Yoel 2 - ŊMALƐ KRƆŊKRƆŊ LƐ

Baalabii akɛ Yehowa gbi lɛ he Kɔkɔbɔɔ

¹ Nyɛkpãa tɛtɛrɛmantɛrɛ yɛ Zion; nyɛbɔa oshe yɛ migɔŋ krɔŋkrɔŋ lɛ nɔ! Shikpɔŋ lɛ nɔ bii fɛɛ ahe akpokpo, ejaakɛ Yehowa gbi lɛ miiba; eshɛ shi etã.

² Duŋ kɛ jeŋ tuutuufeemɔ gbi ni, atatu kɛ oblɔtu kpii gbi ni. Baalabii ta muu miiba tamɔ duŋ gbɛɔ shwãa gɔji anɔ lɛ. Nɔ ko ni tamɔ enɛ bako dã, ni asaŋ esɛɛ lɛ eko baŋ dɔŋŋ kɛaatee yinɔi ayinɔ.

³ Baalabii lɛ yeɔ tsei lɛ tamɔ la yeɔ nii. Amɛhiɛgbɛ lɛ, shikpɔŋ lɛ tamɔ Eden trom, shi amɛsɛɛgbɛ lɛ etamɔ ŋa kpataa. Nɔ ko nɔ ko ejeee amɛdɛŋ.

⁴ Amɛsu tamɔ okpɔŋɔi, amɛshaa foi tamɔ ta okpɔŋɔi.

⁵ Kɛji amɛmiitumɔ yɛ gɔji lɛ anɔ lɛ, egbɛɔ tamɔ shwiilii; egbɛɔ tamɔ lalilɛi ni miishã gbetseli fɛlɛɔ; amɛtamɔ ta kpeteŋkple ni eto kɛbaagba ta.

⁶ Kɛ amɛmiiba lɛ, maji ahe kpokpoɔ, ni hiɛiaŋ fɛɛ shaleɔ.

⁷ Amɛtsɛ̃ɔ kɛbaa tamɔ kãkãlɔi, amɛkwɔɔ gbogboi tamɔ tabilɔi. Mɔ fɛɛ mɔ nyiɛɔ egbɛ nɔ; amɛtsakeee amɛgbɛ koni eeeba akɛ mɔ ko aaayaje mɔ ko gbɛ nɔ;

⁸ mɔ fɛɛ mɔ nyiɛ egbɛ nɔ. Amɛgbaa shi kutuu kɛtsɔ̃ɔ tawuu afabaŋi amli, ni nɔ ko nɔ ko etsiii amɛ gbɛ.

⁹ Amɛyatuaa maŋ; amɛjoɔ foi yɛ gbogboi anɔ; amɛkwɔɔ kɛboteɔ shĩai amli, ni amɛtsɔ̃ɔ samfɛji amli tamɔ julɔi.

¹⁰ Kɛji amɛmiiba lɛ, shikpɔŋ hosoɔ, ni ŋwɛi kpokpoɔ bliblibli. Hulu kɛ nyɔɔŋtsere woɔ duŋ, ni ŋulamii fɔ̃ɔ kpɛmɔ.

¹¹ Yehowa woɔ egbee, ni efãa eta lɛ. Esra lɛ da naakpa, ni mɛi ni yeɔ efãmɔi lɛ anɔ lɛ, anyɛɛɛ amɛ akane. Yehowa gbi lɛ, ebaafee gbeyei! Namɔ po aaanyɛ naa adamɔ?

Aatsɛ mɛi koni amɛtsake amɛtsui

¹² “Shi amrɔ nɛɛ po Yehowa kɛɛ, nyɛshwaa nyɛhe anɔkwale mli, ni nyɛkpalea kɛbaa miŋɔɔ kɛ ŋmaahilɛ kɛ yaafo kɛ ŋkɔmɔyeli.”

¹³ Nyɛtsɛrɛa nyɛtsuii, shi jeee nyɛtadei; nyɛkpalea kɛbaa nyɛNyɔŋmɔ lɛ ŋɔɔ, ejaakɛ durolɔ kɛ mlitsɔ̃lɔ ji lɛ; emli fuu mra, ni eyeɔ eshiwoo nɔ; ni emɔbɔnalɛ fa, ni eshwaa ehe yɛ nɔ fɔŋ hewɔ.

¹⁴ Ekolɛ Yehowa, nyɛNyɔŋmɔ lɛ, aaatsake ejwɛŋmɔ, ni eeejɔɔ nyɛŋmɔshinii, ni nyɛkɛ niyenii afɔle kɛ dãa afɔle aaabahã Yehowa, nyɛNyɔŋmɔ lɛ.

¹⁵ Nyɛkpãa tɛtɛrɛmantɛrɛ yɛ Zion; nyɛfãa akɛ ahi ŋmaa krɔŋkrɔŋ, ni nyɛtsɛa kpee ni mli wa.

¹⁶ Nyɛbuaa maŋ lɛ naa, nyɛsaa amɛ nyɛhãa kpee krɔŋkrɔŋ; nyɛbuaa gbekɛbii kɛ mɛi ni yeɔ fufɔ lɛ anaa! Ayɛmforo wu tete aje kpo yɛ esɛɛtsuŋ, ni ayɛmforo hu aje kpo yɛ epiaŋ.

