Yohane 14 - ŊMALƐ KRƆŊKRƆŊ LƐ

Yesu ji gbɛ lɛ

¹ “Nyɛkayea nyɛtsui; nyɛhea Nyɔŋmɔ nɔ nyɛyea, ni mi hu nyɛhea minɔ nyɛyea.

² Shihilɛhei pii yɛ miTsɛ we lɛ; jeee nakai ni kulɛ makɛɛ nyɛ akɛ miiya ni mayasaa gbɛhe mato nyɛ lo?

³ Ni kɛji mitee ni miyasaa gbɛhe mito nyɛ lɛ, mibaba ekoŋŋ ni mibaŋɔ nyɛ kɛya he ni mi diɛŋtsɛ miyɔɔ lɛ, koni he ni miyɔɔ lɛ nyɛ hu nyɛhi jɛi.

⁴ Ni he ni miyaa lɛ, nyɛle, ni gbɛ lɛ hu, nyɛle.”

⁵ Toma kɛɛ lɛ akɛ, “Nuŋtsɔ, wɔleee he ni oyaa, ni te aaafee tɛŋŋ ni wɔɔnyɛ gbɛ lɛ wɔle hu?”

⁶ Yesu kɛɛ lɛ akɛ, “Mi ji gbɛ lɛ kɛ anɔkwale lɛ kɛ wala lɛ; mɔ ko baaa Tsɛ lɛ ŋɔɔ, akɛ ja etsɔ̃ minɔ.

⁷ Eji nyɛle mi kulɛ, nyɛaale miTsɛ hu; ni kɛjɛ ŋmɛnɛ nɔ kɛyaa nɛɛ nyɛle lɛ, ni nyɛna lɛ.”

⁸ Filipo kɛɛ lɛ akɛ, “Nuŋtsɔ, tsɔ̃ɔmɔ wɔ Tsɛ lɛ, ni no fa hã wɔ.”

⁹ Yesu kɛɛ lɛ akɛ, “Kɛjɛ jeeŋmɔ ni mikɛ nyɛ yɔɔ nɛɛ, oleko mi lolo, Filipo? Mɔ ni ena mi lɛ, ena Tsɛ lɛ, ni te feɔ tɛŋŋ ni okɛɔ akɛ ‘Tsɔ̃ɔmɔ wɔ Tsɛ lɛ?’

¹⁰ Ani oheee oyeee akɛ miyɛ Tsɛ lɛ mli ni Tsɛ lɛ hu yɛ mimli? Wiemɔi ni mikɛ nyɛ wieɔ lɛ, jeee mi diɛŋtsɛ miyiŋ mitoɔ miwieɔ; shi Tsɛ lɛ ni hiɔ mimli lɛ, lɛ etsuɔ enitsumɔi lɛ.

¹¹ Nyɛhea mi nyɛyea akɛ miyɛ Tsɛ lɛ mli ni Tsɛ lɛ hu yɛ mimli; shi kɛji nyɛheee mi nyɛyeee lɛ, nyɛhea mi nyɛyea yɛ minitsumɔi lɛ ahewɔ.

¹² Anɔkwale mikɛɔ nyɛ akɛ, mɔ ni heɔ minɔ eyeɔ lɛ, nitsumɔi ni mitsuɔ lɛ, lɛ hu eeetsu, ni eeetsu nii ni fe nomɛi tete, ejaakɛ miiya Tsɛ lɛ ŋɔɔ.

¹³ Ni nɔ fɛɛ nɔ ni nyɛɛakpa he fai yɛ migbɛi mli lɛ, mafee, koni Tsɛ lɛ hiɛ aba nyam kɛtsɔ̃ Bi lɛ nɔ.

¹⁴ Kɛji nyɛkpa nɔ ko he fai yɛ migbɛi mli lɛ, mafee.”

Mumɔ Krɔŋkrɔŋ lɛ he shiwoo

¹⁵ “Kɛji nyɛmiisumɔ mi lɛ nyɛaaye mikitãi lɛ anɔ.

