Yohane 12 - ŊMALƐ KRƆŊKRƆŊ LƐ

Afɔ Yesu mu yɛ Betania

¹ Be ni eshwɛ gbii ekpaa ni ayeɔ Hehoo lɛ, Yesu ba Betania, he ni Lazaro, mɔ ni etee lɛ shi kɛjɛ gbohii ateŋ lɛ, yɔɔ lɛ.

² Amɛŋmɛ lɛ okplɔ̃ yɛ jɛi, ni Marta sɔmɔ; ni Lazaro fata mɛi ni kɛ lɛ tara okplɔ̃ lɛ he lɛ ahe.

³ Kɛkɛ ni Maria ŋɔ “nardo” mu ŋmiiŋmi ni jara wa naakpa ni etsiimɔ ji nsɛnitɛ kome, ni ekɛkpa Yesu naji ahe ni ekɛ eyitsɔi tsumɔ enaji lɛ ahe; ni mu lɛ ŋma yi shĩa lɛ mli tɔ.

⁴ Shi Yuda Iskariot, ekaselɔi lɛ ateŋ mɔ kome ni baatsɔ̃ɔ esɛɛgbɛ lɛ, kɛɛ,

⁵ “Mɛɛ hewɔ ahɔ̃ɔɔ mu nɛɛ denarioi ohai etɛ̃ ni akɛ shika lɛ ahã ohiafoi?”

⁶ Shi enɛ ni ekɛɛ nɛɛ, jeee ohiafoi lɛ ahe ni dɔɔ lɛ hewɔŋ, shi moŋ julɔ ji lɛ, ni lɛ etoɔ fotro lɛ, ni ejuɔ nɔ ni akɛwoɔ mli lɛ.

⁷ No hewɔ lɛ, Yesu kɛɛ, “Kaagba enaa; efee enɛ eto mifuu gbi lɛ.

⁸ Ejaakɛ ohiafoi lɛ, nyɛkɛ amɛ yɛ daa; shi mi lɛ, jeee daa nyɛkɛ mi aaahi shi.”

Atee Lazaro yinɔ apam

⁹ Agbɛnɛ Yudafoi lɛ ateŋ mɛi pii na le akɛ Yesu yɛ jɛi, ni amɛba, jeee Yesu kɛkɛ hewɔ, shi moŋ koni amɛna Lazaro, mɔ ni etee lɛ shi kɛjɛ gbohii ateŋ lɛ hu.

¹⁰ Ni osɔfonukpai lɛ kpɛ mli akɛ amɛaagbe Lazaro hu,

¹¹ ejaakɛ ehewɔ jɛ ni Yudafoi lɛ ateŋ mɛi pii tee ni amɛyahe Yesu nɔ amɛye lɛ.

Yesu Yerusalɛm botemɔ

¹² Enɔ jetsɛremɔ be ni mɛi babaoo ni eba gbijurɔ lɛ nu akɛ Yesu miiba Yerusalɛm lɛ,

¹³ amɛkɔlɔ blɛoi, ni amɛje kpo amɛyakpee lɛ, ni amɛbolɔ akɛ “Hosiana! Ajɔɔ mɔ ni baa yɛ Nuŋtsɔ lɛ gbɛi mli lɛ, Israel Maŋtsɛ lɛ!”

¹⁴ Shi Yesu ena teji bi ko ni eho eta nɔ, tamɔ bɔ ni aŋma lɛ akɛ,

¹⁵ “Kaashe gbeyei, Zion biyoo! Naa, omaŋtsɛ lɛ miiba. Eta tejibi nɔ.”

¹⁶ Shi ekaselɔi lɛ enaaa nii nɛɛ ashishi mra mli, shi be ni awo Yesu hiɛ nyam lɛ, no dani amɛkai akɛ aŋma nii nɛɛ yɛ ehe, ni no afee ahã lɛ lɛ.

¹⁷ No hewɔ lɛ, asafo ni kɛ lɛ yɔɔ be mli ni etsɛ Lazaro kɛjɛ gbonyobu lɛ mli ni etee lɛ shi kɛjɛ gbohiiateŋ lɛ ye he odase.

