Yohane 11 - ŊMALƐ KRƆŊKRƆŊ LƐ

Lazaro gbele

¹ Nuu ko ni atsɛɔ lɛ Lazaro ni jɛ Betania, Maria kɛ enyɛmi Martamɛi akrowa lɛ, he miiye. [

² Maria ni kɛ mukɛŋma kpa Nuŋtsɔ lɛ ni ekɛ eyitsɔi tsumɔ lɛ nyɛmi Lazaro he yeɔ nɛɛ.]

³ No hewɔ lɛ, enyɛmimɛi yei lɛ tsu aba eŋɔɔ abakɛɛ akɛ, “Nuŋtsɔ, naa, mɔ ni osumɔɔ lɛ he miiye.”

⁴ Shi be ni Yesu nu enɛ lɛ, ekɛɛ, “Nɛkɛ hela nɛɛ jeee gbele hela ni, shi moŋ Nyɔŋmɔ anunyam lɛ hewɔ eba, bɔ ni afee ni atsɔ̃ nɔ awo Nyɔŋmɔ Bi lɛ hiɛ nyam.”

⁵ Yesu sumɔɔ Maria kɛ enyɛmi yoo lɛ kɛ Lazaro fɛɛ.

⁶ Shi be ni enu akɛ ehe miiye lɛ, emɛ yɛ he ni eyɔɔ lɛ gbii enyɔ.

⁷ Ni no sɛɛ lɛ ekɛɛ ekaselɔi lɛ akɛ, “Nyɛhãa wɔyaa Yudea ekoŋŋ.”

⁸ Kaselɔi lɛ kɛɛ lɛ akɛ, “Tsɔɔlɔ, eyeko gbi ko ni Yudafoi lɛ tao bo tɛi atswia lɛ, ni ooya jɛi ekoŋŋ lo?”

⁹ Yesu here nɔ akɛ, “Ani jeee ŋmɛlɛtswai nyɔŋma kɛ enyɔ yɔɔ gbi kome mli? Kɛji mɔ nyiɛ shwane lɛ, etɛɛɛ, ejaakɛ enaa je nɛɛ mli la lɛ.

¹⁰ Shi kɛji mɔ nyiɛ nyɔɔŋ lɛ, etɛɔ, ejaakɛ la bɛ.”

¹¹ Ewie nii nɛɛ, ni no sɛɛ lɛ ekɛɛ amɛ akɛ, “Wɔshieŋtsɛ Lazaro ewɔ; shi miiya ni mayatsĩɛ lɛ.”

¹² Kɛkɛ ni ekaselɔi lɛ kɛɛ, “Nuŋtsɔ, kɛ wɔ ewɔ lɛ, no lɛ ehe baawa lɛ.”

¹³ Shi egbele he Yesu wie lɛ; shi amɛ lɛ amɛsusu akɛ wɔ kpakpa he ewieɔ lɛ.

¹⁴ Agbɛnɛ Yesu kɛɛ amɛ faŋŋ akɛ, “Lazaro egbo;

¹⁵ ni nyɛ hewɔ lɛ eŋɔɔ minaa akɛ mibɛ jɛi, bɔ ni afee ni nyɛhe nyɛye; shi nyɛhãa wɔyaa eŋɔɔ.”

¹⁶ Kɛkɛ lɛ Toma, mɔ ni atsɛɔ lɛ Didimo lɛ, kɛɛ enanemɛi kaselɔi lɛ akɛ, “Nyɛhãa wɔ hu wɔyaa, ni wɔ kɛ lɛ ayagboa.”

Yesu, mɔ ni ji Shitee lɛ kɛ Wala lɛ

¹⁷ Agbɛnɛ, be ni Yesu shɛ jɛi lɛ, ebana akɛ eye gbii ejwɛ momo yɛ bu lɛ mli.

¹⁸ Shi Betania kɛ Yerusalɛm teŋ jekɛmɔ aaafee shitoi enyɔ.

¹⁹ Ni Yudafoi lɛ ateŋ mɛi pii eba Marta kɛ Mariamɛi aŋɔɔ, koni amɛbaye amɛ ŋkɔmɔ yɛ amɛnyɛmi nuu lɛ hewɔ.

²⁰ Kɛkɛ lɛ, be ni Marta nu akɛ Yesu miiba lɛ, etee eyakpee lɛ; shi Maria lɛ, lɛ lɛ eta shĩa lɛ.