¹⁶ Ni mi lɛ mabi Tsɛ lɛ ni eeehã nyɛ Hefatalɔ kroko, koni ekɛ nyɛ ahi shi kɛya naanɔ;

¹⁷ Hefatalɔ ni ji anɔkwale Mumɔ lɛ ni je lɛ nyɛɛɛ lɛ aŋɔ, ejaakɛ enaaa lɛ ni asaŋ eleee lɛ lɛ; shi nyɛ lɛ nyɛle lɛ, ejaakɛ ekɛ nyɛ yɔɔ, ni eyɛ nyɛmli.

¹⁸ Mishiŋ nyɛ awusai; miiba nyɛŋɔɔ.

¹⁹ Eshwɛ fioo kɛkɛ ni je lɛ enaŋ mi dɔŋŋ; shi nyɛ lɛ nyɛaana mi; ejaakɛ mihiɛ kã, ni nyɛ hu nyɛhiɛ aaakã.

²⁰ Nakai gbi lɛ nɔ lɛ nyɛ diɛŋtsɛ nyɛaale akɛ miyɛ miTsɛ mli, ni nyɛ hu nyɛyɛ mimli, ni mi hu miyɛ nyɛmli.

²¹ Mɔ ni ŋɔɔ mikitãi lɛ ni eyeɔ nɔ lɛ, lɛ ji mɔ ni sumɔɔ mi; ni mɔ ni sumɔɔ mi lɛ, miTsɛ aaasumɔ lɛ, ni mi hu masumɔ lɛ, ni majie mihe shi matsɔ̃ɔ lɛ.”

²² Yuda, jeee Iskariot, bi lɛ akɛ, “Nuŋtsɔ, mɛni eba hewɔ ni wɔ pɛ obaajie ohe shi otsɔ̃ɔ, ni jeee je lɛ?”

²³ Yesu here nɔ ni ekɛɛ lɛ akɛ, “Kɛji mɔ ko miisumɔ mi lɛ, eeeye miwiemɔ lɛ nɔ, ni miTsɛ aaasumɔ lɛ, ni wɔɔba eŋɔɔ, ni wɔkɛ lɛ aaahi shi.

²⁴ Mɔ ni sumɔɔɔ mi lɛ, eyeee miwiemɔi lɛ anɔ; ni wiemɔ ni nyɛnuɔ lɛ jeee minɔŋ, shi moŋ Tsɛ ni tsu mi lɛ nɔŋ.

²⁵ “Miikɛɛ nyɛ nii nɛɛ be mli ni mikɛ nyɛ yɔɔ nɛɛ.

²⁶ Shi Hefatalɔ lɛ ni ji Mumɔ Krɔŋkrɔŋ lɛ, mɔ ni Tsɛ lɛ baatsu yɛ migbɛi mli lɛ, lɛ eeetsɔ̃ɔ nyɛ nii fɛɛ, ni eeekai nyɛ nii fɛɛ ni mikɛɛ nyɛ lɛ.

²⁷ “Hejɔlɛ mishiɔ mahã nyɛ, hejɔlɛ ni ji minɔ lɛ mikɛhãa nyɛ, jeee bɔ ni je lɛ hãa lɛ mihãa nyɛ nɛɛ. Nyɛtsui akayea, ni asaŋ nyɛkashea gbeyei.

²⁸ Nyɛnu akɛ mikɛɛ nyɛ akɛ, Miiya, ni mibaba nyɛŋɔɔ. Nyɛmiisumɔ mi kulɛ, nyɛaana miishɛɛ akɛ miiya Tsɛ lɛ ŋɔɔ, ejaakɛ miTsɛ da fe mi.

²⁹ Ni agbɛnɛ mikɛɛ nyɛ dani eba mli, koni kɛ eba mli lɛ, ni nyɛhe nyɛye.

³⁰ Mikɛ nyɛ ewieŋ nibii pii dɔŋŋ, ejaakɛ je lɛ mli lumɔ lɛ miiba, ni ebɛ hewalɛ ko yɛ minɔ;

³¹ shi bɔ ni afee ni je lɛ ana ale akɛ miisumɔ Tsɛ lɛ, ni bɔ ni Tsɛ lɛ wo mi kitã lɛ nakai mifeɔ lɛ. Nyɛtea shi, nyɛhãa wɔjea biɛ wɔyaa.”