¹⁷ Osɔfoi ni ji Yehowa sɔ̃ɔlɔi lɛ afo, ni amɛsɔle yɛ koi lɛ kɛ afɔleshãa latɛ lɛ teŋ amɛkɛɛ, “Yehowa, naa bo diɛŋtsɛ omaŋ lɛ mɔbɔ; kaahã maji krokomɛi miiye wɔhe fɛo amɛkɛɛ. ‘Nɛgbɛ nyɛNyɔŋmɔ lɛ yɔɔ?’ ”

Nyɔŋmɔ hã shikpɔŋ lɛ ba nii ekoŋŋ

¹⁸ Kɛkɛ ni Yehowa ye shikpɔŋ lɛ he awuŋã ni ena emaŋ lɛ mɔbɔ.

¹⁹ Ehere amɛ nɔ, ni ekɛɛ amɛ akɛ, “Agbɛnɛ mibahã nyɛ abele kɛ wain kɛ mu, koni nyɛye nyɛtɔrɔ; maji krokomɛi ebɔŋ nyɛ ahora dɔŋŋ.

²⁰ Nɔ ni jɛ kooyigbɛ ba lɛ, majie yɛ nyɛhe kɛaatee shɔŋŋ, ni mashwie lɛ kɛaatee shikpɔŋ gbiŋ ni etsɔ̃ amaŋfɔ̃ lɛ nɔ. Eta ni yɔɔ hiɛgbɛ lɛ mashwie amɛ mawo Ŋoo Ŋshɔ lɛ mli; ni amɛta ni yɔɔ sɛɛgbɛ lɛ matsi amɛ mawo Mediterenia Ŋshɔ lɛ mli. Amɛgbohii lɛ ahe sã kɛ fu aaate shi; makpãtã amɛhiɛ yɛ nibii fɛɛ ni amɛfee nyɛ lɛ hewɔ.

²¹ “Shikpɔŋ, kaashe gbeyei, omii ashɛ ohe ni onya, ejaakɛ Yehowa etsu nii wuji.

²² Nyɛ ŋaŋ kooloi, nyɛkashea gbeyei, ejaakɛ niyelihe lɛ jwɛifɔ lɛ miifrɔke, ni tsei miiwo amɛyibii, agbãmi kɛ waintso hu ewo pii.

²³ “Nyɛ Zionbii, nyɛmli afilia nyɛ yɛ nɔ ni nyɛNyɔŋmɔ lɛ efee ehã nyɛ lɛ hewɔ. Ehã nu enɛ ehã nyɛ bɔ ni sa, ehã Gbo kɛ Agbiɛnaa enɛ ehã nyɛ tamɔ efeɔ daa lɛ.

²⁴ Ŋmãagbeemɔhei lɛ aaayimɔ obɔ̃bɔ̃ kɛ ŋmaa, amɛhe bui lɛ aaateke nɔ kɛ wain kɛ mu.

²⁵ Nii ni baalabii kɛ otukpɛi kɛ gɔgɔmii lɛ eye, yɛ afii ni amɛba lɛ mli lɛ, mato nyɛ najiaŋ. Mi mihã baalabii ta babaoo lɛ ba batua nyɛ.

²⁶ Agbɛnɛ nyɛaana nii pii nyɛaaye nyɛaatɔrɔ. Nyɛaajie Yehowa, nyɛNyɔŋmɔ lɛ, gbɛi lɛ yi, ejaakɛ etsu naakpɛɛ nii ehã nyɛ. Agbeŋ mimaŋ lɛ he guɔ dɔŋŋ.

²⁷ No lɛ Israelbii, nyɛaana nyɛle akɛ miyɛ nyɛteŋ; nyɛaana nyɛle akɛ mi ji nyɛNyɔŋmɔ lɛ, ni misɛɛ lɛ mɔ ko bɛ dɔŋŋ. Agbeŋ mimaŋ lɛ he guɔ kɔkɔɔkɔ dɔŋŋ.

Yehowa Gbi lɛ

²⁸ “Enɛɛmɛi asɛɛ lɛ mafɔse mimumɔ lɛ mashwie gbɔmɛi fɛɛ anɔ; nyɛbihii kɛ nyɛbiyei lɛ aaagba, nyɛhiimeji lɛ aaala lamɔi, ni nyɛblahii lɛ aaana ninai.

²⁹ Nyɛtsuji hii tete kɛ nyɛtsuji yei hu mafɔse mimumɔ lɛ mashwie amɛnɔ yɛ nakai be lɛ mli.

³⁰ “Mahã ana gbi lɛ he okadii yɛ ŋwɛi kɛ shikpɔŋ lɛ nɔ, láshishwiemɔ kɛ la kɛ lasu kpɔŋŋ.

³¹ Hulu aaawo duŋ, ni nyɔɔŋtsere aaatsu faa tamɔ lá. Dani Yehowa gbi wulu ni yɔɔ gbeyei lɛ aaaba.

³² Shi mɔ fɛɛ mɔ ni aaasɔle atsɛ Yehowa gbɛi lɛ, aaahere eyi wala. Ni tamɔ bɔ ni Yehowa ekɛɛ lɛ. Mɛi komɛi ahe aaaje mli, yɛ Zion Gɔŋ, Yerusalɛm; mɛi ni mahala lɛ ayi aaana wala.”