwaleŋ.

²⁵ Shi nii krokomɛi pii hu yɛ ni Yesu fee, ni kɛji akɛɛ aaaŋma fɛɛ ekomekome lɛ, misusuɔ akɛ je lɛ diɛŋtsɛ nyɛŋ woji ni kulɛ aaaŋma lɛ eto.