¹⁸ Enɛ hewɔ hu ni asafo lɛ yakpee lɛ lɛ, ejaakɛ amɛnu akɛ efee naakpɛɛnii nɛɛ.

¹⁹ No hewɔ lɛ, Farisifoi lɛ kɛɛ yɛ amɛteŋ akɛ, “Te nyɛna akɛ nyɛnyɛɛɛ fɛi nyɛfee! Naa, je lɛ efã kɛnyiɛ esɛɛ lɛ!”

Helabii komɛi batao Yesu

²⁰ Shi Helabii komɛi yɛ mɛi ni ba koni amɛbaja Nyɔŋmɔ yɛ gbijurɔ lɛ nɔ lɛ ateŋ.

²¹ Mɛnɛɛmɛi ba Filipo ni jɛ Betsaida yɛ Galilea lɛ ŋɔɔ, ni amɛbakɛɛ lɛ akɛ, “Nuŋtsɔ, wɔmiitao akɛ wɔna Yesu.”

²² Filipo ba ni ebakɛɛ Andrea, ni Andrea kɛ Filipo bakɛɛ Yesu.

²³ Ni Yesu here amɛ nɔ ekɛɛ, “Ŋmɛlɛtswaa ni akɛbaawo Gbɔmɔ Bi lɛ hiɛ nyam lɛ eshɛ.

²⁴ Anɔkwale mikɛɔ nyɛ akɛ, kɛ ŋmaa kuli enyɔɔɔ shikpɔŋ ni egbo lɛ, no lɛ eyɛ akɛ ŋmaa kuli kome lɛ nɔŋŋ; shi kɛji egbo lɛ, ewoɔ yibii pii.

²⁵ Mɔ ni dɔɔ ewala he lɛ, elaajeɔ lɛ, shi mɔ ni nyɛɔ ewala yɛ je nɛɛ mli lɛ, eeeto lɛ kɛaatee naanɔ wala mli.

²⁶ Kɛji mɔ ko miisɔmɔ mi lɛ, enyiɛ misɛɛ, ni he ni miyɔɔ lɛ, jɛi misɔ̃ɔlɔ lɛ hu aaahi; kɛji mɔ ko miisɔmɔ mi lɛ, miTsɛ aaawo lɛ.”

Sa akɛ awo Gbɔmɔ Bi lɛ nɔ

²⁷ “Agbɛnɛ misusuma miihao, ni mɛni makɛɛ? Ataa, heremɔ mi kɛjɛ ŋmɛlɛtswaa nɛɛ mli! Shi asaŋ enɛ hewɔ miba ŋmɛlɛtswaa nɛɛ mli lɛ.

²⁸ Ataa, wo ogbɛi lɛ hiɛ nyam!” Kɛkɛ ni gbee ko jɛ ŋwɛi kɛɛ, “Mina miwo ehiɛ nyam, ni masaa mawo ehiɛ nyam ekoŋŋ.”

²⁹ Kɛkɛ ni asafo ni damɔ jɛi ni nu lɛ kɛɛ akɛ, “Nyɔŋmɔ eshi!” Mɛi komɛi hu kɛɛ, “Ŋwɛi bɔfo ko kɛ lɛ ewie!”

³⁰ Yesu here nɔ ni ekɛɛ, “Jeee mi hewɔ gbee nɛɛ ba, shi nyɛ moŋ nyɛhewɔ.

³¹ Agbɛnɛ je nɛɛŋ kojomɔ lɛ eshɛ; agbɛnɛ abaafã je nɛɛŋ lumɔ lɛ ashɛ afɔ̃.

³² Ni mi lɛ, kɛji awo minɔ kɛjɛ shikpɔŋ lɛ nɔ lɛ, magbala mɛi fɛɛ kɛaaba miŋɔɔ.”

³³ Shi enɛ lɛ ekɛɛ ekɛtsɔ̃ɔ nɔ gbele ni ebaagbo.

³⁴ Asafo lɛ here lɛ nɔ akɛ, “Wɔ lɛ wɔnu yɛ Mla lɛ mli akɛ Kristo lɛ hiɔ shi kɛyaa naanɔ; ni te feɔ tɛŋŋ ni bo lɛ okɛɔ akɛ ja awo Gbɔmɔ Bi lɛ nɔ lɛ? Namɔ ji nɛkɛ Gbɔmɔ Bi nɛɛ?”

