Yohane 15 - ŊMALƐ KRƆŊKRƆŊ LƐ

Yesu, anɔkwa waintso lɛ

¹ “Mi ji anɔkwa waintso lɛ, ni miTsɛ ji okwaafonyo lɛ.

² Mihe nine fɛɛ nine ni wooo yibii lɛ, efolɔɔ ni eko fɛɛ eko ni woɔ yibii lɛ, ekpɔlɔɔ he, bɔ ni afee ni ewo yibii pii fe tsutsu lɛ.

³ Nyɛhe etse momo yɛ wiemɔ ni mikɛ nyɛ ewie lɛ hewɔ.

⁴ Nyɛhia mimli, ni mi hu mahi nyɛmli. Tamɔ bɔ ni tso nine nyɛŋ awo yibii lɛ diɛŋtsɛ akɛ ja ema waintso lɛ he lɛ, nakai nyɛ hu nyɛnyɛŋ akɛ ja nyɛhi mimli.

⁵ “Mi ji waintso lɛ, nyɛ ji niji lɛ. Mɔ ni hiɔ mimli ni mi hu mihiɔ emli lɛ, lɛ ewoɔ yibii pii; ejaakɛ kɛjeee miŋ lɛ nyɛnyɛŋ nɔ ko nyɛfee.

⁶ Kɛji mɔ ko ehiii mimli lɛ, ashɛɔ lɛ afɔ̃ɔ tamɔ tso nine, ni egbiɔ, ni abuaa naa awoɔ la mli, ni ashãa.

⁷ Kɛji nyɛhi mimli ni miwiemɔi lɛ hi nyɛmli lɛ, nyɛaakpa nɔ fɛɛ nɔ ni nyɛtaoɔ he fai, ni aaafee ahã nyɛ.

⁸ Nɔ ni akɛwoɔ miTsɛ hiɛ nyam ji akɛ nyɛwo yibii pii, ni nyɛfee mikaselɔi.

⁹ “Bɔ ni Tsɛ lɛ sumɔ mi lɛ, nakai mi hu misumɔ nyɛ; nyɛhia misuɔmɔ lɛ mli.

¹⁰ Kɛji nyɛye mikitãi lɛ anɔ lɛ, nyɛaahi misuɔmɔ lɛ mli, tamɔ bɔ ni miye miTsɛ kitãi lɛ anɔ ni mihiɔ esuɔmɔ lɛ mli lɛ.

¹¹ “Mikɛ nyɛ ewie enɛɛmɛi, koni mimiishɛɛ lɛ ahi nyɛmli, ni nyɛmiishɛɛ lɛ aye emuu.

¹² Mikitã ji akɛ nyɛsumɔsumɔa nyɛhe tamɔ bɔ ni misumɔ nyɛ lɛ.

¹³ Mɔ ko bɛ suɔmɔ ni da fe enɛ, akɛ mɔ kɛ ewala aaaŋmɛ shi ahã eshieŋtsɛmɛi.

¹⁴ Kɛji nyɛfee nii ni miwoɔ nyɛ he kitã lɛ, no lɛ mishieŋtsɛmɛi ji nyɛ.

¹⁵ Mitsɛɛɛ nyɛ tsuji dɔŋŋ, ejaakɛ tsulɔ leee nɔ ni enuŋtsɔ feɔ, shi moŋ shieŋtsɛmɛi matsɛ nyɛ, ejaakɛ nii fɛɛ ni minu yɛ miTsɛ naa lɛ, mitsi tã mikɛɛ nyɛ.

¹⁶ Jeee nyɛ nyɛhala mi, shi mi moŋ mihala nyɛ, ni mito nyɛ koni nyɛ hu nyɛya ni nyɛyawo yibii, ni nyɛyibii lɛ ahi shi, koni nɔ fɛɛ nɔ he fai ni nyɛaakpa Tsɛ lɛ yɛ migbɛi mli lɛ, ehã nyɛ.

¹⁷ Enɛ ji kitã ni miwoɔ nyɛ, akɛ nyɛsumɔsumɔa nyɛhe.”

Je lɛ baanyɛ Yesu sɛɛnyiɛlɔi

¹⁸ “Kɛji je lɛ miinyɛ nyɛ lɛ, nyɛnaa nyɛlea akɛ mi tsutsu enyɛ.

¹⁹ Eji je lɛ mli nyɛjɛ kulɛ, je lɛ aaasumɔ nyɛ akɛ lɛ diɛŋtsɛ emɛi, shi akɛni nyɛjɛɛɛ je lɛ mli, shi moŋ mihala nyɛ kɛjɛ je lɛ mli hewɔ lɛ, je lɛ nyɛɔ nyɛ lɛ.

²⁰ Nyɛhiɛ ahia wiemɔ ni mikɛɛ nyɛ lɛ nɔ, akɛ, ‘Nyɔŋ efeee eNuŋtsɔ.’ Kɛ amɛwa mi yi lɛ, amɛaawa nyɛ hu yi; kɛ amɛye miwiemɔ nɔ lɛ, amɛaaye nyɛ hu nyɛnɔ nɔ.

²¹ Shi amɛkɛ enɛɛmɛi fɛɛ aaafee nyɛ yɛ migbɛi lɛ hewɔ; ejaakɛ amɛleee mɔ ni tsu mi lɛ.

²² Mibaaa mikɛ amɛ ebawieee jikulɛ, esha ko bɛ amɛhe; shi agbɛnɛ lɛ amɛbɛ amɛhe esha lɛ he naajiemɔ ko.

²³ Mɔ ni nyɛɔ mi lɛ eenyɛ miTsɛ hu.

²⁴ Eji mitsuuu nitsumɔi ni mɔ ko mɔ ko tsuko eko dã yɛ amɛteŋ kulɛ, esha ko bɛ amɛhe; shi agbɛnɛ lɛ amɛna, ni kɛ̃lɛ amɛmiinyɛ mi kɛ miTsɛ fɛɛ.

²⁵ Shi afee enɛ bɔ ni afee ni wiemɔ ni aŋma yɛ amɛMla lɛ mli akɛ, ‘Amɛnyɛ mi yakatswaa’ lɛ ana aba mli.

²⁶ “Shi Hefatalɔ lɛ ni mibatsu nyɛŋɔɔ kɛaajɛ Tsɛ lɛ ŋɔɔ lɛ, mɔ ni ji anɔkwale Mumɔ lɛ ni jɛɔ Tsɛ lɛ ŋɔɔ baa lɛ, kɛ eba lɛ, eeeye mihe odase;

²⁷ ni nyɛ hu nyɛaaye odase, ejaakɛ nyɛkɛ mi yɔɔ kɛjɛ shishijee.”