Yesaia 64 - ŊMALƐ KRƆŊKRƆŊ LƐ

¹ Ao, kulɛ otserɛ ŋwɛi mli, ni okpeleke shi koni gɔji lɛ ana bo ni amɛhe akpokpo yɛ ohiɛ,

² tamɔ bɔ ni la hãa lai tsoɔ, ni ehaa nu tswaa lɛ, koni eha ohenyɛlɔi ale ogbɛi. Ba koni obajie ohewalɛ lɛ kpo otsɔ̃ɔ ohenyɛlɔi lɛ, koni eha jeŋ maji lɛ ahe akpokpo yɛ ohiɛ!

³ Be ni ofee naakpɛɛnii ni yɔɔ gbeyei ni wɔhiɛ kãaa nɔ lɛ, okpeleke shi, ni gɔji lɛ kpokpo yɛ ohiɛ.

⁴ Ejaakɛ kɛjɛ teteete lɛ anuko dã, ni efoko mɔ ko mɔ ko toi naa dã, ni hiŋmɛi hu enako Nyɔŋmɔ ko yɛ bo osɛɛ ni feɔ nɔ ehaa mɛi ni hiɛ kã enɔ lɛ!

⁵ Ohereɔ mɛi ni kɛ miishɛɛ feɔ jalɛnii, mɛi ni kaiɔ bɔ ni otaoɔ akɛ amɛba amɛjeŋ amɛha lɛ atuu. Omli fu wɔ, shi wɔkã he wɔfee esha lɛ lolo. Yɛ omlifu lɛ sɛɛ lɛ, wɔkã he wɔfee esha lɛ lolo.

⁶ Wɔ fɛɛ wɔtsɔmɔ tamɔ mɔ ko ni he tseee, ni wɔjalɛ nifeemɔnii lɛ tamɔ takoshwɛ. Wɔnishaianii lɛ ehã wɔfee tamɔ baa gbiŋ, ni kɔɔyɔɔ tswaa wɔ kɛyaa.

⁷ Mɔ ko bɛ ni sɔleɔ tsɛɔ bo; mɔ ko bɛ ni baa odɛ̃ŋ yelikɛbuamɔ, ejaakɛ okɛ ohiɛ etee wɔ, ni oŋmɛɛ wɔhe oha wɔnishaianii lɛ.

⁸ Kɛ̃lɛ bo, Yehowa, bo nɔŋŋ ji wɔtsɛ. Wɔ lɛ su ji wɔ, ni bo ji wɔshɔ̃lɔ, ni oninenaa nitsumɔ ji wɔ fɛɛ.

⁹ Ao Yehowa, kaaha omli miifu wɔ fe nine, ni kaakai wɔhe eshai lɛ kɛmiiya naanɔ. Omaŋbii ji wɔ; naa wɔ mɔbɔ.

¹⁰ Omaji krɔŋkrɔŋi lɛ etsɔmɔ ŋa nɔ: Zion etsɔ ŋa nɔ, Yerusalɛm etsɔ amaŋfɔ̃.

¹¹ Wɔsɔlemɔ we ni yɔɔ krɔŋkrɔŋ kɛ fɛo lɛ, nɔ mli ni wɔtsɛmɛi lɛ jie oyi yɛ lɛ, ama naa la ashã. Akpãtã wɔhei fɛɛfɛji lɛ fɛɛ ahiɛ.

¹² Ao Yehowa, aso enɛɛmɛi fɛɛ sɛɛ lɛ, ooosu ohe lo, ooofee diŋŋ, ni ooowa wɔ yi tuutu lo?