Yesaia 66 - ŊMALƐ KRƆŊKRƆŊ LƐ

Yehowa majimaji lɛ

¹ Bɔ ni Yehowa kɛɛ nɛ, “Ŋwɛi lɛ, mimaŋtsɛ sɛi ni; ni shikpɔŋ lɛ, minaneshi maaŋoo ni; belɛ mɛɛ tsu nyɛaama nyɛha mi mɔ, ni nɛgbɛ aaafee mihejɔɔmɔ he?

² Mi, minine bɔ enɛɛmɛi fɛɛ, ni no hewɔ lɛ, enɛɛmɛi fɛɛ lɛ minɔ ni,” Yehowa kɛɛ. “Shi mɔ he tsui ni minaa nɛ, mɔ ni ji humi, ni eshwaa ehe yɛ etsui mli, ni ehe kpokpoɔ yɛ miwiemɔ lɛ naa.”

³ “Mɔ ni gbeɔ tsina lɛ, etamɔ mɔ ni gbeɔ gbɔmɔ nɔŋŋ; mɔ ni kɛ toobi shãa afɔle lɛ, etamɔ mɔ ni kɛ gbee shãa afɔle nɔŋŋ; mɔ ni shãa niyenii afɔle lɛ, etamɔ mɔ ni kɛ kplotoo lá bahãa nɔŋŋ; mɔ ni shãa krɔbɔo afɔle lɛ, etamɔ mɔ ni jaa wɔŋ nɔŋŋ. Mɛi nɛɛ fɛɛ ekɔlɔ amɛ diɛŋtsɛ amɛgbɛi, ni amɛnaa nihiinii ni amɛfeɔ lɛ he miishɛɛ.

⁴ No hewɔ lɛ, mi hu maha amanehulu aba amɛ nɔ, ni maha nɔ gbeyei ni amɛsheɔ lɛ aba amɛnɔ. Ejaakɛ mitsɛ, shi mɔ ko mɔ ko hereee nɔ; miwie ni amɛbooo toi; shi moŋ amɛfee nɔ ni ji efɔŋ yɛ mihiɛ, ni amɛfee nɔ moŋ ni esaaa mihiɛ.”

⁵ Nyɛboa Yehowa wiemɔ lɛ toi, nyɛ mɛi ni nyɛhe kpokpoɔ yɛ ewiemɔ lɛ naa lɛ. “Nyɛnyɛmimɛi ni miihi nyɛ, ni amɛkwa nyɛ yɛ migbɛi lɛ hewɔ lɛ, yeɔ nyɛ he fɛo amɛkɛɔ akɛ, ‘Nyɛwoa Yehowa hiɛ nyam akɛ ehere nyɛ, koni wɔna nyamɔ ni nyɛaanya lɛ.’ Shi amɛ moŋ ji mɛi ni amɛhiɛ aaagboi.

⁶ Nyɛboa toi, aafee hoo yɛ maŋ lɛ mli. Gbee ko miijɛ Sɔlemɔ we lɛ. Yehowa mɔ ni baawo ehenyɛlɔi lɛ nyɔmɔ lɛ gbee ni.

⁷ “Mimaŋ krɔŋkrɔŋ lɛ tamɔ yoohɔlɔ ni dani eeebɔ̃i kɔ̃ɔmɔ lɛ efɔ momo, mɔ ni dani fɔmɔ piŋmɔ lɛ aaata ehe lɛ, efɔ binuu momo.

⁸ Namɔ enu nɛkɛ sane pɛŋ? Namɔ ena nɛkɛ nɔ ko pɛŋ? Ani gbi kome abɔɔ maŋ lo? Ani gbi kome akɛnaa jaku lo? Kɛ̃lɛ amrɔ nɔŋŋ ni Zion bɔi kɔ̃ɔmɔ lɛ pɛ, kɛkɛ ni efɔ ebii lɛ.

⁹ Aso mahã ajwa awoso, ni mihaŋ afɔ? Aso mi ni mihãa afɔɔ lɛ, maŋa musu lɛ naa lo?” oNyɔŋmɔ lɛ kɛɛ.

¹⁰ “Nyɛ kɛ Yerusalɛm anyaa, ni nyɛmli afilia nyɛ yɛ ehewɔ. Nyɛ mɛi fɛɛ ni nyɛsumɔɔ lɛ lɛ, nyɛ kɛ lɛ anaa miishɛɛ, nyɛ mɛi fɛɛ ni nyɛye lɛ ŋkɔmɔ lɛ!

¹¹ Nyɛbaana eshweremɔ lɛ eko nyɛye nyɛtɔrɔ, tamɔ abifao yeɔ enyɛ fufɔ etɔɔ lɛ.”

