Yesaia 8 - ŊMALƐ KRƆŊKRƆŊ LƐ

Akɛ Yesaia Binuu to okadi ahã maŋbii

¹ Yehowa kɛɛ mi akɛ, “Kɔ tao kpeteŋkple koni akɛ niŋmaa okadii ni dara aŋma wiemɔ nɛɛ yɛ nɔ, ‘Haanii yaa oya! Ofɔ̃yelinii yaa mramra.’ ”

² Mina odasefoi anɔkwafoi enyɔ, ni ji Osɔfo Uria kɛ Zakaria, Yeberekia bi lɛ, ye mi odase.

³ Mitee yoo, ni ji gbalɔyoo lɛ ŋɔɔ ni ena musu, ni efɔ binuu. Kɛkɛ ni Yehowa kɛɛ mi akɛ, “Wo lɛ gbɛi akɛ ‘Oya Haanii,’ ‘Ofɔ̃yeli mramra,’

⁴ ejaakɛ dani gbekɛ lɛ aaale ‘Ataa loo Awo tsɛmɔ lɛ,’ aaaloo nii ni Damasko yɔɔ kɛ haanii ni Samaria yɔɔ hu kɛnyiɛ Asiria maŋtsɛ hiɛ kɛaatee.”

Asiria Maŋtsɛ miiba

⁵ Yehowa kɛɛ mi akɛ,

⁶ “Maŋ nɛɛ kwa Shiloa Faa lɛ mli nu ni hoɔ blɛoo lɛ, ni amɛkpokpo yɛ Maŋtsɛ Rezin kɛ Maŋtsɛ Peka, Remalia bi lɛ, hiɛ.

⁷ No hewɔ lɛ, naa, Nuŋtsɔ lɛ kɛ Asiria maŋtsɛ kɛ eta lɛ fɛɛ miiba koni amɛbatua amɛ.

⁸ Amɛbaashwie amɛnɔ tamɔ faa wulu Eufrate. Emli nu babaoo lɛ aaasram nɔ boboobo, ni eeeha nujɔi fɛɛ anɔ, ni eeeje ŋa kɛaayabote Yuda shikpɔŋ lɛ nɔ, ni ebaayi kɛyaashi eeeyata gbɔmɔ kuɛ, ni eeekple shikpɔŋ lɛ hiɛ fɛɛ, Ao Imanuel.”

⁹ Nyɛ majimaji, nyɛbuaa nyɛhe naa kɛ tsuifãa! Nyɛ majimaji ni yɔɔ shɔŋŋ, nyɛboa toi, ni nyɛhe ajɔ̃a nyɛhe.

¹⁰ Nyɛkpãŋa; shi fɛɛ aaafee yaka. Nyɛkɛa nɔ ni nyɛyɔɔ kɛɛmɔ, shi fɛɛ aaafee yaka, ejaakɛ Nyɔŋmɔ kɛ wɔ yɛ.

Yehowa bɔ Gbalɔ lɛ kɔkɔ

¹¹ Yehowa kɛ mi wie kɛ hiɛdɔɔ, ni ebɔ mi kɔkɔ akɛ mikaba mijeŋ tamɔ maŋbii lɛ. Ekɛɛ mi akɛ,

¹² “Nɔ fɛɛ nɔ ni maŋbii nɛɛ tsɛɔ lɛ apam lɛ, nyɛkatsɛa lɛ apam; asaŋ nyɛkashea nɔ ni amɛsheɔ lɛ gbeyei, ni nyɛtsuii akafãa hu.

¹³ Shi moŋ nyɛbua Yehowa, Taiatsɛ lɛ, akɛ Mɔ Krɔŋkrɔŋ, ni lɛ moŋ gbeyei nyɛshea, ni lɛ ehe ŋmiŋmi amɔa nyɛ,

¹⁴ ni eeetsɔ̃ he krɔŋkrɔŋ ehã nyɛ; eeetsɔ̃ tamɔ tɛ kɛ nanetɔ̃tɔ̃mɔ tɛsaa ehã Israel akutsei enyɔ lɛ fɛɛ, ni eeetsɔ̃ yaa kɛ tsɔne hu ehã Yerusalɛmbii lɛ.

¹⁵ Mɛi babaoo aaatɛrɛ tɛsaa nɛɛ, ni amɛaagbeegbee shi, ni amɛhiɛ aaakpãtã. Aaadu amɛ yɛ tsɔne mli, ni aaamɔmɔ amɛ.”

Abɔ Sisatsɛmɔ he kɔkɔ

¹⁶ Nyɛ mikaselɔi lɛ, nyɛbaa tsɔsemɔ wiemɔi lɛ ayi yɛ nyɛteŋ.

¹⁷ Miikwɛ Yehowa, mɔ ni kɛ ehiɛ etee Yakob we lɛ gbɛ, ni mikɛ mihiɛ aaafɔ enɔ.

¹⁸ Naa, mi kɛ bii ni Yehowa ehã mi lɛ, wɔji Yehowa, Taiatsɛ lɛ, mɔ ni hiɔ Zion Gɔŋ lɛ nɔ lɛ, dɛŋ okadii kɛ naakpɛɛnii hã Israel.

¹⁹ Kɛji mɔ ko aaakɛɛ nyɛ akɛ, “Nyɛyabia okɔmfoi kɛ klamɔfoi ni wieɔ gugɔjiaŋ kɛ akroma gbee lɛ nii lɛ, nyɛkɛa akɛ aso esaaa akɛ maŋbii biɔ amɛNyɔŋmɔ lɛ moŋ nii? Aso esa akɛ abiɔ gbohiinii ahaa hiɛkãalɔi moŋ?”

²⁰ Nyɛtoa he akɛ, “Nyɛmɔa Yehowa wiemɔ lɛ kɛ ehe odaseyeli lɛ mli. Anɔkwa, nɔ ni nifeelɔi lɛ kɛɔ nyɛ lɛ, nɔ kpakpa ko ejɛŋ mli.”

Haomɔ be

²¹ Amɛaakpa shikpɔŋ lɛ nɔ kɛ hejaramɔ kɛ hɔmɔ ni naa wa, ni amɛbaalomɔ amɛmaŋtsɛ lɛ kɛ amɛNyɔŋmɔ lɛ. Amɛaawo amɛhiɛ nɔ amɛkwɛ ŋwɛi,

²² ni amɛaakwɛ shikpɔŋ hu. Shi naa, amɛnaŋ nɔ ko nɔ ko fe hejaramɔ kɛ duŋ kabitii; ni aaatsi amɛ awo duŋ kabitii lɛ mli.