²¹ Kɛkɛ ni Marta bakɛɛ Yesu akɛ, “Nuŋtsɔ, eji oyɛ biɛ kulɛ, minyɛmi lɛ gboŋ.

²² Shi agbɛnɛ hu mile akɛ nɔ fɛɛ nɔ ni ooobi Nyɔŋmɔ lɛ, Nyɔŋmɔ aaahã bo.”

²³ Yesu kɛɛ lɛ akɛ, “Onyɛmi lɛ baate shi.”

²⁴ Marta kɛɛ lɛ akɛ, “Mile akɛ ebaate shi yɛ gbohiiashitee lɛ mli yɛ naagbee gbi lɛ nɔ.”

²⁵ Yesu kɛɛ lɛ akɛ, “Mi lɛ mi ji shitee lɛ kɛ wala lɛ; mɔ ni heɔ minɔ yeɔ lɛ, kɛji egbo tete lɛ, ehiɛ aaakã;

²⁶ ni mɔ fɛɛ mɔ ni hiɛ kã ni eheɔ minɔ eyeɔ lɛ, egboŋ gbi ko gbi ko kɛaatee naanɔ. Oheɔ enɛ oyeɔ lo?”

²⁷ Ekɛɛ lɛ akɛ, “Hɛɛ, Nuŋtsɔ, miheɔ miyeɔ akɛ bo ji Kristo, Nyɔŋmɔ Bi lɛ ni baa je lɛ mli lɛ.”

Yesu fo

²⁸ Ni be ni ekɛɛ nɛkɛ lɛ, eyiŋ etee ni eyatsɛ enyɛmi Maria lɛ nigii, ekɛɛ, “Nuŋtsɔ lɛ eba; eetsɛ bo.”

²⁹ Be ni enu lɛ, ete shi oya ni eba eŋɔɔ.

³⁰ Shi Yesu nako ashɛ akrowa lɛ, shi eyɛ hegbɛ ni Marta kɛ lɛ yakpe yɛ lɛ lolo.

³¹ Be ni Yudafoi lɛ ni kɛ lɛ yɔɔ shĩa lɛ ni amɛyeɔ lɛ ŋkɔmɔ lɛ na akɛ Maria ete shi oya kɛje kpo lɛ, amɛtiu lɛ, amɛsusu akɛ eeya fuuhe lɛ eyafo yɛ jɛi.

³² Kɛkɛ lɛ, be ni Maria ba he ni Yesu yɔɔ lɛ ni ena lɛ lɛ, eho egbee enaji anaa, ni ekɛɛ lɛ akɛ, “Nuŋtsɔ, eji oyɛ biɛ kulɛ, minyɛmi lɛ gboŋ!”

³³ Agbɛnɛ, be ni Yesu na lɛ akɛ eefo, kɛ Yudafoi lɛ hu ni kɛ lɛ ba lɛ, akɛ amɛ hu amɛmiifo lɛ, ehũu yɛ emumɔ mli, ni ehao;

³⁴ ni ekɛɛ, “Nɛgbɛ nyɛto lɛ yɛ?” Amɛkɛɛ lɛ akɛ, “Nuŋtsɔ, ba ni obakwɛ.”

³⁵ Yesu fo.

³⁶ Kɛkɛ ni Yudafoi lɛ kɛɛ, “Kwɛ bɔ ni esumɔɔ lɛ!”

³⁷ Shi amɛteŋ mɛi komɛi kɛɛ, “Ani nuu nɛɛ ni gbele shwilafo lɛ hiŋmɛii lɛ nyɛŋ efee ni kulɛ nuu nɛɛ akagbo?”

Yesu tee Lazaro shi

³⁸ Kɛkɛ ni Yesu saa hũu yɛ emli ekoŋŋ, ni etee fuuhe lɛ; shi tɛkplo ni, ni tɛ bu naa.

³⁹ Yesu kɛɛ, “nyɛjiea tɛ lɛ.” Marta, mɔ ni egbo lɛ nyɛmi yoo lɛ kɛɛ akɛ, “Nuŋtsɔ, be nɛ mli lɛ efite, ejaakɛ eye gbii ejwɛ sɔŋŋ.”

⁴⁰ Yesu kɛɛ lɛ akɛ, “Ani mikɛɛɛ bo akɛ kɛji ohe oye lɛ, ooona Nyɔŋmɔ anunyam lɛ?”

⁴¹ No hewɔ lɛ, amɛ jie tɛ lɛ. Ni Yesu hole ehiŋmɛii anɔ kɛtee ŋwɛi ni ekɛɛ, “Ataa, miida bo shi akɛ obo mi toi lɛ.