¹² Ejaakɛ bɔ ni Yehowa kɛɛ nɛ, “Maha nyɛshwere babaoo tamɔ faa ni hoɔ, ni majimajiaŋbii lɛ anii ni amɛna lɛ aaayiridi, tamɔ faa ni eyi kɛteke nɔ, kɛba nyɛdɛŋ. Nyɛaatamɔ abifao ni yeɔ enyɛ fufɔ; aaahiɛ nyɛ dɔdɔɔdɔ kɛ suɔmɔ yɛ kpɔkɔiaŋ.

¹³ Bɔ ni binyɛ shɛjeɔ ebi mii lɛ, nakai nɔŋŋ mi hu mashɛje nyɛmii, ni nyɛmii aaashɛ nyɛhe yɛ Yerusalɛm.

¹⁴ Nyɛ diɛŋtsɛ nyɛaana kɛ nyɛhiŋmɛii, ni nyɛtsui aaanyɔ nyɛmli, ni nyɛgbɔmɔtsei aaafrɔke tamɔ jwɛifɔ, ni aaana ale akɛ Yehowa nine kã etsuji ahe, shi ehenyɛlɔi lɛ emli aaafu amɛ.”

¹⁵ Ejaakɛ naa, Yehowa aaaba kɛ la, ni eshwiilii lɛ aaanyiɛ lasuogbele mli kɛaaba, ni ekɛ mlila kpele aaawo ehenyɛlɔi lɛ anyɔmɔ; ni ekɛ la lilɛii aaakã ehenyɛlɔi.

¹⁶ Ejaakɛ la Yehowa kɛbaakojo, ni ekɛ klante aaakojo jeŋ gbɔmɛi fɛɛ, ni mɛi ni Yehowa aaagbe lɛ ayi aaafa babaoo naakpa.

¹⁷ Yehowa kɛɛ akɛ, “Mɛi ni feɔ amɛhe krɔŋkrɔŋ, ni amɛtsuuɔ amɛhe kɛha tsei kɛ tɛi ajamɔ ni amɛtoɔ srɛnɛɛ kɛyaa wɔkoiaŋ, ni amɛyayeɔ kplotoo kɛ obishi kɛ kwakwe loo lɛ, amɛnaagbee eshɛ.

¹⁸ Ejaakɛ mile amɛnitsumɔi kɛ amɛsusumɔi, ni miiba koni mibabua jeŋ maji fɛɛ anaa, ni amɛaaba, ni amɛaabana minunyam lɛ;

¹⁹ ni amɛaana okadi ni tsɔ̃ɔ akɛ mi ji mɔ ni gbalaa amɛtoi lɛ. “Ni matsu mɛi ni ahe baaje toigbalamɔ lɛ mli lɛ kɛaatee Tarshish kɛ Libia kɛ Lud, ni ji gãitsɛ̃lɔi amaŋ lɛ. Matsu kɛya Tubal kɛ Helabii ŋshɔkpɔi ni yɔɔ shɔŋŋ ni amɛnuko mihe, asaŋ amɛnako minunyam lɛ bii hu aŋɔɔ. Amɛaajaje minunyam lɛ amɛtsɔ̃ɔ yɛ jeŋmaji lɛ ateŋ.

²⁰ Ni amɛ kɛ nyɛnyɛmimɛi lɛ fɛɛ ni jɛ jeŋmaji lɛ amli lɛ aaaba akɛ nikee abahã Yehowa. Amɛaatara okpɔŋɔi anɔ kɛ shwiilii kɛ akpakãii amli kɛ teji kɛ yoomai anɔ kɛba Yerusalɛm, migɔŋ krɔŋkrɔŋ lɛ nɔ, taakɛ bɔ ni Israelbii hiɛɔ amɛnikeenii yɛ nibii ni mli tse amli kɛbaa Yehowa we lɛ,” Yehowa kɛɛ.

²¹ “Maŋɔ amɛteŋ mɛi komɛi mafee osɔfoi kɛ Levibii,” Yehowa kɛɛ.

²² “Bɔ ni ŋwɛi hee kɛ shikpɔŋ hee ni mafee lɛ aaahi shi yɛ mihiɛ lɛ, nakai pɛpɛɛpɛ nyɛshwiei kɛ nyɛgbɛi aaahi shi yɛ mihiɛ.”

²³ Yehowa kɛɛ, “Ni aaaba mli akɛ nyɔŋ hee fɛɛ nyɔŋ hee kɛ hejɔɔmɔ gbi fɛɛ hejɔɔmɔ gbi nɔ lɛ, gbɔmɛi fɛɛ aaaba abaja yɛ mihiɛ,” Yehowa kɛɛ.

²⁴ “Ni amɛaaje kpo amɛyakwɛ mɛi ni tse mihiɛ atua lɛ agbohii lɛ. Gɔgɔmii ni yeɔ amɛ lɛ gboiŋ, ni la ni baashã amɛ lɛ agbeŋ. Amɛhe aaafee heloo fɛɛ heloo nyaŋemɔ.”