Yohane 16 - ŊMALƐ KRƆŊKRƆŊ LƐ

¹ “Mikɛɛ nyɛ nii nɛɛ, bɔ ni afee ni nyɛnane akatɔ̃tɔ̃.

² Amɛaashwie nyɛ kɛaajɛ kpeehei lɛ. Ni be baaba tete, ni mɔ fɛɛ mɔ ni gbeɔ nyɛ lɛ aaasusu akɛ ekɛmiija Nyɔŋmɔ.

³ Ni amɛaafee enɛɛmɛi, ejaakɛ amɛleee Tsɛ lɛ ni amɛleee mi hu.

⁴ Shi mikɛɛ nyɛ nii nɛɛ, koni kɛ be lɛ shɛ lɛ, ni nyɛkai akɛ mikɛɛ nyɛ. Shi kɛjɛ shishijee lɛ mikɛɛɛ nyɛ nii nɛɛ, ejaakɛ mikɛ nyɛ yɛ.”

Mumɔ Krɔŋkrɔŋ lɛ nitsumɔ

⁵ “Shi agbɛnɛ lɛ, miiya mɔ ni tsu mi lɛ ŋɔɔ, ni nyɛteŋ mɔ ko biii mi akɛ, ‘Nɛgbɛ oyaa?’

⁶ Shi ni mitsi nii nɛɛ atã mikɛɛ nyɛ hewɔ lɛ; ŋkɔmɔyeli eyi nyɛtsuiiaŋ obɔ̃.

⁷ Kɛ̃lɛ miikɛɛ nyɛ anɔkwale, ehi hã nyɛ akɛ matee; ejaakɛ kɛji miyaaa lɛ, Hefatalɔ lɛ baŋ nyɛŋɔɔ; shi kɛji mitee lɛ, matsu lɛ kɛba nyɛŋɔɔ.

⁸ Ni lɛ lɛ, kɛji eba lɛ, eeekã je lɛ yɛ esha kɛ jalɛ kɛ kojomɔ he.

⁹ Eeekã je lɛ yɛ esha he, ejaakɛ amɛheee minɔ amɛyeee;

¹⁰ eeekã je lɛ yɛ jalɛ he, ejaakɛ miiya Tsɛ lɛ ŋɔɔ, ni nyɛnaŋ mi dɔŋŋ;

¹¹ eeekã je lɛ yɛ kojomɔ he, ejaakɛ akojo je nɛɛŋ lumɔ lɛ momo.

¹² “Miyɛ nibii pii lolo ni makɛɛ nyɛ, shi nyɛnyɛŋ mli nyɛmɔ amrɔ nɛɛ.

¹³ Shi kɛji lɛ, anɔkwale Mumɔ lɛ, ena eba lɛ, eeetsɔ̃ɔ nyɛ anɔkwale lɛ fɛɛ mli gbɛ; ejaakɛ etoŋ lɛ diɛŋtsɛ eyiŋ ewieŋ; shi moŋ nɔ fɛɛ nɔ ni eeenu lɛ, no eeewie, ni nii ni baa lɛ, eeetsi tã etsɔ̃ɔ nyɛ.

¹⁴ Lɛ ebaawo mihiɛ nyam, ejaakɛ eeeŋɔ minɔ lɛ eko ni eeetsi tã etsɔ̃ɔ nyɛ.

¹⁵ Nii fiaa ni Tsɛ lɛ yɔɔ lɛ, minɔŋ; no hewɔ ni mikɛɛ akɛ, ebaaŋɔ minɔ lɛ eko, ni etsi tã etsɔ̃ɔ nyɛ lɛ.”

Haomɔ sɛɛ lɛ, miishɛɛ

¹⁶ “Eshwɛ fioo ni nyɛnaŋ mi, ni asaŋ eshwɛ fioo ni nyɛbaana mi, ejaakɛ miiya Tsɛ lɛ ŋɔɔ.”

¹⁷ Kɛkɛ ni ekaselɔi lɛ ateŋ mɛi komɛi bibii amɛhe akɛ, “Mɛni ji nɔ ni ekɛɔ wɔ nɛɛ, ‘Eshwɛ fioo ni nyɛnaŋ mi, ni asaŋ eshwɛ fioo ni nyɛbaana mi kɛ ejaakɛ miiya Tsɛ lɛ ŋɔɔ?’ ”

¹⁸ No hewɔ lɛ, amɛkɛɛ, “Mɛni ji ‘eshwɛ fioo’ lɛ ni ekɛɔ lɛ? Wɔleee nɔ ni ekɛɔ nɛɛ.”