⁴² Mile akɛ daa oboɔ mi toi, shi asafo lɛ ni damɔ biɛ lɛ hewɔ mikɛɔ enɛ, koni amɛhe amɛye akɛ bo otsu mi.”

⁴³ Ni be ni ewie nɛkɛ lɛ, ebo kɛ gbee ni wa akɛ, “Lazaro ee, jee kpo!”

⁴⁴ Ni gbonyo lɛ je kpo, fuu mamai lɛ fimɔ enaji kɛ eniji, ni duku fi ehiɛ. Yesu kɛɛ amɛ akɛ, “Nyɛfɛnea lɛ, ni nyɛhãa eyaa.”

Atee Yesu yi nɔ apam ni agbe lɛ

⁴⁵ No hewɔ lɛ, Yudafoi lɛ ni ba Maria ŋɔɔ lɛ ateŋ mɛi pii he Yesu nɔ amɛye, be ni amɛna nii ni efee lɛ.

⁴⁶ Shi amɛteŋ mɛi komɛi yiŋ tee Farisifoi lɛ aŋɔɔ, ni amɛyagba amɛ nii ni Yesu fee lɛ.

⁴⁷ No hewɔ lɛ, osɔfonukpai lɛ kɛ Farisifoi lɛ tsɛ kpee, ni amɛkɛɛ, “Te wɔfeɔ tɛŋŋ, ejaakɛ nuu nɛɛ miifee naakpɛɛnii pii?

⁴⁸ Kɛji wɔŋmɛ lɛ gbɛ nɛkɛ lɛ, mɛi fɛɛ aaahe enɔ aye; ni Romabii lɛ aaaba ni amɛaabashɔ̃ wɔsɔlemɔ we lɛ kɛ wɔshikpɔŋ lɛ fɛɛ.”

⁴⁹ Shi amɛteŋ mɔ kome, Kaiafa ni yeɔ osɔfonukpa yɛ nakai afi lɛ nɔ lɛ, kɛɛ amɛ akɛ, “Nyɛ lɛ nyɛleee nɔ ko kwraa,

⁵⁰ ni nyɛsaa nyɛjwɛŋŋ hu akɛ ehi hã wɔ akɛ mɔ kome agbo yɛ maŋ lɛ najiaŋ, fe nɔ ni maŋbii lɛ fɛɛ hiɛ aaakpãtã lɛ.”

⁵¹ Shi enɛ lɛ, jeee lɛ diɛŋtsɛ eto eyiŋ ewie, shi moŋ, akɛ osɔfonukpa yɛ nakai afi lɛ nɔ lɛ, gba egba akɛ Yesu baagbo yɛ maŋ lɛ najiaŋ lɛ;

⁵² ni jeee yɛ maŋ lɛ najiaŋ hewɔ kɛkɛ, shi bɔ ni afee ni ebua Nyɔŋmɔ bii ni egbɛ eshwã lɛ hu naa efee kuu kome.

⁵³ Ni kɛjɛ nakai gbi lɛ nɔ lɛ amɛkpɛ mli akɛ amɛbaagbe lɛ.

⁵⁴ No hewɔ lɛ, Yesu ejieee ehe kpo faŋŋ kɛnyiɛɛɛ yɛ Yudafoi lɛ ateŋ dɔŋŋ, shi eje jɛi etee shikpɔŋ ko ni kã ŋa lɛ naa lɛ nɔ, yɛ maŋ ko ni atsɛɔ lɛ Efraim lɛ mli, ni ekɛ ekaselɔi lɛ yahi jɛi.

⁵⁵ Agbɛnɛ Yudafoi lɛ aHehoo lɛ eshɛ etã. Ni mɛi babaoo jɛ koi asɛɛ amɛtee Yerusalɛm, dani Hehoo lɛ ashɛ, koni amɛyatsuu amɛhe.

⁵⁶ Kɛkɛ ni amɛbɔ̃i Yesu taomɔ, ni be ni amɛdamɔdamɔɔ shi yɛ Sɔlemɔ we lɛ, amɛbibii amɛhe akɛ, “Te nyɛsusuɔ tɛŋŋ, ani ebaŋ gbijurɔ lɛ?”

⁵⁷ Shi osɔfonukpai lɛ kɛ Farisifoi lɛ ewo kitã akɛ, kɛ mɔ ko le he ni eyɔɔ lɛ, etswa adafi, koni ayamɔ lɛ.