Yoel 3 - ŊMALƐ KRƆŊKRƆŊ LƐ

Nyɔŋmɔ baakojo Jeŋmaji lɛ

¹ Yehowa kɛɛ, “Nakai be lɛ mahã Yuda kɛ Yerusalɛm aku sɛɛ ashwere ekoŋŋ.

² Mabua maji lɛ fɛɛ anaa ni mikɛ amɛ aaakpeleke shi kɛaatee Kojomɔ Jɔɔ lɛ mli. Makojo amɛ yɛ jɛi yɛ nii fɛɛ ni amɛfee mimaŋ lɛ hewɔ. Amɛgbɛ mimaŋ Israelbii lɛ amɛshwã maji lɛ amli, ni amɛja Israel shikpɔŋ ni ji mishikpɔŋ lɛ.

³ Amɛfɔ̃ oshiki amɛkɛja nomii lɛ amɛhã amɛhe. Amɛhɔ̃ɔ gbekɛbii hii amɛkɛhe ajwamãŋi, ni amɛhɔ̃ɔ gbekɛbii yei amɛkɛhe wain amɛnu.

⁴ “Tiro kɛ Sidon kɛ Filistia shikpɔji fɛɛ, mɛni nyɛtaoɔ nyɛfee mi? Ani nɔ ko ni mifee najiaŋ nyɛtaoɔ nyɛto mi? Kɛji nakai ni lɛ, no lɛ shwiaa, ni mahã nii ni nyɛfee lɛ aku sɛɛ ababua nyɛyiteŋ;

⁵ ejaakɛ nyɛŋɔ mijwiɛtɛi kɛ mishika lɛ, ni minibii ni jara wa lɛ nyɛloo kɛtee nyɛjamɔhei lɛ.

⁶ Nyɛhɔ̃ɔ Yudabii kɛ Yerusalɛmbii lɛ nyɛhã Helabii, ni nyɛjie amɛ kɛjɛ amɛshikpɔŋ nɔ kɛtee shɔŋŋ.

⁷ Shi agbɛnɛ mibahã amɛshi he ni nyɛhɔ̃ɔ amɛ kɛtee lɛ. Mibafee nyɛ nɔ ni nyɛfee amɛ lɛ.

⁸ Mahã ahɔ̃ɔ nyɛbihii kɛ nyɛbiyei lɛ ahã Yudabii lɛ, ni Yudabii lɛ aaahɔ̃ɔ amɛ ahã Shebabii ni ji maŋsɛɛ shɔŋŋ bii lɛ. Mi, Yehowa, miwie enɛ.

⁹ “Nyɛshiɛa shiɛmɔ nɛɛ yɛ maji lɛ ateŋ akɛ, ‘Nyɛsaa nyɛhe nyɛhãa ta; nyɛtsɛa nyɛtabilɔi lɛ; nyɛbuaa nyɛtabilɔi fɛɛ anaa ni nyɛfãa.

¹⁰ Nyɛkɛ nyɛkɔii asɔ̃a klantei ni nyɛkɛ adɔi lɛ asɔ̃a akplɔi; mɔ ni yɔɔ wudɔwudɔ tete akɛɛ akɛ, Mihe wa.’

¹¹ Nyɛ jeŋmaji fɛɛ ni jwere shi kɛkpe, nyɛhe afea oya kɛbaa, ni nyɛbuaa nyɛhe naa yɛ jɔɔ lɛ mli.’ ” Yehowa, hã ota lɛ aba abatua amɛ.

¹² “Maji lɛ asaa amɛhe koni amɛba Kojomɔ Jɔɔ lɛ mli. Jɛi, mi Yehowa, mibata makojo maji fɛɛ ni jwere shi kɛbɔle lɛ yɛ.

¹³ Nyɛfolɔa amɛ nyɛshwiea shi tamɔ afolɔɔ ŋmaa yɛ nikpamɔ be mli lɛ; nyɛnaanaa amɛ tamɔ aŋaa wainyibii yɛ wain tsɔne ni eyi tɔ mli kɛyashiɔ wain lɛ bɔ̃iɔ hoo lɛ, ejaakɛ amɛyitsoŋ wa tsɔ̃.”

¹⁴ Gbɔmɛi akpeiakpei abɔ yɛ Kojomɔ Jɔɔ lɛ mli. Jɛi ji he ni Yehowa Gbi ni eshɛ etã lɛ baaba yɛ.

¹⁵ Hulu kɛ nyɔɔŋtsere ewo duŋ, ni ŋulamii efɔ̃ɔ kpɛmɔ.

Nyɔŋmɔ aaajɔɔ emaŋ lɛ

¹⁶ Yehowa miihuu kɛjɛ Zion, ni egbee miijije kɛjɛ Yerusalɛm; ŋwɛi kɛ shikpɔŋ miihoso. Shi Yehowa ji abobaahe hã emaŋ lɛ, kɛ mɔɔ ni wa hu hã Israelbii lɛ.

¹⁷ “Kɛkɛ lɛ nyɛaana nyɛle akɛ, mi ji Yehowa, nyɛNyɔŋmɔ lɛ. Mihiɔ Zion, migɔŋ krɔŋkrɔŋ lɛ nɔ. Yerusalɛm aaatsɔ̃ maŋ wulu krɔŋkrɔŋ; gbɔi nyɛŋ enɔ amɛye kɔkɔɔkɔ dɔŋŋ.

¹⁸ Nakai gbi lɛ, gɔji lɛ anɔ aaayi tɔ kɛ waintromii, ni aaana tsinai yɛ gɔŋ fɛɛ gɔŋ nɔ; ni nu aaaho yɛ Yuda jɔi lɛ fɛɛ amli. Nuhiŋmɛi aaaho kɛaajɛ Yehowa We lɛ, ni eeeyahã Akasia Jɔɔ lɛ nu.

¹⁹ “Ijipt aaatsɔ̃ shiaŋa, ni Edom aaatsɔ̃ shikpɔŋ ni egbo; ejaakɛ amɛbatua Yuda shikpɔŋ lɛ, ni amɛshwie enɔ bii ni efeko efɔŋ ko lɛ alá shi.

^20-21 Matɔ mɛi ni agbe lɛ alá he owele. Mikɛ mɛi ni yeɔ fɔ lɛ ahe ekeŋ amɛ. Shi kɛyaashi naanɔ fɛɛ lɛ, gbɔmɛi aaahi Yuda kɛ Yerusalɛm, ni mi, Yehowa, mahi Zion Gɔŋ lɛ nɔ.”