Yoel 1 - ŊMALƐ KRƆŊKRƆŊ LƐ

¹ Naa shɛɛ ni Yehowa kɛhã Yoel, Penuel binuu lɛ.

Maŋbii lɛ ye ŋmɔshinii ni afite he ŋkɔmɔ

² Nyɛ mɛi ni nyɛdara, nyɛboa toi, nyɛ Yuda shikpɔŋ lɛ nɔ bii fɛɛ, nyɛfea toi. Nɔ ni eba nɛɛ, ani eko eba dã yɛ nyɛyinɔ, loo yɛ nyɛtsɛmɛi ayinɔ tete?

³ Nyɛgbaa nyɛbii, koni nyɛbii lɛ agba amɛbii, ni amɛbii lɛ hu agba yinɔ ni baa yɛ amɛsɛɛ lɛ.

⁴ Baalabii baha wɔŋmɔshinii; nɔ ni ku kome shwɛ lɛ, ku ni nyiɛ sɛɛ baye.

⁵ Nyɛ gaalei, nyɛhiɛ atsɛ̃a ni nyɛfoa; nyɛ wainnulɔi, nyɛwɔa lele, ejaakɛ nyɛwain dɔkɔdɔkɔ lɛ eje nyɛdaaŋ.

⁶ Baalabii, ta muu, ebatua wɔshikpɔŋ lɛ; amɛhe wa, ni anyɛɛɛ amɛ akane; amɛnyanyɔji anaa ba tamɔ jata nyanyɔji.

⁷ Amɛkpãtã wɔwaintsei lɛ ahiɛ; amɛkpe wɔgbãmitsei lɛ ahe. Amɛkpɔlɔ tsei lɛ ahe totoi lɛ, kɛyashi niji lɛ ahe yɛ sakoo.

⁸ Wo yara tamɔ oblayoo ni foɔ eblayeiaŋ wu.

⁹ Niyenii afɔle kɛ dãa sɛɛ efo yɛ Yehowa we lɛ. Osɔfoi ni ji Yehowa sɔ̃ɔlɔi lɛ miiye ŋkɔmɔ, ejaakɛ afɔlei bɛ hã Yehowa.

¹⁰ Akpãtã ŋmɔji lɛ ahiɛ; shikpɔŋ lɛ miiye ŋkɔmɔ, ejaakɛ akpãtã ŋmaa lɛ hiɛ; wainyibii lɛ egbi, mutsei lɛ eŋala.

¹¹ Nyɛ okwaafoi, nyɛyea ŋkɔmɔ. Nyɛ waintromkwɛlɔi, nyɛwoa yara yɛ ŋmaa kɛ akoko hewɔ, ejaakɛ ŋmɔshinii lɛ hiɛ ekpãtã.

¹² Waintsei lɛ eŋala; agbãmitsei lɛ egboi; akututsei kɛ tɛŋi kɛ atĩatsei, yelitsei fɛɛ egbigbii. Nyamɔ etã yɛ gbɔmɛi ateŋ.

¹³ Osɔfoi, nyɛbua kpekpe, ni nyɛwoa yara; Nyɛ afɔleshãa latɛ lɛ he sɔ̃ɔlɔi, nyɛwɔa lele. Nyɛbotea Sɔlemɔ we lɛ, ni nyɛyea ŋkɔmɔ nyɔɔŋnyɔɔŋ fɛɛ, nyɛ miNyɔŋmɔ lɛ sɔ̃ɔlɔi, ejaakɛ niyenii afɔle kɛ dãa afɔle ni akɛyaa nyɛNyɔŋmɔ lɛ we lɛ, atsi naa.

¹⁴ Nyɛfãa koni ahi ŋmaa krɔŋkrɔŋ, nyɛtsɛa kpee hu. Nyɛbuaa onukpai lɛ kɛ shikpɔŋ lɛ nɔ bii fɛɛ anaa kɛyaa Yehowa nyɛNyɔŋmɔ lɛ we lɛ, ni nyɛbolɔa nyɛtsɛa lɛ.

¹⁵ Yehowa gbi lɛ eshɛ shi etã! Gbi ni Ofe lɛ kɛ hiɛkpãtãmɔ baa lɛ, nakai gbi lɛ baafee gbeyei!

¹⁶ Bɛ wɔhiŋmɛi kã nɔ nɛkɛ nɔŋŋ ni akpãtãa wɔniyenii hiɛ, ni nyamɔ kɛ mliflimɔ hu sɛɛ efo yɛ Nyɔŋmɔ We lɛ?

¹⁷ Dumɔwui lɛ egboi yɛ su kukulii lɛ ashishi, aboŋoi lɛ kamɔ efolo, ŋmaatoohei lɛ ekumɔ, ejaakɛ ŋmaa lɛ eŋala.

¹⁸ Kwɛ bɔ ni tsina kui lɛ kɛ̃mɔɔ kɛ nɔnaa, ejaakɛ amɛbɛ jwɛifɔ, ni toikui lɛ hu miina nɔ.

¹⁹ Bo, Yehowa, mibolɔɔ mitsɛɔ nɛɛ, ejaakɛ la ekpãtã ŋa nɔ jwɛifɔ lɛ hiɛ, ni lalilɛi eshã ŋa lɛ nɔ tsei lɛ fɛɛ.

²⁰ Ŋaŋ kooloi tete miibolɔ miitsɛ bo, ejaakɛ fai lɛ egbi, ni la ekpãtã ŋa nɔ jwɛifɔ hiɛ.