Yesaia 9 - ŊMALƐ KRƆŊKRƆŊ LƐ

¹ Shi kɛ̃lɛ duŋ kabitii lɛ woŋ mɔ ni aaahi jaramɔ mli lɛ he gbeyei. Sa lɛ eha Zebulon kɛ Naftali fɛɛ hiɛ shwie shi; shi agbɛnɛ eeewo ŋshɔnaa shikpɔŋ lɛ, Yordan sɛɛ shikpɔŋ lɛ, jeŋmaji Galilea lɛ, hiɛ nyam.

Wɔsɛɛ Maŋtsɛ lɛ

² Mɛi ni nyiɛ duŋ mli lɛ, ena la kpeteŋkple ko; mɛi ni hi duŋ kabitii shikpɔŋ nɔ lɛ, la ekpɛ ehã amɛ.

³ Ohã maŋbii lɛ ayi efa, Ohã amɛnyamɔ efa. Amɛmiinya yɛ ohiɛ tamɔ anyaa yɛ nikpamɔ be mli, loo tamɔ mɛi nyaa kɛji amɛmiija haanii.

⁴ Ejaakɛ amɛkɔŋtso ni tsɔ̃ jatsu lɛ, kɛ amɛkpalamɔ tso lɛ kɛ amɛnɔyelɔ lɛ dɛŋ kpãa lɛ okumɔ fɛɛ mli, tamɔ ofee Midian ta lɛ.

⁵ Ejaakɛ aspaatre fɛɛ aspaatre ni tabilɔ kɛbaashimɔ shi yɛ ta lɛ mli kɛ atade fɛɛ atade ni lá ewu mli lɛ, akɛbaafee lai ni ashã.

⁶ Ejaakɛ afɔ bi ahã wɔ! Afɔ binuu ahã wɔ. Elumɔyeli kã ekɔŋ. Abaatsɛ lɛ “Naakpɛɛ Ŋaawolɔ,” “Nyɔŋmɔ Hewalɔ, Naanɔtsɛ, Hejɔlɛ Lumɔ.”

⁷ Emaŋtsɛyeli lɛ shweremɔ kɛ edɛŋ toiŋjɔlɛ lɛ, esɛɛ efoŋ yɛ David maŋtsɛ sɛi lɛ nɔ, kɛ emaŋtsɛyeli hei fɛɛ. Ekɛ jalɛ saneyeli kɛ nɔ ni ja feemɔ baahã emaŋtsɛyeli lɛ ama shi kɛya naanɔ. Yehowa, Taiatsɛ lɛ, kɛ hiɛdɔɔ baafee enɛ.

Yehowa baagbala Israel toi

⁸ Nuŋtsɔ lɛ kɛ wiemɔ emaje ekɛmiishi Israel, ni ji Yakob shwiei lɛ,

⁹ ni Efraimbii kɛ mɛi ni yɔɔ Samaria fɛɛ aaana ale, amɛ mɛi ni amɛkɛ henɔwomɔ kɛ hewoo jwɛŋmɔ kɛɔ akɛ,

¹⁰ “Brikisi tsui lɛ ekumɔ, shi wɔ lɛ wɔkɛ tɛ ni ako baatswa tsui lɛ, ni atoo sikamore tsei lɛ ashwie shi, shi wɔ lɛ, wɔɔtɛo tsenedru tsei yɛ amɛnajiaŋ.”

¹¹ Yehowa aaatee henyɛlɔi ashi awo amɛ.

¹² Siriabii miijɛ bokãgbɛ, ni Filistibii hu miijɛ anaigbɛ amɛba kɛ amɛdaaŋ ni amɛgbɛ hatoo amɛkɛbami Israel. Kɛ̃lɛ fɛɛ sɛɛ lɛ Yehowa mlifu lɛ naa ejɔŋ; etoigbalamɔ nine lɛ ekpã mli lolo.

¹³ Israelbii lɛ kpaleee amɛbaaa mɔ ni gbala amɛtoi lɛ ŋɔɔ lɛ, amɛtaooo Yehowa, Taiatsɛ lɛ, sɛɛgbɛ.

¹⁴ Hewɔ lɛ gbi kometoo nɔ lɛ Yehowa baafo Israel yitso kɛ elei fɛɛ; ebaafo blɛo kɛ glã fɛɛ gbi kome.

¹⁵ Maŋ onukpa kɛ hiɛnaanɔ gbɔmɔ ji yitso lɛ, ni gbalɔ ni tsɔ̃ɔ amale tsɔ̃ɔmɔ lɛ, lɛ ji lei lɛ.

¹⁶ Ejaakɛ mɛi ni nyiɛ maŋbii lɛ ahiɛ lɛ ehã maŋbii lɛ edu gbɛ, ni amɛ mɛi ni anyiɛ amɛhiɛ lɛ ahiɛ ekpãtã.

¹⁷ No hewɔ lɛ, Nuŋtsɔ lɛ naŋ amɛblahii lɛ ahe miishɛɛ, ni emusuŋ etsɔŋ lɛ yɛ amɛwusãi kɛ amɛkulafoi lɛ ahe. Ejaakɛ amɛteŋ mɔ fɛɛ mɔ lɛ, ebɛ Nyɔŋmɔ gbeyeishemɔ, ni asaŋ efɔŋfeelɔ ni, ni mɔ fɛɛ mɔ wieɔ kwashiai awiemɔ. Kɛ̃lɛ fɛɛ sɛɛ lɛ Yehowa mlifu lɛ ejɔŋ; etoigbalamɔ nine lɛ ekpã mli lolo.

¹⁸ Maŋbii lɛ ayitsoŋwalɛ tsoɔ tamɔ la. Eshãa kpitikpitii kɛ ŋmeii fɛɛ; esɔoɔ koo hayii anaa la, ni elasu pukɔŋŋ lɛ teɔ shi kɛyaa ŋwɛi.

¹⁹ Yehowa, Taiatsɛ lɛ, mlifu lɛ naa lɛ, shikpɔŋ lɛ shã. Maŋbii lɛ tsɔ̃ tamɔ latso ni tsoɔ; mɔ ko mɔ ko yeee buaa enyɛmi.

²⁰ Amɛaashara nii amɛye yɛ ninejurɔgbɛ, shi hɔmɔ aaaye amɛ kɛ̃, ni amɛaaye nii yɛ amɛbɛkugbɛ hu, shi amɛtɔrɔŋ. Mɔ fɛɛ mɔ aaaye enaanyo loo.

²¹ Manase aaate shi awo Efraim, ni Efraim hu aaatua Manase, ni amɛyi enyɔ lɛ fɛɛ amɛaate shi amɛwo Yuda. Kɛ̃lɛ enɛ fɛɛ sɛɛ lɛ Yehowa mlifu lɛ ejɔŋ, ni etoigbalamɔ nine lɛ ekpã mli lolo.