³⁵ Kɛkɛ lɛ Yesu kɛɛ amɛ akɛ, “Be kukuoo kɛkɛ eshwɛ ehã la lɛ yɛ nyɛteŋ. Gbii abɔ ni nyɛyɔɔ la lɛ nɛɛ, nyɛnyiɛa koni duŋ akabanina nyɛ; shi mɔ ni nyiɛɔ duŋ mli lɛ, eleee he ni eyaa.

³⁶ Gbii abɔ ni nyɛyɔɔ la lɛ nɛɛ, nyɛhea la lɛ nɔ nyɛyea, koni nyɛtsɔ̃mɔ la bii.” Yesu wie nii nɛɛ, ni eyiŋ etee ni ekɛ ehe tee amɛ.

Yudafoi lɛ heee Yesu nɔ amɛyeee

³⁷ Efee naakpɛɛnii babaoo yɛ amɛhiɛ, shi kɛ̃lɛ amɛheee enɔ amɛyeee,

³⁸ koni gbalɔ Yesaia wiemɔ ni ewie lɛ ana aba mli akɛ, “Nuŋtsɔ, namɔ ehe wɔsane lɛ eye, Ni namɔ ajie Nuŋtsɔ lɛ hewalɛ lɛ kpo atsɔ̃ɔ?”

³⁹ Enɛ hewɔ ni amɛnyɛɛɛ amɛhe amɛye lɛ, ejaakɛ Yesaia saa kɛɛ ekoŋŋ akɛ,

⁴⁰ “Eshwila amɛhiŋmɛii, ni ekpliŋ amɛtsui; koni amɛkana kɛ amɛhiŋmɛii, ni amɛna naa kɛ amɛtsui, ni amɛku amɛsɛɛ ni mitsa amɛ.”

⁴¹ Nii nɛɛ Yesaia kɛɛ, ejaakɛ ena enunyam lɛ, ni ewie ehe.

⁴² Kɛ̃lɛ onukpai lɛ tete ateŋ mɛi pii he enɔ ye; shi Farisifoi lɛ ahewɔ lɛ amɛjajeee faŋŋ, koni akashwie amɛ kɛjɛ kpeehe lɛ;

⁴³ ejaakɛ amɛmiisumɔ gbɔmɛi ahiɛnyam fe Nyɔŋmɔ nɔ.

Yesu wiemɔ kojoɔ

⁴⁴ Shi Yesu bo ekɛɛ akɛ, “Mɔ ni heɔ minɔ yeɔ lɛ, jeee mi minɔ eheɔ eyeɔ lɛ, shi moŋ mɔ ni tsu mi lɛ;

⁴⁵ ni mɔ ni naa mi lɛ naa mɔ ni tsu mi lɛ.

⁴⁶ Mi lɛ miba je lɛ mli akɛ la, koni mɔ fɛɛ mɔ ni heɔ minɔ eyeɔ lɛ akahi duŋ lɛ mli.

⁴⁷ Ni kɛji mɔ ko nu miwiemɔi lɛ ni eyeee nɔ lɛ, mikojooo lɛ; ejaakɛ mibaaa koni mibakojo je lɛ, shi moŋ miba koni mibahere je lɛ yiwala.

⁴⁸ Mɔ ni kwaa mi ni emɔɔɔ miwiemɔi lɛ amli lɛ, eyɛ mɔ ko ni kojoɔ lɛ. Wiemɔ ni miwie lɛ, no nɔŋŋ aaakojo lɛ yɛ naagbee gbi lɛ nɔ.

⁴⁹ Ejaakɛ mi lɛ mitooo mi diɛŋtsɛ miyiŋ miwieee; shi Tsɛ ni tsu mi lɛ, lɛ moŋ ewo mi kitã, nɔ ni mikɛɛ kɛ nɔ ni miwie.

⁵⁰ Ni mile akɛ ekitã lɛ naanɔ wala ni; no hewɔ lɛ, nɔ fɛɛ nɔ ni miwieɔ lɛ, bɔ ni Tsɛ lɛ ekɛɛ mi lɛ, nakai miwieɔ.”