Yesaia 65 - ŊMALƐ KRƆŊKRƆŊ LƐ

Nyɔŋmɔ gbala atuatselɔ toi

¹ Yehowa kɛɛ, “Mihaa mɛi ni biko mi nii lɛ hetoo, ni mi diɛŋtsɛ mihaa mɛi ni taoko mi lɛ naa mi. Mikɛɔ maŋ ni sɔleko tsɛko mi lɛ akɛ, Naa mi! Naa mi!

² Migbɛɔ miniji amli daa nɛɛ mihaa maŋ atuatselɔi ni nyiɛɔ gbɛ ni ehiii nɔ, mɛi ni nyiɛɔ yɛ amɛ diɛŋtsɛ amɛjwɛŋmɔi anaa lɛ.

³ Atuatselɔi nɛɛ jeɔ kpetekplee amɛwoɔ mimli la daa. Amɛshãa afɔle yɛ abɔi amli amɛhaa wɔji, ni amɛshãa tsofakɛŋma yɛ ntayai anɔ amɛhãa wɔji.

⁴ Amɛyataraa tɛkploi ni afu gbohii yɛ mli amli, ni amɛyatsɛɔ sisai gbɛkɛgbɛkɛ yɛ jɛi; amɛyeɔ kplotoo loo tete, ni amɛfaa wonu ni akɛ wɔŋ naa loo hoo.

⁵ Amɛkɛɔ akɛ, ‘Tsi ohe kɛya sɛɛ. Kaabɛŋkɛ mi ejaakɛ mihe tse fe bo.’ Mɛnɛɛmɛi lɛ amɛsukɔɔ mi, amɛtamɔ la ni tsoɔ gbi muu fɛɛ.

⁶ “Naa, aŋma afɔ̃ mihiɛ akɛ, ‘Mifeŋ dioo; mibatɔ he owele; mikuŋ mihiɛ mifɔŋ nɔ ni amɛfee lɛ nɔ; mibawo amɛ he nyɔmɔ kɛ̃

⁷ yɛ amɛ diɛŋtsɛ kɛ amɛtsɛmɛi lɛ hu anishaianii lɛ fɛɛ ahewɔ,’ ” Yehowa kɛɛ.

⁸ Bɔ ni Yehowa saa ekɛɛ nɛ, “Bɔ ni anaa yɛ wainyibii amli, ni no hewɔ lɛ, akɛɔ akɛ, ‘Akafite lɛ, ejaakɛ abaana ehe sɛɛ’ lɛ, nakai mafee yɛ mitsuji lɛ ahewɔ; mikpãtãŋ amɛ fɛɛ amɛhiɛ.

⁹ Mibajɔɔ Israelbii ni jɛ Yuda mli lɛ, ni amɛshwiei aaabaŋɔ migɔji ashikpɔŋ lɛ akɛ amɛnɔ, ni jɛi mitsuji ni sɔmɔɔ mi lɛ aaahi.

¹⁰ Amɛaaja mi, ni amɛaakpala amɛtoi kɛ tsinai kɛya Sharon ŋa ni yɔɔ anaigbɛ lɛ nɔ, ni amɛkɛ amɛkooloi aaaya Akor Jɔɔ ni yɔɔ bokãgbɛ lɛ hu mli koni amɛyaye nii.

¹¹ “Shi nyɛ mɛi ni nyɛkwa Yehowa, ni nyɛhiɛ ekpa egɔŋ krɔŋkrɔŋ Zion lɛ nɔ, ni nyɛŋmɛɔ okplɔ̃ nyɛkɛhãa shade wɔŋ, ni nyɛfɔseɔ wain ni afutu mli nyɛshwieɔ shi nyɛhãa shɛɛ mli wɔŋ lɛ,

¹² mibajɔɔ nyɛnɔ mahã klante. Nyɛ fɛɛ nyɛbaagbo otɔfo gbele, ejaakɛ mitsɛ nyɛ, shi nyɛhereee minɔ, miwie ni nyɛbooo toi; shi nyɛfee nɔ fɔŋ yɛ mihiɛ, ni nyɛkɔ nɔ ni nyɛle akɛ misumɔɔɔ lɛ moŋ.

