Yesaia 61 - ŊMALƐ KRƆŊKRƆŊ LƐ

Kpɔ̃mɔ Sanekpakpa lɛ

¹ Nuŋtsɔ Yehowa mumɔ lɛ yɛ minɔ. Efɔ mi mu, ni etsu mi koni mibashiɛ Sanekpakpa lɛ mitsɔ̃ɔ ohiafoi. Etsu mi koni mibashɛje mɛi ni efee bliboo kɛ awerɛho lɛ amii, koni mishiɛ heyeli mitsɔ̃ɔ nomii lɛ, kɛ mɛi ni awo amɛ tsuŋ lɛ.

² Etsu mi koni mibashiɛ akɛ Yehowa dromɔ afi lɛ kɛ wɔNyɔŋmɔ lɛ oweletɔɔ gbi lɛ eshɛ, koni mishɛje ŋkɔmɔyelɔi fɛɛ amii.

³ Etsu mi koni mɛi ni yeɔ ŋkɔmɔ yɛ Zion lɛ mibaha amɛ ayilɔ yɛ lamlu najiaŋ, ni yɛ awerɛho najiaŋ lɛ, mibaha amɛmii ashɛ. Amɛaafee tamɔ tsei ni Yehowa diɛŋtsɛ tɛo. Amɛ fɛɛ amɛaafee nii ni ja, ni aaajie Nyɔŋmɔ yi yɛ nii ni efee lɛ hewɔ.

⁴ Amɛaatswa blema tsui koi lɛ; ni amɛaasaa tsutsubii lɛ amaŋfɔ̃i lɛ, ni amɛaato maji ni efite lɛ ehee ekoŋŋ ni ji yinɔi pii anɔ amaŋfɔ̃i lɛ.

⁵ Maŋsɛɛbii aaalɛ nyɛtoi lɛ, ni mɛi kpɔji aaahu nyɛŋmɔji amɛha nyɛ, ni amɛaasaa nyɛwaintsei ahe aha nyɛ.

⁶ Shi nyɛ lɛ, aaatsɛ nyɛ Yehowa osɔfoi, ni mɛi aaatsɛ nyɛ wɔNyɔŋmɔ lɛ sɔ̃ɔlɔi. Nyɛaabaye jeŋ maji lɛ anii, ni nyɛmii aaashɛ yɛ jeŋ majiaŋbii lɛ anii lɛ hewɔ.

⁷ Nyɛhiɛgbele kɛ hiɛshishwiemɔ lɛ sɛɛ aaafo, nyɛmii aaashɛ nyɛhe, yɛ nyɛ diɛŋtsɛ nyɛshikpɔŋ lɛ nɔ; ni nyɛninamɔ lɛ aaaku abɔ he, ni nyɛaana miishɛɛ kɛaatee naanɔ.

⁸ Ejaakɛ mi, Yehowa, misumɔɔ jalɛ saneyeli; miihi juu kɛ nɔ ni ejaaa gbɛ feemɔ. Mibato amɛ najiaŋ shishiishi, ni mi kɛ amɛ aaakpãŋ kpãŋmɔ ni aaahi shi kɛaatee naanɔ.

⁹ Amɛshwiei agbɛi aaahehe yɛ jeŋmaji lɛ ateŋ, ni amɛbii hu aaana gbɛi yɛ majimaji lɛ ateŋ. Mɛi fɛɛ ni aaana amɛ aaakpɛ̃lɛ nɔ akɛ mɛi ni Yehowa ejɔɔ amɛ ji amɛ.

¹⁰ Manya waa yɛ Yehowa hewɔ; ni misusuma mli aaafli lɛ yɛ miNyɔŋmɔ lɛ hewɔ, ejaakɛ ewo mi yiwalaheremɔ atade, ni ekɛ jalɛ mama eha mi, tamɔ bɔ ni ayɛmforo wu wulaa ehe loo bɔ ni ayɛmforo wulaa kɛ jwine lɛ.

¹¹ Ejaakɛ bɔ ni shikpɔŋ hãa nii kwɛ̃ɔ, ni trom hãa nii ni adu yɛ mli lɛ kwɛ̃ɔ lɛ, nakai Nuŋtsɔ Nyɔŋmɔ aaahã jalɛ kɛ yijiemɔ akwɛ̃ yɛ majimaji lɛ fɛɛ ahiɛ.