Yohane 10 - ŊMALƐ KRƆŊKRƆŊ LƐ

Toi atsu lɛ he abɛ lɛ

¹ “Anɔkwale mikɛɔ nyɛ akɛ, Mɔ ni tsɔ̃ɔɔ shinaa lɛ ni ekɛbote toi atsu lɛ mli, shi moŋ etsɔ̃ɔ he kroko ekɛkwɔɔ lɛ, julɔ kɛ ojotswalɔ ji lɛ.

² Shi mɔ ni tsɔ̃ɔ shinaa lɛ mli kɛboteɔ mli lɛ, toi lɛ akwɛlɔ ji lɛ.

³ Lɛ shinaa naabulɔ lɛ gbeleɔ, ni toi lɛ nuɔ egbee, ni ekɛ lɛ diɛŋtsɛ etoi lɛ agbɛi tsɛɔ amɛ, ni ekɛ amɛ jeɔ kpo.

⁴ Ni kɛ ejie toi lɛ fɛɛ lɛ, enyiɛɔ amɛhiɛ, ni toi lɛ nyiɛɔ esɛɛ, ejaakɛ amɛle egbee.

⁵ Amɛnyiɛŋ mɔkpɔŋ sɛɛ, shi moŋ amɛaajo enaa foi, ejaakɛ amɛleee mɛi kpɔji agbee.”

⁶ Yesu bu amɛ abɛ nɛɛ; shi amɛ lɛ amɛnuuu nɔ ni ekɛ amɛ wieɔ lɛ shishi.

Yesu, Tookwɛlɔ Kpakpa lɛ

⁷ No hewɔ lɛ, Yesu saa kɛɛ amɛ ekoŋŋ akɛ, “Anɔkwale mikɛɔ nyɛ akɛ, Mi ji toi lɛ ashinaa lɛ.

⁸ Mɛi fɛɛ ni tsɔ̃ mihiɛ ba lɛ, julɔi kɛ ojotswalɔi ji amɛ; shi toi lɛ booo amɛ toi hu.

⁹ Mi ji shinaa lɛ. Mi lɛ, kɛji mɔ ko tsɔ̃ minaa etee mli lɛ, aaahere eyiwala, ni eeetee mli ni eeeje kpo, ni eeena lɛɛnii.

¹⁰ Julɔ baaa yaka, shi juu kɛ gbee kɛ hiɛkpãtãmɔ hewɔ ebaa; mi lɛ miba bɔ ni afee ni amɛna wala ni amɛna ni ateke nɔ.

¹¹ “Mi ji tookwɛlɔ kpakpa lɛ. Tookwɛlɔ kpakpa lɛ kɛ ewala ŋmɛɔ shi yɛ etoi lɛ anajiaŋ.

¹² Shi mɔ ni ji apaafonyo ni ejeee toi lɛ akwɛlɔ, mɔ ni toi lɛ jeee enɔ lɛ naa akɛ klaŋ miiba, ni eshiɔ toi lɛ, ni ejoɔ foi, ni klaŋ lɛ bamɔmɔɔ toi lɛ ni egbɛɔ amɛ eshwãa.

¹³ Apaafonyo lɛ joɔ foi ejaakɛ apaafonyo ji lɛ, ni toi lɛ ahe edɔɔɔ lɛ.

¹⁴ Mi ji tookwɛlɔ kpakpa lɛ; mile mi diɛŋtsɛ mitoi lɛ, ni mitoi lɛ hu le mi,

¹⁵ tamɔ bɔ ni Tsɛ lɛ le mi, ni mi hu mile Tsɛ lɛ. Ni mikɛ miwala ŋmɛɔ shi yɛ toi lɛ anajiaŋ.

¹⁶ “Miyɛ toi krokomɛi ni jɛɛɛ toi atsu nɛɛ mli; ni nomɛi hu, ja miŋɔ amɛ kɛba, ni amɛbanu migbee, ni toi lɛ fee kuu kome kɛ kwɛlɔ kome.

¹⁷ No hewɔ ni Tsɛ lɛ sumɔɔ mi lɛ, ejaakɛ mikɛ miwala ŋmɛɔ shi, koni maŋɔ ekoŋŋ.

¹⁸ Mɔ ko shɔ̃ɔɔ yɛ midɛŋ, shi moŋ mi diɛŋtsɛ mikɛŋmɛɔ shi; miyɛ hewalɛ akɛ mikɛŋmɛɔ shi, ni miyɛ hewalɛ akɛ miŋɔɔ ekoŋŋ; bɔ ni Tsɛ lɛ kɛɛ mi nɛ.”

¹⁹ Wiemɔi nɛɛ ahewɔ lɛ mligbalamɔ saa ba Yudafoi lɛ ateŋ ekoŋŋ.

²⁰ Ni amɛteŋ mɛi pii kɛɛ, “Mumɔ fɔŋ yɛ emli ni eye sɛkɛ; mɛɛhewɔ nyɛboɔ lɛ toi?”

