Yohane 17 - ŊMALƐ KRƆŊKRƆŊ LƐ

Osɔfonukpa sɔlemɔ ni Yesu sɔle. Yesu sɔle hã ehe

¹ Be ni Yesu wie nii nɛɛ lɛ, ewo ehiɛ nɔ kɛtee ŋwɛi, ni ekɛɛ, “Ataa, ŋmɛlɛtswaa lɛ eshɛ; wo oBi lɛ hiɛ nyam, koni oBi lɛ hu awo ohiɛ nyam;

² tamɔ bɔ ni ohã lɛ hegbɛ yɛ gbɔmɛi fɛɛ anɔ, koni mɛi fɛɛ ni okɛhã lɛ lɛ, ehã amɛ naanɔ wala lɛ.

³ Shi enɛ ji naanɔ wala lɛ, akɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.

⁴ Miwo ohiɛ nyam yɛ shikpɔŋ lɛ nɔ, akɛni nitsumɔ lɛ ni okɛhã mi tsumɔ lɛ, migbe naa lɛ.

⁵ Ni agbɛnɛ, Ataa, kɛ anunyam ni miyɔɔ yɛ oŋɔɔ dani abɔ je lɛ awo mihiɛ nyam yɛ omasɛi.”

Yesu sɔle hã ekaselɔi lɛ

⁶ “Mijie ogbɛi lɛ shi mitsɔ̃ɔ gbɔmɛi ni okɛhã mi kɛjɛ je lɛŋ lɛ. Onii ji amɛ, ni okɛ amɛ hã mi, ni amɛye owiemɔ lɛ nɔ.

⁷ Agbɛnɛ amɛle akɛ nii fiaa ni okɛhã mi lɛ, oŋɔɔ ejɛ;

⁸ ejaakɛ wiemɔi lɛ ni okɛhã mi lɛ, mikɛhã amɛ; ni amɛmɔ mli, ni amɛna amɛle anɔkwale mli akɛ oŋɔɔ mijɛ, ni amɛhe amɛye akɛ bo otsu mi.

⁹ Amɛ mibiɔ mahã; jeee je lɛ mibiɔ mahã, shi moŋ mɛi ni okɛhã mi lɛ, ejaakɛ onii ji amɛ.

¹⁰ Minii fɛɛ lɛ onɔŋ, ni onii fɛɛ lɛ minɔŋ, ni mihiɛ eba nyam yɛ amɛmli.

¹¹ Mibɛ je lɛ mli dɔŋŋ, shi mɛnɛɛmɛi yɛ je lɛ mli, ni mi lɛ miiba oŋɔɔ. Ataa Krɔŋkrɔŋ, mɛi ni okɛhã mi lɛ, too amɛ yɛ ogbɛi lɛ mli, bɔ ni afee ni amɛfee ekome tamɔ wɔ.

¹² Be ni mikɛ amɛ yɔɔ lɛ, mito amɛ yɛ ogbɛi lɛ mli. Mɛi ni okɛhã mi lɛ, mibu amɛhe, ni amɛteŋ mɔ ko mɔ ko elaajeko, ja laajemɔ bi lɛ, koni nɔ ni aŋma lɛ aba mli.

¹³ Ni agbɛnɛ miiba oŋɔɔ, ni miiwie nii nɛɛ yɛ je lɛ mli, koni amɛna mimiishɛɛ lɛ ni eye emuu yɛ amɛmli.

¹⁴ Mikɛ owiemɔ lɛ ehã amɛ, ni je lɛ miinyɛ amɛ, ejaakɛ amɛjɛɛɛ je lɛ mli, tamɔ bɔ ni mi hu mijɛɛɛ je lɛ mli lɛ.

¹⁵ Mibiii akɛ ojie amɛ kɛjɛ je lɛ mli, shi moŋ akɛ ojie amɛ kɛjɛ mɔ fɔŋ lɛ dɛŋ ni oto amɛ shweshweeshwe.

¹⁶ Amɛjɛɛɛ je lɛ mli, tamɔ bɔ ni mi hu mijɛɛɛ je lɛ mli lɛ.

¹⁷ Feemɔ amɛ krɔŋkrɔŋ yɛ anɔkwale lɛ mli; owiemɔ lɛ anɔkwaleŋ.

¹⁸ Tamɔ bɔ ni otsu mi je lɛ mli lɛ, nakai nɔŋŋ mi hu mitsu amɛ je lɛ mli.

¹⁹ Ni amɛhewɔ mi diɛŋtsɛ mifeɔ mihe krɔŋkrɔŋ lɛ, koni amɛ hu afee amɛ krɔŋkrɔŋ yɛ anɔkwale mli.”

Yesu sɔle hã esɛɛnyiɛlɔi ni baaba

²⁰ “Shi jeee mɛnɛɛmɛi kɛkɛ mibiɔ mahã, shi miibi mahã mɛi ni baahe minɔ aye yɛ amɛwiemɔ naa lɛ hu;

²¹ bɔ ni afee ni amɛ fɛɛ amɛfee ekome, tamɔ bɔ ni bo, Ataa, oyɔɔ mimli ni mi hu miyɔɔ omli lɛ, koni amɛ hu amɛfee ekome yɛ wɔmli, ni je lɛ ahe aye akɛ bo otsu mi.

²² Ni anunyam ni okɛhã mi lɛ, mikɛhã amɛ, koni amɛfee ekome tamɔ bɔ ni wɔ hu wɔyɔɔ ekome lɛ.

²³ Miyɛ amɛmli, ni bo hu oyɛ mimli, koni amɛfee ekome kɛwula shi, ni je lɛ ale akɛ bo otsu mi, ni osumɔɔ amɛ tamɔ osumɔɔ mi lɛ.

²⁴ Ataa, mɛi ni okɛhã mi lɛ, miisumɔ akɛ he ni miyɔɔ lɛ amɛkɛ mi abahi jɛi, koni amɛna minunyam ni okɛhã mi lɛ, ejaakɛ osumɔ mi dani ato je lɛ shishi.

²⁵ Ataa Jalɔ, je lɛ leee bo, shi mi lɛ mile bo, ni mɛnɛɛmɛi le akɛ bo otsu mi;

²⁶ ni mijie ogbɛi lɛ kpo mitsɔ̃ɔ amɛ, ni masaa majie lɛ kpo matsɔ̃ɔ, koni suɔmɔ ni okɛsumɔ mi lɛ ahi amɛmli, ni mi hu mahi amɛmli.”