¹³ No hewɔ lɛ, bɔ ni Nuŋtsɔ Nyɔŋmɔ kɛɔ nɛ. Naa, mitsuji lɛ aaaye nii atɔ, shi nyɛ lɛ hɔmɔ baaye nyɛ. Naa, mitsuji lɛ aaana nu amɛnu, shi nyɛ lɛ kumai aaaye nyɛ Naa mitsuji lɛ aaanya, shi nyɛ lɛ nyɛhiɛ aaagboi.

¹⁴ Naa, mitsuji lɛ aaala kɛ tsuijurɔ, shi nyɛ lɛ nyɛaafo kɛ tsuiŋshãlɛ, ni nyɛaafo yoo kɛ mumɔ ni werɛ eho ehe.

¹⁵ Mihalamɔbii lɛ aaatsi nyɛtã amɛkɛlomɔ, ni Nuŋtsɔ Nyɔŋmɔ aaagbe nyɛ. Shi etsuji lɛ eeewo amɛ gbɛi kroko.

¹⁶ Koni mɔ fɛɛ mɔ ni baa jɔɔmɔ aha ehe yɛ shikpɔŋ lɛ nɔ lɛ, anɔkwa Nyɔŋmɔ lɛ ajɔɔ lɛ; ni mɔ fɛɛ mɔ ni kãa kitã yɛ shikpɔŋ, akã anɔkwa Nyɔŋmɔ lɛ kitã, ejaakɛ mihiɛ ekpa tsuutsu haomɔi lɛ anɔ, ni aŋɔ atee yɛ mihiɛ.”

Jeŋ hee lɛ

¹⁷ Yehowa kɛɛ akɛ, “Naa, miibɔ ŋwɛi hee kɛ shikpɔŋ hee, ni akaiŋ tsuutsu nii lɛ dɔŋŋ, ni asaŋ ebaŋ gbɔmɔ jwɛŋmɔ mli dɔŋŋ.

¹⁸ Nyɛnyaa, ni nyɛmli afilia nyɛ kɛya naanɔ, yɛ nii ni mibɔɔ lɛ hewɔ. Ejaakɛ naa, miibɔ Yerusalɛm hee koni etsɔ̃ mliflimɔ kɛ emli bii hu ni yɔɔ miishɛɛ.

¹⁹ Mimli aaafli mi yɛ Yerusalɛm he, ni manya mimaŋbii lɛ ahe, ni anuŋ yaafo kɛ blɔmɔ he yɛ Yerusalɛm dɔŋŋ.

²⁰ Bi fufɔoo ko bɛ jɛi ni aaaye gbii fioo kɛkɛ yɛ wala mli, loo onukpa ko ni eyi yɛŋ yɛ jeŋ. Gbɔmɔ kpakpa aaaye afii oha nɛ, shi aaana lɛ akɛ oblanyo; ni mɔ fɔŋ ni naa afii oha lɛ, aaaŋɔ lɛ akɛ mɔ ni alomɔ lɛ.

²¹ Amɛaamamɔ shĩai, ni amɛ diɛŋtsɛ amɛaahi mli; amɛaafee wain abɔi, ni amɛaaye amɛmli wain tsei lɛ ayibii.

²² Amɛmamɔŋ shĩai ni mɛi krokomɛi moŋ ahi mli, ni amɛhuŋ hu ni mɛi krokomɛi moŋ aye, ejaakɛ bɔ ni odum tsɛɔ yɛ koo mli lɛ, nakai nɔŋŋ mimaŋbii awala sɛɛ aaatsɛ; ni mihalamɔbii lɛ aaaye amɛnine naa nitsumɔ mli nii daa.

²³ Amɛgboŋ yaka deŋme, ni amɛfɔŋ bii amɛhaŋ osharã, ejaakɛ mɛi ni Yehowa ejɔɔ lɛ ashwiei ji amɛ, ni ajɔɔ amɛ hu amɛshwiei.

²⁴ Ni aaaba mli akɛ dani amɛaatsɛ mi lɛ mahere amɛ nɔ, ni be ni amɛwieɔ lolo lɛ, mabo amɛtoi.

²⁵ Klaŋ kɛ too gwantɛŋbi aaakpe nii yɛ he kome, ni jata aaaye jwɛi tamɔ tsina; ni onufu lɛ sũ aaafee eniyenii. Ayeŋ awui ko, ni akpãtãŋ nii ahiɛ dɔŋŋ yɛ Zion, migɔŋ krɔŋkrɔŋ lɛ nɔ fɛɛ,” Yehowa kɛɛ.