¹⁹ Yesu na akɛ amɛmiitao akɛ amɛbiɔ lɛ, ni ekɛɛ amɛ akɛ, “Ni mikɛɛ akɛ eshwɛ fioo ni nyɛnaŋ mi, ni asaŋ eshwɛ fioo ni nyɛbaana mi lɛ, no he nii nyɛbibiɔ nyɛhe nɛɛ?

²⁰ Anɔkwale mikɛɔ nyɛ akɛ, nyɛ lɛ nyɛbaafo ni nyɛbaawo yara, shi je lɛ baanya; nyɛ lɛ nyɛbaaye ŋkɔmɔ, shi nyɛkɔmɔyeli lɛ aaatsɔ̃ miishɛɛ.

²¹ Kɛji yoo miikɔmɔ lɛ, ehaoɔ, ejaakɛ eŋmɛlɛtswaa lɛ eshɛ; shi kɛ efɔ bi lɛ sɛɛ lɛ, ekaiii hejaramɔ lɛ dɔŋŋ yɛ miishɛɛ ni enaa akɛ efɔ gbɔmɔ kɛba je lɛ mli lɛ hewɔ.

²² Nakai ji nyɛ hu; amrɔ nɛɛ nyɛmiiye ŋkɔmɔ; shi mibana nyɛ ekoŋŋ, ni nyɛtsui aaanyɔ nyɛmli ni nyɛmiishɛɛ lɛ mɔ ko shɔŋ yɛ nyɛdɛŋ.

²³ “Ni nakai gbi lɛ nɔ lɛ nyɛbiŋ mi nɔ ko nɔ ko. Anɔkwale mikɛɔ nyɛ akɛ, nɔ fɛɛ nɔ he fai ni nyɛaakpa Tsɛ lɛ yɛ migbɛi mli lɛ, eeehã nyɛ.

²⁴ Kɛbashi amrɔ nɛɛ lɛ nyɛbiko nɔ ko yɛ migbɛi mli; nyɛbia, ni nyɛaana, koni nyɛmiishɛɛ lɛ aye emuu.”

Miye je lɛ nɔ kunim

²⁵ “Nii nɛɛ, abɛbuai amli mikɛ nyɛ wieɔ yɛ nɛɛ. Be miiba, ni mikɛ nyɛ ewieŋ yɛ abɛbuai amli dɔŋŋ, shi moŋ faŋŋ majaje Tsɛ lɛ he sane matsɔ̃ɔ nyɛ.

²⁶ Nakai gbi lɛ nɔ lɛ nyɛaabi nɔ ni nyɛtaoɔ yɛ migbɛi mli, shi mikɛɛ nyɛ akɛ mi mabi Tsɛ lɛ mahã nyɛ;

²⁷ ejaakɛ Tsɛ lɛ diɛŋtsɛ miisumɔ nyɛ, akɛni nyɛsumɔ mi, ni nyɛhe nyɛye akɛ Nyɔŋmɔ ŋɔɔ mijɛ lɛ.

²⁸ Tsɛ lɛ ŋɔɔ mijɛ miba je lɛ mli, ni miije je lɛ mli maya Tsɛ lɛ ŋɔɔ ekoŋŋ.”

²⁹ Ekaselɔi lɛ kɛɛ lɛ akɛ, “Naa, agbɛnɛ oowie faŋŋ ni owieee yɛ abɛbua mli.

³⁰ Agbɛnɛ wɔna akɛ ole nii fɛɛ ni ehiaaa bo akɛ mɔ ko biɔ bo sane ko; enɛ wɔkɛheɔ wɔyeɔ akɛ Nyɔŋmɔ ŋɔɔ ojɛ.”

³¹ Yesu here amɛ nɔ akɛ, “Agbɛnɛ nyɛmiihe nyɛmiiye?

³² Naa; ŋmɛlɛtswaa lɛ miiba ni eshɛ po, ni nyɛbaagbɛ nyɛshwã ni mɔ fɛɛ mɔ aaaya emaŋ, ni nyɛaashi mi kome; shi kɛ̃lɛ jeee mi kome ni, ejaakɛ Tsɛ lɛ kɛ mi yɛ.

³³ Mikɛɛ nyɛ nii nɛɛ, koni nyɛna hejɔlɛ yɛ mimli. Je lɛ mli lɛ, nyɛbaana amanehulu, shi nyɛtsui anyɔa nyɛmli, miye je lɛ nɔ kunim.”