²¹ Mɛi komɛi hu kɛɛ, “Jeee mɔ ni mumɔ fɔŋ yɔɔ emli wiemɔi nɛ. Ani mumɔ fɔŋ aaanyɛ shwilafoi ahiŋmɛii agbele?”

Yudafoi lɛ ŋwã Yesu

²² Agbɛnɛ aaye Sɔlemɔtsu Nɔjɔɔmɔ Gbijurɔ yɛ Yerusalɛm, ni fɛ̃ibe mli ni.

²³ Ni Yesu miishara shi yɛ Sɔlemɔ we lɛ yɛ Solomon koi lɛ shi.

²⁴ Kɛkɛ ni Yudafoi lɛ babɔle ehe, ni amɛkɛɛ lɛ akɛ, “Mɛɛ beyinɔ nɔŋŋ ooohã wɔyiŋ afee wɔ kɔshikɔshi kɛyashi? Kɛ bo ji Kristo lɛ, kɛɛmɔ wɔ faŋŋ.”

²⁵ Yesu here amɛ nɔ akɛ, “Mikɛɛ nyɛ momo shi nyɛheee nyɛyeee. Nitsumɔi ni mitsuɔ yɛ miTsɛ gbɛi mli lɛ, nomɛi miiye mihe odase;

²⁶ shi nyɛ moŋ ni nyɛheee nyɛyeee, ejaakɛ nyɛjeee mitoi lɛ eko.

²⁷ Mitoi lɛ nuɔ migbee, ni mile amɛ, ni amɛnyiɛɔ misɛɛ,

²⁸ ni mihãa amɛ naanɔ wala, ni amɛhiɛ kpãtãŋ kɛaatee naanɔ, ni asaŋ mɔ ko shɔŋ amɛ yɛ midɛŋ.

²⁹ MiTsɛ ni ŋɔ amɛ ehã mi lɛ fe mɛi fɛɛ, ni mɔ ko nyɛŋ ashɔ̃ amɛ yɛ miTsɛ dɛŋ.

³⁰ Mi kɛ Tsɛ lɛ fɛɛ lɛ, ekomeŋ.”

³¹ Kɛkɛ ni Yudafoi lɛ kɔlɔ tɛi ekoŋŋ akɛ amɛbaatswia lɛ.

³² Yesu here amɛ nɔ akɛ, “Mitsɔ̃ɔ nyɛ nitsumɔi kpakpai pii ni jɛ miTsɛ ŋɔɔ; te nakai nitsumɔi lɛ ateŋ nɔ hewɔ ni nyɛtaoɔ mi tɛi nyɛtswia nɛɛ?”

³³ Yudafoi lɛ here lɛ nɔ amɛkɛɛ, “Jeee nitsumɔ kpakpa ko hewɔ wɔbaatswia bo tɛi lɛ, shi moŋ musubɔɔ hewɔŋ, ejaakɛ bo ni gbɔmɔ ji bo lɛ, ootsɛ ohe Nyɔŋmɔ.”

³⁴ Yesu here amɛ nɔ akɛ, “Ani aŋmako yɛ nyɛMla lɛ mli akɛ, ‘Mikɛɛ, nyɔŋmɔi ji nyɛ?’

³⁵ Kɛji mɛi aŋɔɔ ni Nyɔŋmɔ wiemɔ lɛ ba lɛ tete lɛ etsɛ amɛ nyɔŋmɔi, ni anyɛŋ ŋmalɛ lɛ mli aku lɛ,

³⁶ nyɛmiikɛɛ mɔ ni Tsɛ lɛ efee lɛ krɔŋkrɔŋ ni etsu lɛ kɛba je lɛ mli lɛ akɛ, ‘Obɔ musu’, akɛni mikɛɛ akɛ, ‘Nyɔŋmɔ Bi ji mi’ lɛ?

³⁷ Kɛjeee miTsɛ nitsumɔi mitsuɔ lɛ, no lɛ nyɛkahea mi nyɛyea;

³⁸ shi kɛji no mitsuɔ, ni kɛ̃lɛ nyɛheee mi nyɛyeee lɛ, nyɛhea nitsumɔi lɛ kɛkɛ nyɛyea mɔ, koni nyɛle ni nyɛhe nyɛye akɛ Tsɛ lɛ yɛ mimli, ni mi hu miyɛ Tsɛ lɛ mli.”

³⁹ No hewɔ lɛ, amɛmiitao ekoŋŋ akɛ amɛmɔ lɛ, shi eje amɛdɛŋ.

⁴⁰ Ni eyiŋ etee Yordan sɛɛ ekoŋŋ, he ni Yohane baptisi yɛ tsutsu lɛ, ni eyahi jɛi.

⁴¹ Ni mɛi pii ba eŋɔɔ ni amɛkɛɛ, “Yohane efeee naakpɛɛnii ko moŋ; shi nii fiaa ni ewie yɛ nuu nɛɛ he lɛ, anɔkwaŋ.”

⁴² Ni mɛi pii he enɔ amɛye yɛ jɛi.