Yesaia 60 - ŊMALƐ KRƆŊKRƆŊ LƐ

Yerusalɛm hee lɛ

¹ Tee shi ni otso ejaakɛ ola lɛ eshɛ shi etã, ni Yehowa anunyam lɛ miikpɛ yɛ onɔ.

² Ejaakɛ naa, duŋ baaha shikpɔŋ lɛ nɔ, ni duŋ kpii aaaha majimaji lɛ anɔ. Shi bo lɛ, Yehowa la aaate lɛ shi aha bo, ni enunyam lɛ aaakpɛ yɛ onɔ.

³ Ni maji aaatsi kɛbɛŋkɛ ola lɛ, ni maŋtsɛmɛi aaaba ola ni kpɛɔ yɛ onɔ lɛ he.

⁴ Wo ohiɛ nɔ, koni okwɛ ohe kɛkpe; ooona amɛ fɛɛ ni amɛbua amɛhe naa kɛmiiba oŋɔɔ. Obihii lɛ aaajɛ maŋsɛɛ shɔŋŋ aba, ni obiyei lɛ, aaahiɛ amɛ yɛ ŋmawuiaŋ kɛaaba.

⁵ Nakai be lɛ ohiŋmɛi aaana; ooona miishɛɛ kɛteke nɔ, ni otsui aaatɔ, ni ooonya. Ejaakɛ akɛ jeŋmaji lɛ ajwetrii aaabahã bo; akɛ amɛjwetrii lɛ aaajɛ ŋshɔsɛɛ aaabahã bo.

⁶ Yoomai asafo yuu aaabua ohe kutuu, ni ji Midian kɛ Efa yoomai oblahii lɛ. Amɛaatere shika kɛ krɔbɔo kɛaajɛ Sheba kɛaaba; ni mɛi aaagba nɔ ni Yehowa efee lɛ he sane kɛ ŋɔɔmɔ lɛ.

⁷ Aaabua Kedar toi fɛɛ anaa abaha bo, kɛ Nebaiot too ojwɛnii lɛ hu akɛ afɔle. Akɛ amɛ aaashã afɔle ni sa mihiɛ yɛ mifɔleshãa latɛ lɛ nɔ, ni mawo minunyam Sɔlemɔ we lɛ hiɛ nyam.

⁸ Mɛɛ ji nibii nɛɛ ni hoɔ tamɔ atatu loo tamɔ okpoi ni eku amɛsɛɛ kɛmiiba amɛtsu naa nɛɛ?

⁹ Lɛji ni jɛ maŋsɛɛ shikpɔji anɔ ni kɛ Nyɔŋmɔ webii miiba ni. Amɛkɛ obihii lɛ kɛ amɛjwiɛtɛii kɛ amɛshika miiba kɛbawo Yehowa, oNyɔŋmɔ lɛ, ni ji Israel Mɔ Krɔŋkrɔŋ lɛ, gbɛi lɛ hiɛ nyam; ejaakɛ eha ohiɛ eba nyam.

¹⁰ Yehowa miikɛɛ Yerusalɛm akɛ, “Gbɔi aaatswa ohe gbogboi lɛ, ni amɛmaŋtsɛmɛi lɛ aaasɔmɔ bo; ejaakɛ mitswa bo nɔ yɛ mimlifu mli; shi mimusuŋ etsɔ̃ mi yɛ ohe yɛ mimlihilɛ lɛ naa.

¹¹ Ogboi lɛ anaa aaakamɔ be fɛɛ be; shwaneshwane kɛ nyɔɔŋnyɔɔŋ fɛɛ lɛ, aŋamɔŋ, koni maŋtsɛmɛi anyiɛ amɛwebii ahiɛ, koni amɛkɛ majimaji lɛ ajwetrii lɛ abaha bo.

¹² Shi maji ni sɔmɔɔɔ bo lɛ aaakpãtã amɛhiɛ; nakai maji lɛ, kpãtãmɔ aaakpãtã amɛhiɛ butuu.

¹³ Lebanon kooŋ tsei kpakpai, ni ji sɛsɛo kɛ odum kɛ odanta, akɛaaba akɛbawula mihe krɔŋkrɔŋ lɛ mli, ni mawo he ni midamɔɔ lɛ hiɛ nyam.

¹⁴ Mɛi ni wa bo yi lɛ abii lɛ hu aaaba abakoto bo; ni mɛi fɛɛ ni gbe ohe guɔ aaaba abakula onaji anaa. Amɛaatsɛ bo ‘Yehowa maŋ wulu,’ ‘Israel Mɔ Krɔŋkrɔŋ lɛ Zion lɛ.’

¹⁵ “Kulɛ akwa bo, ni anyɛ bo; ni mɔ ko mɔ ko tsɔ̃ɔɔ omli kɛhooo; shi no najiaŋ lɛ, maha oje agbo, ofee naanɔ anunyam kɛ naanɔ nyamɔ kɛjɛ yinɔ kɛya yinɔ.

¹⁶ Oooye majimaji kɛ maŋtsɛmɛi anii tamɔ abifao yeɔ enyɛ fufɔ, ni okɛaana ole akɛ, mi, Yehowa, mi ji oyiwalaherelɔ; ni Israel Nyɔŋmɔ Ofe lɛ ji okpɔ̃lɔ.

¹⁷ “Maha bo shika yɛ akɔɔble najiaŋ, ni maha bo jwiɛtɛi yɛ dade najiaŋ; tso najiaŋ lɛ, maha bo akɔɔble; ni tɛi anajiaŋ lɛ, maha bo dade. Onɔyelɔi lɛ waŋ bo yi dɔŋŋ, ni maha amɛkɛ jalɛ saneyeli kɛ toiŋjɔlɛ aye onɔ.

¹⁸ Anuŋ yiwalɛ he dɔŋŋ yɛ oshikpɔŋ lɛ nɔ, loo nifitemɔ loo niiahiɛkpãtãmɔ he yɛ ohusui amli he ko he ko; mafa ohe ni mabu ohe; matsɔ yiwalaheremɔ gbogbo maha bo. Ni ooojie miyi, ejaakɛ mikpɔ̃ bo.

¹⁹ “Jeee hulu ni baatso la dɔŋŋ aha bo shwane, ni jeee nyɔɔŋtsere ni baakpɛ koni jeŋ atse aha bo gbɛkɛ; shi moŋ Yehowa ni aaatsɔ̃ ola kɛaatee naanɔ, ni oNyɔŋmɔ lɛ aaatsɔ̃ onunyam.

²⁰ Ohulu lɛ enyɔŋ shi dɔŋŋ, ni onyɔɔŋtsere lɛ hu woŋ duŋ; ejaakɛ Yehowa aaatsɔ̃ ola kɛaatee naanɔ, ni okɔmɔyeli gbii lɛ hu sɛɛ aaafo.

²¹ Omaŋ muu lɛ fɛɛ aaafee nɔ ni ja, ni shikpɔŋ lɛ aaatsɔ̃ amɛnɔ kɛya naanɔ, amɛ ji tso ni mitɛo akɛ mi mininenaa nitsumɔ nii koni akɛwo mihiɛ nyam.

²² Mɔ bibioo fe fɛɛ lɛ aaatsɔ̃ weku muu, ni weku bibioo lɛ aaatsɔ̃ jaku muu. Kɛji be lɛ shɛ lɛ, Mi, Yehowa, maha eba mli oya.”