Yesaia 63 - ŊMALƐ KRƆŊKRƆŊ LƐ

Edom nɔ oweletɔɔ

¹ Namɔ ji mɔ ni jɛ Bozra, maŋ ni yɔɔ Edom lɛ, baa nɛɛ? Namɔ nɛ, ni ewula kɛ atade ni tsuɔ faa, ni etsĩaa yɛ ehewalɛ kpeteŋkple lɛ mli nɛɛ? Yehowa kɛɛ akɛ, “Mi Yehowa ni; mɔ ni wieɔ yɛ jalɛ mli, mɔ ni yɔɔ hewalɛ ni ekɛhereɔ yiwala lɛ.”

² Mɛɛba ohe bo lɛ tsuɔ nɛkɛ; mɛɛba otadei lɛ tamɔ mɔ ni ŋaa wain atade nɛɛ?

³ Yehowa to he akɛ, “Mi koome too miŋa, minaanaa jeŋmaji lɛ anɔ tamɔ anaa wain lɛ. Minaanaa amɛnɔ yɛ mimlifu lɛ mli, ni amɛmli nu tsɛŋe wo mitadei lɛ amli, ni ewu mitadei lɛ amli fɛɛ nɛ.

⁴ Ejaakɛ oweletɔɔ gbi ko yɛ mitsui mli, ni mikpɔ̃mɔ afi lɛ eshɛ.

⁵ Mikwɛ mihe, shi yelikɛbualɔ ko bɛ; ni minaa kpɛ mihe akɛ mɔ ko kwraa bɛ ni mɔɔ mli haa mi. No hewɔ lɛ, mi diɛŋtsɛ mihewalɛ ni here miyiwala, ni mimlila lɛ ni mɔ mli hã mi.

⁶ Minaanaa majimaji lɛ anɔ yɛ mimlifu lɛ mli, mikpɔtɔ amɛ yɛ mimlila lɛ mli, ni mifɔse amɛlá mishwie shikpɔŋ.”

Akai Yehowa mlihilɛ lɛ

⁷ Mibagba Yehowa mlihilɛ lɛ kɛ Yehowa yijiemɔ lɛ matsɔ̃ɔ, yɛ nibii fɛɛ ni Yehowa efee eha wɔ lɛ kɛ ejurɔ pii ni efee Israel we lɛ yɛ emusuŋtsɔlɛ kɛ emlihilɛ ni fa lɛ naa lɛ hewɔ.

⁸ Yehowa kɛɛ, “Mimaŋ ji amɛ, bii ni lakaŋ mi.” No hewɔ ehere amɛ

⁹ yɛ amɛhaomɔi fɛɛ amli lɛ. Jeee tsulɔ loo ŋwɛi bɔfo ni here amɛyiwala, shi Yehowa diɛŋtsɛ jɛ esuɔmɔ kɛ emɔbɔnalɛ mli ehere amɛyiwala, ni ehole amɛ, ni ehiɛ amɛ yɛ blema beiaŋ fɛɛ.

¹⁰ Shi amɛ lɛ amɛtse atua, ni amɛfee Emumɔ Krɔŋkrɔŋ lɛ nidɔɔnii. No hewɔ lɛ, etsɔ amɛhenyɛlɔ, ni lɛ diɛŋtsɛ ekɛ amɛ wu.

¹¹ Kɛkɛ ni emaŋ lɛ kai Mose blema be lɛ, ni amɛkɛɛ akɛ, “Nɛgbɛ mɔ ni jie amɛ kɛ amɛhiɛnyiɛlɔ lɛ kɛjɛ ŋshɔ lɛ mli lɛ yɔɔ? Nɛgbɛ mɔ ni to Emumɔ Krɔŋkrɔŋ lɛ yɛ amɛteŋ lɛ yɔɔ?

¹² Nɛgbɛ mɔ ni ha enunyam hewalɛ lɛ tsɔ Mose nɔ etsu nibii wuji lɛ yɔɔ? Nɛgbɛ mɔ ni gba ŋshɔ lɛ mli yɛ amɛhiɛ, ni ekɛna naanɔ gbɛi eha ehe lɛ,

¹³ mɔ ni kpala amɛ kɛtsɔ̃ bu kwɔŋkwɔŋ lɛ mli lɛ yɔɔ? Amɛtɛrɛɛɛ tamɔ okpɔŋɔ tɛrɛɔ yɛ shiaŋa nɔ.”

¹⁴ Yehowa mumɔ lɛ ha amɛna hejɔlɛ tamɔ tsinai ni kpelekeɔ shi kɛyaa jɔɔ mli jwɛfɔ he. Nakai pɛpɛɛpɛ Yehowa kpala emaŋ lɛ, ni ekɛna anunyam gbɛi ehã ehe.

Mɔbɔnalɛ kɛ yelikɛbuamɔ he sɔlemɔ

¹⁵ Yehowa, maa oyi shi kɛjɛ ŋwɛi koni ojɛ ohe krɔŋkrɔŋ kɛ onunyam shihilɛhe lɛ okwɛ! Nɛgbɛ ohiɛdɔɔ kɛ ohewalɛ nitsumɔi lɛ yɔɔ? Otsuiŋshãlɛ kɛ omusuŋtsɔlɛ babaoo lɛ eŋmɛɛ wɔ.

¹⁶ Ejaakɛ bo nɔŋŋ ji wɔtsɛ, tsɛbelɛ Abraham leee wɔ, ni Israel hu eŋɔɔɔ wɔ akɛ bii; shi bo Yehowa lɛ bo nɔŋŋ ji wɔtsɛ kɛ wɔkpɔ̃lɔ kɛjɛ blema beebe ejaakɛ nakai ji ogbɛi.

¹⁷ Ao Yehowa, mɛɛba ohaa wɔduɔ gbɛ kɛjɛɔ ogbɛi lɛ anɔ? Mɛɛba owajeɔ wɔtsui koni wɔkashe bo gbeyei lɛ? Otsuji kɛ okutsei lɛ ahewɔ lɛ kuu osɛɛ.

¹⁸ Be fioo pɛ Ohe Krɔŋkrɔŋ lɛ hi omɛi krɔŋkrɔŋi lɛ adɛŋ; shi agbɛnɛ wɔhenyɛlɔi lɛ enaanaa Ohe Krɔŋkrɔŋ lɛ nɔ.

¹⁹ Wɔtsɔmɔ tamɔ mɛi ni oyeko amɛnɔ akɛ nuŋtsɔ pɛŋ, kɛ mɛi ni akɛ ogbɛi tsɛko amɛ dã.